37
Godalu Aṉangu Tjuṯa Wankantjikitjangku Kalkuntja
1 Kaṉi Mayatja Godalu panya witulya puḻkangku ngayunya pampuṉu, ka palumpa kuruntu ngayunya katingu ngura kutjupakutu wimaṟu puḻkakutu munuṉi nyara palula tjunu. Ka wimaṟu nyara palula tarka tjuṯa mulapa ngarira waṉingi. 2 Kaṉi paluṟu para-katiṟinangi tarka tjuṯangka katuwanungku ngayulu uwankara nyakunytjaku. Kaṉa nyangu tarka panya winki mulapa ngarira waṉinyangka. Ka tarka paluṟu tjana uwankara piḻṯi alatjiṯu ngaringi.
3 Ka Mayatjalu ngayula wangkangu, “Wati awa! Kulilaṉi kaṉanta tjapila! Tarka nyanganpa wanyu mulapa wankaringkula nyinaku kuwari?”
Kaṉa wangkangu, “Nyuntu Mayatjanya panya puḻka mulapa! Nyuntu kutjungku nintingku kulini. Ngayulu ngurpa.”
4 Kaṉi palulanguṟu wangkangu tarka palula tjanala wangkanytjaku alatji, “Tarka piḻṯi tjuṯa! Mayatja Godaku tjukurpaya kulinma! 5 Panya paluṟu Mayatja puḻkangku nyurala wangkanyi alatji, ‘Ngayulu nyuranya ngaalypa ungkuku nyura wankaringkunytjaku. 6 Munuṉa piṟuku nyurala pulyku iltjanpa kuḻu tjungulku. Munuṉa palulanguṟu nyuranya miṟingka tjutulku. Ka nyura ngaalypatjararingkula piṟuku wankaringkuku. Munu nyura palulanguṟu ngayunya kulilku panya mulapa ngayulu Mayatja Godanya nyinanyi.’ ” Alatji Godalu ngayula wangkangu palumpa tjukurpa tarka tjuṯangka tjakultjunkunytjaku.
7 Kaṉa wangaṉarangku kuliṟa tjanala tjakultjunu panya Mayatjalu ngayula wangkanytja. Munuṉa wangkara wangkara kulinu tirkilymankunyangka. Munuṉa para-nyakula nyangu tarka paluṟu tjana tjungu-tjunguringkunyangka. Panya tjana ngaṉmanypa ilura tarka-kutjuringu munuya iltjanpa wiyaringkula mantangka ngarira waṉingi. Ka ngayulu tjanala Godaku tjukurpa wangkanyangka tarka panya paluṟu tjana maḻaku tjunguringu puntu walytjangka walytjangka. 8 Ka pulyku tjuṯa tarkangka uwankara tjunguringu iltjanpa kuḻu, ka palulanguṟu miṟingku kuḻu tjananya tjutuṉu, palu tjana kuwaripaṯu ngaringi ngaalypa wiya.
9 Ka palulanguṟu Mayatjalu ngayula piṟuku wangkangu palumpa tjukurpa waḻpangka wangkanytjaku nyanga alatji, “Mayatja Puḻkangku Godalu wangkanyi alatji, ‘Waḻpa ngana! Waḻa pitja kampa uwankaranguṟu, wiluṟaranguṟu kakaraṟanguṟu uḻpaṟiranguṟu munu alinytjaranguṟu kuḻu. Munu ngalya-pitjala ilunytja nyanga tjuṯangka ngaalypa puuṟa tjarpatjura tjana wankaringkunytjaku.’ ” Alatji Godalu ngayula wangkangu waḻpangka wangkanytjaku.
10 Kaṉa mulapaṯu wangkangu Godalu panya wangkanytja. Ka waḻpa wirkaṟa ilunytja panya tjuṯangka ngaalypa puuṟa tjarpatjunu, kaya piṟuku wankaringu. Munuya paluṟu tjana uwankara pakaṟa ngaṟangi mungilyi alatjiṯu.
11 Ka Mayatja Godalu ngayunya wangkangu, “Nyuntu tarka nyanga palunya tjananya nyanganyi paluṟu tjana panya aṉangu Israelkunu tjuṯa. Panya paluṟu tjana wangkapai, ‘Nganaṉa puḻkaṟa tjituṟu-tjituṟurira puṯu kulini, “Yaaltjirikula?” Nganaṉa tarka piḻṯi tjuṯa puṟunypa nyinanyi munula puṯu kulini wankaringkunytjikitjangku.’ Alatji tjana wangkapai.”
12 Munu palulanguṟu Godalu ngayunya piṟuku wangkangu palula tjanala tjakultjunkunytjaku palumpa tjukurpa nyanga alatji,
“Walytja tjuṯa! Ngayulu Godalu Mayatja puḻkangku kuwari kurulpa tjuṯa nyurampa aḻaṉi munuṉa nyuranya pakaltjingaṟa maḻakungku katiku ngura walytjakutu Israeltakutu. 13 Ka nyura ngayuku walytja tjuṯa kurulnguṟu pakantjatjanungku kulilku, ‘Munta mulapa paluṟu Mayatja puḻka nyinanyi nganampa Godanya.’ 14 Kaṉa ngayuku kurunpa nyurala unngu tjarpatjunkuku, ka nyura piṟuku ngaalytjararingkula wankaringkula nyinaku. Kaṉa nyuranya maḻakungku katira tjunkuku ngura walytjangka manta panya Israelta. Ka nyura nyara palulanguṟu kulilku, ‘Mulapa Mayatja Godalu nganaṉala kalkuntjatjanungku palyaṉu munulanya paluṟu wankaṟunu.’ Alatji nyura ngayuku nintiringkula kulilku.”
Nyanga alatji Godalu ngayunya wangkangu palula tjanala wangkanytjaku Israelkunu tjuṯangka.