1 Palu nyaa Godaku mulamularingkunytja? Wiya, panya aṉangu Godaku mulamularingkunytja nyanga alatji panya paluṟu rapangku kulintjatjanungku nyinara paṯaṉi Godalu kalkuntjitja utiringkunytjaku. Paluṟu panya puṯu nyanganyi kuṟungku Godalu kalkuntjitja wirkankunytjaku, palu paluṟu nintingku kulini, “Mulapa paluṟu kalkuntjatjanungku palyalku alatjiṯu.” 2 Panya iriti Godaku walytja tjuṯa palumpa mulamularingkunyangka Godanya tjanampa puḻkaṟa pukuḻaringi.

3 Ka nganaṉa Godaku mulamularingkula nintingku kulini panya paluṟu ilkaṟi manta kuḻu wangkara paluṉu. Kala nyanganyi paluṟu paluntjitja uwankara, palu puṯula nyanganyi yaaltjinguṟu paluntja, panya paluṟu arkayitjanguṟu paluṉu wangkangku kutju.

4 Uwa, wanyula kulinma aṉangu irititja tjuṯa Godaku mulamularingkupai tjuṯa.

Panya Godaku mulamularingkula Abeltu tjukaṟurungku kuka pungkula ungu Godanya palumpa kuṯangku Kaintu puṟunypa wiya. Ka Godanya palumpa pukuḻaringu munu Kainnga wantingu munu paluṟu mulamularingkunyangka wangkangu Abelnga, “Nyuntu ngayula miṟangka tjukaṟuru ngaṟanyi.” Palu Abelnga iriti mulapa ilungu munu paluṟu nganaṉanya kuwari nintini Godaku mulamularingkunytjaku.

5 Ka Godaku mulamularingkula Iinakalu palunya pukuḻmanu, ka Godalu palunya wanka katingu. Panya nyiringka ngarinyi alatji, “Godanya pukuḻaringu palumpa munu ilunytja wiya wanka katingu.” Kaya aṉangu tjuṯangku palunya puṯu nguriningi Godalu palunya katinyangka. 6 Palu ngayulu tjinguṟu Godaku mulamularingkunytja wiya nyinarampa palunya puṯu pukuḻmananyi. Panya ngayulu Godalakutu ilaringkunytjikitja mukuringkulampa uti palumpa mulamularingama panya paluṟu mulapa nyinanytjitjaku, munuṉa uti ngayulu mulamularingkula kulinma panya mulapa paluṟu aṉangu tjuṯaku wiṟu mulapa palyalpai palulakutu pitjanyangka.

7 Ka Noah-lu Godaku mulamularingkula pauta puḻka palyaṉu, panya Godalu palula ngaṉmanytju wangkangu mina puḻka mulapa iyantjikitjangku, mina panya tjana ngaṉmanytju nyakunytja wiyatja. Ka paluṟu Godala kulintjatjanungku pauta palyaṉu munu walytja tjuṯatjara uṟu puḻkangka-tawara tjarpara wankaṟuringu. Kaya aṉangu tjuṯangku Noah-nya puṟunypa mulamularingkunytja wiyangku wantingi, munuya Noah-nya wankaringkunyangka wiyaringu alatjiṯu kura nyinanytjatjanu. Palu Noah-nya Godaku mulamularingkunyangka Godalu palunya walytjanmaṟa wangkangu, “Mulapa nyuntu ngayula miṟangka tjukaṟuru ngaṟanyi.”

8 Ka panya Aipuṟamanya Godaku mulamularingkula parari anu ngura ngurpatjakutu. Panya Godalu ngura palumpa wantikatira ankunytjaku alatji wangkara kalkuṉu, “Ngayuluṉa ngura kutjupa nyuntunya ungkuku.” Ka Godalu wangkanyangka paluṟu kuliṟa wangaṉara pakaṟa watarku anu munu puṯu kuliningi, “Yaaltjikutuṉa nyangatja ananyi?”

