1 Palu wanyu kulila, panya tjiṉṯu maḻatja ilaringkunyangka kura kutjupa kutjupa tjuṯa wirkankunyangka wituwitu puḻka ngaṟaku Jesuku walytja tjuṯaku. 2 Panya nyara palula aṟa aṉangu tjuṯangku tjananku kutju kuliṟa palyalku, kutjupa tjuṯaku ngaḻṯuringkunytja wiyangku. Ka kutjupa tjuṯangku mani kutju puḻkaṟa kulilku, munuya kaṉany-kaṉanypa ngaṟala tjananku mirawaṉiku. Ka kutjupa tjuṯa tjaa kuraringkuku munuya ngunti tjuṯa kutju wangkaku, munuya mamangka ngunytjungka puḻkaṟa tungunpungkuku, munuya wiṟu tjuṯa ungkunyangka pukuḻarinytja wiyangku wantiku, munuya rawa alatjiṯu Godala tungunpungkuku. 3 Kaya kutjupa tjuṯangku aṉangu kutjupa tjuṯaku nyakula ngaḻṯuringkunytja wiyangku alatjiṯu wantiku. Ka aṉangu kutjupangku kutjupa tjuṯaku kuraringkula maḻangka kuṉṯaringkula palumpa tjanampa kalyparingkunytja wiyangku alatjiṯu wantiku. Kaya kutjupa tjuṯangku aṉangu tjuṯa ngunti ngukaṟa kuranmankuku. Kaya kutjupa tjuṯangku aṉangu kutjupa tjuṯaku mapalku pikaringkula tjananya pungkuku ngaḻṯuringkunytja wiyangku, panya tjana puṯu kulilku purkaṟangku kuliṟa tjukaṟuruntjikitjangku. Munuya paluṟu tjana aṉangu kutjupa tjuṯa wiṟuṟa nyinanyangka nyakula tjananya kuraṟa pungkuku, panya tjiṉṯu nyara paluṟu ilaringkunyangka tjana kura tjuṯaku kutju puḻkaṟa mukuringkuku.

4 Uwa, ka kutjupa tjuṯangku maḻpa tjuṯa ngunti kuralku panya tjanampa ngaṉmanypa mukulya nyinanytjatjanungku tjananya wantiku. Kaya kutjupa tjuṯangku purkaṟangku kuliṟa palyantja wiyaringkuku munuya warpungkula kutju palyalku atatjuṟa kulintja wiyangku. Munuyanku kaṉany-kaṉanytju walytjangku kutju mirawaṉiku, munuya Godaku mukuringkunytja wiyaringkula tjana mukuringkunytjitja kutju palyantjikitja mukuringkuku tjananku walytjangku pukuḻmankunytjikitjangku. 5 Kaya kutjupa tjuṯa Jesuku walytja-palku nyinaku, palu tjana unngu palumpa mulamularingkunytja wiyaringkuku. Ka nyuntu tjananya nyakuku rawangku tjana Godala tungunpungkula kura kutju palyannyangka munun nintingku kulilku, “Munta, nyanga tjana Jesuku walytja wiya.” Munu palulanguṟu tjanala tjunguringkuwiyangku wantima alatjiṯu.

6-7 Palu aṉangu nyanga kuralpai tjuṯangkuya minyma kutjupatjara ngunti wangkara wituwitulku tjanala wangaṉarangku kulintjaku. Panya minyma nyara paluṟu tjanaya kawakawa ngunti kulilpai, munuya iwara kurangka kutju tiṯutjara ngaṟapai. Kutjupa-aṟaya kura palyantjatjanu kuṉṯaringkupai, palu maḻangkaya piṟuku kura panya palunyaṯu palyantjikitjangku kulilpai munuya tiṯutjara Godala miṟangka kuṉṯaringkupai. Munuya paluṟu tjana tjukurpa kutjupa kutjupa tjuṯa kutju rawangku kulilpai munuya puṯu kulilpai, “Yaaltji tjukurpa tjukaṟuru mulapa?” Palulanguṟuya aṉangu panya kuralpai tjuṯangku minyma panya palumpa tjanampa ngurangka tjarpara tjukurpa wiṟu-palku tjanala wangkapai, kaya kuliṟa mapalku mulamularingkupai.

8-9 Uwa Timitji, nyuntu aṉangu panya ngunti kuralpai tjuṯa tjananya wantima alatjiṯu, panya paluṟu tjana wati ini Tjanitjanya pula Tjampuṟinya puṟunypa nyinanyi. Panya iriti pula Mosela tungunpungangi paluṟu Godaku tjukurpa wangkanyangka. Ka panyaya aṉangu uwankara palumpa pulampa nintiringu kura nyinanyangka, ka panya Godalu pulanya painu palumpa tjukurpa wantinyangka. Palu puṟunytju Godalu aṉangu nyanga ngunti kuralpai tjuṯa kuḻu puḻkaṟa pailku tjana palumpa Tjukurpa Palya Jesunyatjara ngunti wangkara kurannyangka. Kaya palu puṟunypaṯu aṉangu tjuṯangku tjanampa nintiringkula ngurkantankuku tjana kura nyinanyangka, kaya paluṟu tjana puḻkaṟa kuṉṯaringkuku munuya aṉangu maṉkur-maṉkurpa kutju Godalanguṟu kuraṟa mauṉṯaṟa katiku tjukurpa ngunti wangkara.

