Tjukurpa Esther-nyatjara
Esther
Nyangatja Ngaṉmanytju Nyakula Wangkanytjaku
Nyangatja Godaku tjukurpa kungkawaṟa Jew ini Esther-nyatjara. Palu paluṟu Israelta wiyangka manta kutjupangka nyinangi ini Papilaniyala, panya iritiya ngura nyara palunya nguraṟa tjuṯa warmaḻa pitjangu manta Israeltakutu munuya Jew panya tjuṯa mulapa pungkula iluntanu, munuya tjara kutjupa Esther-ku tjamupiti kuḻu witiṟa maḻakungku katingu tjanampa ngurakutu parari mulapa. Ka ngula Esther-nya ngura nyara palula iṯi ngaringu ngura malikitjangka tawunu ini Tjuutjala, palu paluṟu tjitji kuḻunypa tjiṯularingu, ka palumpa kuṯangku wati ini Mutukailu palunya aṯunytju kanyiṟa puḻkaṉu palumpa ngurangka.
Ka paluṟu puḻkaringkunyangka Puutjuku mayatja puḻkangku palunya ngurkantaṟa aḻṯingu munu palunya tjunu palula itingka mayatjaṯu nyinanytjaku. Ka ngula wati kurangku wituwituṉu mayatja panya puḻka Jew tjuṯa iluntankunytjaku Esther-ku panya walytja tjuṯa. Ka Esther-lu rapangku mayatja panya palula anga-wangkangi palumpa walytja tjuṯa wankaṟunkunytjaku, ka mulapaṯu tjananya wantingu kaya wankaringu.
Tjukurpa nyanga palulanguṟula kulini mulapa Godalu palumpa walytja tjuṯa aṯunymaṟa kanyilpai.
[Tjukurpa nyanga paluṟu mutumutuntja ngaṟanyi, uwankara wiya. Palu ngulaya tjukurpa winki palyalku.]
Tjukurpa nyanganpa ngarinyi:
1:1—2:23 Puutjuku mayatja puḻkangku mai puḻka palyantja
3:1—5:14 Wati kurangku aṉangu Jew uwankara pungkula wiyantjikitja mukuringkunytja
6:1—8:15 Esther-lu mayatja panya puḻkangka anga-wangkara palumpa walytja tjuṯa wankaṟunu
8:16—10:3 Mayatja puḻkangku Esther-ku pukuḻarira mai puḻka palyantja
1
1-22 Iriti wati ini Tjuukitjinya mayatja puḻka mulapa nyinangi ngura tjuṯa mularku. Munu paluṟu tawunu ini Tjuutjala nyinara ngura palunya tjananya kanyiningi. Munu tjiṉṯu kutjupa paluṟu aṉangu winki aḻṯingu palumpa ngurakutu mai puḻka pitjala ngalkuntjaku tjiṉṯu tjuṯa. Kaya aṉangu tjuṯa mulapa pitjangu munuya puḻka ngalkula tjikiningi. Ka mayatja paluṟu palumpa kuri wangkangu mantara wiṟungka tjarpara palula tjungu pitjala ngaṟanytjaku aṉangu tjuṯangku nyakunytjaku. Palu paluṟu pitjanytja wiyangku wantingi. Ka mayatja panya paluṟu palumpa kuriku puḻkaṟa mirpaṉaringu munu palunya painu munu kutjupa aḻṯinytjikitjangku nguriningi.