9-10 Munu paluṟu Godaku mulamularingkula malikitja puṟunypa nyinangi tiinta palyaṟa ngura panya kalkuntjitjangka wirkaṟa. Ka palumpa katja Isaacanya munu palumpa pakaḻi Jacobanya kuḻu ngura nyara palula wirkaṟa nyinangi, panya Godalu tjananya kuḻu kalkuṉu ngura nyara palula nyinanytjaku. Palu Aipuṟamanya tiintangka pukuḻpa nyinangi malikitja puṟunypa ngura panya palula panya paluṟu nintingku kuliningi, “Nyangatjaṉa unytju nyinanyi ngura nyanga mantangka, panya Godalu ngura kutjupa puḻka palyaṉu ngayuku wiṟu mulapa, kaṉa ngura nyara palumpa paṯaṟa nyinanyi. Ka ngura nyara paluṟu panya kampa kutjuparinytja wiya paluṟuṯu ngaṟaku tiṯutjara.”

11-12 Munu paluṟu Godaku mulamularingkula tjitji utinu, panya paluṟu wati tjiḻpi ka palumpa miita Tjiiṟanya minyma pampa iṯi puṯu kanyilpai. Palu panya Godalu kalkuṉu tjitjiku, ka Aipuṟamanya mulamularingu palumpa panya paluṟu tjukaṟurungku wangkapai. Uwa, Aipuṟamanya panya wati tjiḻpi nyinangi tjitji puṯu utilpai, palu palula kutjunguṟuya walytjapiti mungilyiringu kililpi ilkaṟitja tjuṯa puṟunypa, munu paki kuḻuny-kuḻunypa tjuṯa panya karungka ngarinytja puṟunypa, mungilyi mulapa.

13 Uwa, wati panya paluṟu tjana munu Aipuṟamanya tjana kuḻu Godaku rawa mulamularingangi tiṯutjara wiyaringkunytja wiya ilunytjakutu-wangkara. Palu panya tjana wanka nyinara mantjintja wiya Godalu panya kalkuntja. Palu tjana ngaṉmanytju kuliningi ngula utiringkunytjaku munuya puḻkaṟa pukuḻarira wangkangi, “Nganaṉa unytju akatjari mantangka nyanga nyinanyi.” 14 Ka panya tjana alatji wangkanyangka nganaṉa kulilpai, “Munta-uwa, tjana nyinara paṯaningi ngura kutjupaku.” 15 Tjinguṟu wati nyangantu ngura tjananku wantikatinytjatjanu kuliṟa watjilarima, munuya mukuringkula maḻaku wantira anama. 16 Palu wiya, paluṟu tjana ngura nyara palunya kulintja wiya panya tjana ngura kutjupaku mukuringangi ngura wiṟuku, panya ilkaṟitjaku. Ka palulanguṟu Godanya palunya Mama waḻkunnyangka tjanampa pukuḻaripai kuṉṯaringkunytja wiya, panya paluṟu tjanampa ngura puḻka mulapa palyaṉu.

17-19 Ka Aipuṟamalu Godaku mulamularingkula katja palumpa Isaacanya katingu iluntaṟa Godanya ungkunytjikitjangku. Panya Godalu palula wangkangu arkaṟa nyakunytjikitjangku wangaṉarangku kulinnyangka. Palu panya ngaṉmanytju Godalu Aipuṟamanya kalkuntjitja ngaṟangiṯu palumpa katja Isaacalanguṟu walytjapiti tjuṯaringkunytjaku. Ka nyara palulanguṟu paluṟu katja palumpa iluntankunytja kuwaripangka kuliningi, “Godalu mulapa ilunyangka wankalku.” Ka Godalu mulapaṯu ungu palumpa katja maḻakungku. Panya wati ilunyangka Godalu wankalpai, palu puṟunypa Godalu palunya nguwanpa iluntankunyangka wankaṉu.

20 Ka Isaacalu Godaku mulamularingkula katja kutjara pukuḻmanu Jacobanya pulanya Iitjunya alatji kalkuṟa, “Panya Godalu nyupalimpa wiṟu tjuṯa ngula palyalku.”