10 Palu Timitji nyuntun tjananya puṟunypa wiya. Panya nyuntu purkaṟangku kuliningi ngayulu aṉangu tjuṯangka Tjukurpa Palya Jesunyatjara wangkara nintinnyangka. Munu panyaṉin nyangangi ngayunya Godalawanu tjukaṟuru nyinara palumpa waṟka rawangku palyannyangka wantinytja wiyangku. Nyara palulanguṟu nyuntu nintingku kulini panya ngayulu Godanya kutju kulilpai palunya pukuḻmankunytjikitjangku. Nyuntu ninti panya ngayulu Jesula Christalawanu raparinganyi. Nyuntu panyaṉin nyangangi, munun nintiringu panya ngayulu Jesuku walytja tjuṯaku puḻkaṟa mukuringkupai munuṉa palunya tjananya purkaṟangku wangkara nintilpai mirpaṉarinytja wiyangku. 11 Munu panyaṉin nyangangi aṉangu tjuṯangku anaṟa pikaringkunyangka ngura panya Antiyakala, Akani-yamala, Litjuṟala tjanala. Panya ngura nyara palula tjanalaṉiya painingi Godaku tjukurpa wangkawiyangku wantinytjaku. Palu ngayuluṉa tungun-tunguntu wangkangi kaṉiya pika puḻka mulapa pungangi. Palu Mayatja Jesuluṉi rawangku wankaṟuṟa kanyiningi.

12 Palu nyangatja tjaka panya aṉangu tjuṯa Jesuku Christaku walytja nyinanyangka nyakulaya aṉangu kuralpai tjuṯangku palunya tjananya kuraṟa pungkupai Jesunya waṉalwiyangku wantinytjaku. 13 Panya manta winkingkaya aṉangu kuralpai tjuṯa nyinanyi. Paluṟu tjana wangkapai, “Nganaṉa Jesuku walytja nyinanyi.” Palu wiya tjana kura kutju rawangku palyantjikitja mukuringkupai munuya palulanguṟu kura rawangku palyantjatjanu puḻkaṟa mulapalta ma-kuraringkupai. Panya palunya tjananya mamungku ngunti kuralpai, kaya palu puṟunytjuṯu aṉangu kutjupa tjuṯa ngunti kuralpai.

14 Palu Timitji, nyuntu panya paluṟu tjana puṟunypa wiya. Panya nyuntunyaya ngaṉmanytju nintinu tjukurpa tjukaṟuruku Jesuku panya walytja kutjupa tjuṯangku, ka panyan nintiringkunytjatjanu Jesuku Christaku mulamularingu alatjiṯu. Kaṉa kuwari nyuntula wangkanyi tjukurpa tjukaṟuru palunya tiṯutjarangku wangaṉarangku kulintjaku uparingkula wantinytja wiyangku. Nyuntu panya ninti tjanampa nyara nyuntunya nintilpai tjuṯaku, panya paluṟu tjana nyuntula tjukaṟurungku wangkara nintiningi. 15 Palu nyuntu panya tjitjilpi nintiringangi Godaku tjukurku panya nyiri miḻmiḻṯa ngarinytjitjaku. Munu panyan nyara palulanguṟulta nyuntu puḻkaringkula tjukurpa palunya rawangkuṯu kuliningi watarkurinytja wiyangku. Munu panyan tjukurpa palumpa nintiringkunytjatjanungku kuliningi Jesuku Christaku mulamularingkunytjikitjangku, ka panya nyuntunya wankaṟunu.

16 Panya tjukurpa nyanga nyiri miḻmiḻpa Godaku alatjiṯu, panya Kurunpa Miḻmiḻṯu nintinnyangkaya Godaku wangkatjara tjuṯangku iriti nyiringka walkatjunu. Ka tjukurpa paluṟu palya mulapa ngaṟanyi aṉangu tjuṯangku kuliṟa nintiringkunytjaku. Ka panyala tjukurpa nyanga palunya kulintjatjanungku aṉangu kutjupa iwara kurangka ankunyangka nyakula pailpai. Munula palu puṟunypaṯu aṉangu kutjupangku ngunti palyannyangka nyakula tjukurpa nyanga palulanguṟu wangkara palunya tjukaṟurulpai paluṟu kuliṟa Godalawanu tjukaṟuru nyinanytjaku. 17 Uwa, tjukurpa nyanga paluṟu wiṟu mulapa ngaṟanyi nganaṉa Godaku walytja tjuṯangku kuliṟa nintiringkunytjaku. Nyanga palulanguṟu kutjula puḻkaṟa nintiringkunytjatjanungku nganaṉa wiṟu tjuṯa kutju palyalku.