40
Wati Kutjarangku Tjailangka Nyinara Tjukurmankunytja
1 Ka ngula Mayatja Piiṟaku waṟka kutjarangku palunya kuraṉu Piiṟanya. Wati panya kutjungku waina Piiṟanya palyaṟa ungkupai, ka panya kutjupangku mai nyuma paulpai Piiṟaku. 2-3 Palu paluṟu pula kurannyangka Piiṟalu pulanya mirpaṉarira tjailangka tjarpatjunu panya kuralpai tjuṯangka tjungu nyinanytjaku. Ka nyara palula panya Josephanya kuḻu nyinangi. 4-5 Ka tjailaku mayatjangku Josephala wangkangu pulanya aṯunymaṟa wiṟuṟa kanyintjaku.
Ka pula tjailangka rawa mulapa nyinangi, munu palulanguṟu pula munga kutjupa kunkunpa ngarira tjukurmanu. Paluṟu waina panya ungkupaingku tjukurpa kutjupa tjukurmanu, ka paluṟu mai panya paulpaingku kutjupaṯu tjukurmanu. 6-7 Munu pula mungawinki pakaṟa rawangku kuliningi munu pula puṯu kuliṟa tjituṟu-tjituṟu nyinangi.
Josephalu Utintja Pula Tjukurmankunytja
Ka Josephalu wirkaṟa tjituṟu-tjituṟu nyakula wangkangu, “Nyaanguṟu nyupali tjituṟu-tjituṟu nyinanyi?”
8 Ka pula wangkangu, “Mungangka ngali tjukurmanu munuli puṯu kuliningi. Ka aṉangu kutjupangku pitjala ngalila kuliṟa utiṟa wangkanytjaku wiya ngaṟanyi.”
Ka Josephalu wangkangu, “Godanya ninti, panya nyupali tjukurmankunytja paluṟu kutjungku utilpai. Walangku pula wanyu wangka panya nyupali tjukurmankunytja, kaṉa kuliṟa Godala tjapilku ka paluṟu utilku.”
9-11 Ka wati panya waina ungkupaingku-waraṟa wangkangu nyanga alatji, “Ngayuluṉa ngarira tjukurpa nyanga alatji nyangu mai panya kiṟipitji puṉu ngaṟanyangka ngayula itingka miṉa maṉkurtjara. Ka puṉu nyara palula nyaḻpi tjuṯa mapalku pakaningi inuntji kuḻu. Ka inuntjinguṟu mai kiṟipitji pakaṟa kuṟuringu. Ka ngayulu kanyiningi mayatjaku panya walpayaṯa, munuṉa kiṟipitji mantjiṟa walpayaṯangka maṟangku tjulkuṉu tjuratja uṟu tjutiṟa wamaringkunytjaku. Munuṉa palulanguṟu tjaalyngaṟatjuṟa ungu mayatja Piiṟanya.”
12-13 Ka Josephalu kuliṟa wangkangu wati panya palula, “Kulilaṉi kaṉa utilku! Panya puṉu kiṟipitji miṉa maṉkurtjaran nyangu. Pala palulanguṟu kulinma panya tjiṟirpi maṉkurpa ngaṟaku, kanta palulanguṟu Mayatja Piiṟalu nyuntunya tjailanguṟu pakaltjingalku panya palu puṟunypaṯu palumpa waṟkarinytjaku. Ka nyuntu panya piṟuku walpayaṯangka waina tjutiṟa ungkuku mayatja panya palunya.
14-15 “Palu nyuntu nyanganguṟu pakaṟa piṟuku wiṟuṟa waṟkarirampa-puṯa kulinma ngayunya munu wangka mayatja panya Piiṟala ngayuku ngaḻṯuringkunytjaku munu ngura nyanganguṟu pakaltjingantjaku. Panya ngayunyaya witiṟa katingu ngura nyara Iipuṟu tjuṯaku mantanguṟu ngura nyanga Itjipalakutu. Kaṉiya ngura nyangatja nguraṟangku ngapartji piṟuku witiṟa tjailangka tjarpatjunu wiyanguṟu alatjiṯu.”
16-17 Palu wati kutjupangku mai nyuma paulpaingku kuliningi Josephalu tjukurmankunytja panya wiṟuṟa utiṟa wangkanyangka. Munu palulanguṟu raparingkula wangkangu, “Wangkakuṉa? Ngayulu kuḻu tjukurmanu alatji, panya ngayuluṉa piti maṉkurpa tjaḻiṟa katangka katulkira katulkira katingi. Palu kutjara uḻṯu, ka kutju katutja mai waṟuly-waṟulyitjara mayatja Piiṟanya ungkunytjaku. Ka mai panya palunya tjuḻpu tjuṯangku pitjala ngalkuningi.”
18-19 Ka Josephalu wangkangu, “Uwa, kulilaṉi kaṉa utilku. Panya piti maṉkurpan tjukurmanu. Nyara palulanguṟu kulinma tjiṉṯu maṉkurpa ngaṟanyangka mayatja Piiṟalu wangkaku nyuntunya tjailanguṟu pakaltjingantjaku. Palu pala palula maḻangka nyuntunya kata kaṯantjaku wangkaku mununta kata kaṯaṟa puntu kutju puṉungka utitjunkunytjaku wangkaku. Kantaya tjuḻpu tjuṯangku pitjala ngalkuku.” Alatji Josephalu utiṟa wangkangu wati panya mai paulpaingka.
Josephaku Wangka Utiringkunytja
20-21 Ka panya palulanguṟu tjiṟirpi maṉkurpa wiyaringkunyangka Piiṟaku tjiṟirpi panya wirkanu, paluṟu panya iṯi ngarinytjitja. Kaya tjiṟirpi pala palulalta waṟka tjarangku mai puḻka palyaṉu kuka kuḻu Piiṟaku maḻpa tjuṯangku tjunguringkula ngalkuntjaku palumpa pukuḻarira. Ka palulanguṟu Piiṟalu wangkangu wati panya kutjara waina ungkupai munu mai paulpainya pulanya tjailanguṟu pakaltjingaṟa katinytjaku palulakutu. Munu wati panya waina ungkupai maḻakungku tjunu piṟuku palumpa waṟkarinytjaku, palunya waina palyaṟa ungkunytjaku. 22 Munu wangkangu wati panya kutjupa iluntankunytjaku wati panya mai paulpainya. Panya Josephalu wangkanytjitja alatjiṯu utiringu.
23 Palu wati panya waina ungkupai Josephaku tjukurku watarkuringu, munu panya Mayatja Piiṟala tjapintja wiyangku wantingu Josephanya tjailanguṟu walatjunkunytjaku.