21 Ka Jacobalu Godaku mulamularingkula palu puṟunytjuṯu pukuḻmanu palumpa katja tjuṯa alatji wangkara, “Panya Godalu nyurampa wiṟu tjuṯa ngula palyalku.” Alatji paluṟu ngaṉmanytju wangkangu maḻangka ilunytjikitjangku. Munu paluṟu patany-patanytju ngaṟala tjukaratjarangku waḻkuningi Godanya.

22 Ka Josephalu Godaku mulamularingkula nintingku kuliningi panya Israelkunu tjuṯangku ngula ngura Itjipanya wantikatiku. Munu tjiḻpiringkula paluṟu palumpa walytja tjuṯangka utingku wangkangu nguwanpa ilura palunya tarka ngula katinytjaku Itjipalanguṟu Israeltakutu.

23 Ka Moseku ngunytjungku mamangku Godaku mulamularingkula palunya kutitjunu piṟa maṉkurpa iṯi wirkankunyangka. Panya Itjipaku mayatjangku Piiṟalu palumpa tjaultji tjuṯangka wangkangu iṯi nyiṯayira tjuṯa iluntankunytjaku. Palu mamangku ngunytjungku pula nguḻuringkuwiyangku kutitjunu iṯi panya palunya, panya paluṟu pula nintingku ngurkantanangi, “Iṯi nyangatja wiṟu mulapa.”

24-26 Ka ngula Mosenya puḻkaringkula paluṟu kuḻu Godaku mulamularingkula Mayatja Piiṟaku ngura wantikatira palumpa walytja tjuṯakutu anu. Panya paluṟu alatji kuliningi, “Tjinguṟuṉa Piiṟaku walytja tjuṯangka tjungu rawaṯu nyinarampa ngayulu Godaku watarkurira kura tjuṯa unytjungku kutju pukuḻarira palyanma. Palu ngayulu tjananya wantikatira Godaku walytja tjuṯangka tjunguringkula pikangka alatjiṯu nyinanyi panya Itjipanya nguraṟa tjuṯangku nganaṉanya kuraṟa punganyi. Tjinguṟuṉa Itjipanya nguraṟa tjuṯangka tjungu nyinarampa kutjupa kutjupa wiṟu tjuṯa mantjinma. Palu ngayulu wantira pikawanu nyinanyi ngayuku walytja tjuṯangka tjunguringkula, panya nganaṉalanguṟu mayatja puḻka ngula utiringkuku nganampa wankaṟunkupainya.” Uwa, Mosenya nyanga alatji nyinangi panya paluṟu piṟuku kutjupa munkaritja kuliningi ngula Godalu kalkuntjatjanungku ungkunytjaku.

27 Munu piṟuku Godaku mulamularingkula Moselu ngura Itjipanya wantikatingu. Panya paluṟu nguḻuringkunytja wiya Mayatja Piiṟanya palumpa mirpaṉarinyangka. Paluṟu tungun-tunguntu waṉaningi Godanya uti nyakula puṟunytju. Palu kuṟungku nyakunytja wiya unngu kutju mulamularingangi.

28 Munu Godaku mulamularingkula Moselu wangkangu aṉangu tjuṯangka kukaku milkaḻingka waḻi tjananku tuwa uṟilitja nyiṯintjaku angeltu pitjala nyakula katuwanu ankunytjaku tjanampa katja ngaṉmanyitja tjuṯa iluntankunytjaku-tawara. Nyara palula aṟangka paluṟu palyaṉu inmangka tjunguringkula angelpa katuwanu ankunytjanya rawangku kulintjaku.

29 Kaya Godaku mulamularingkula Mosenya tjana aṉangu tjuṯa kuḻu ngura uṟu ini Tjitin-tjitinta nguṟurwanu itipiringu manta piḻṯingka. Kaya wati panya Itjipanya nguraṟa tjuṯangku tjananya maḻawanungku waṯaparaṟa uṟungka nguṟurpaṯu ilungu uṟungku maḻakungku tjananya tjutunnyangka.

30 Ka Tjatjuwanya tjana Israelkunu tjuṯa kuḻu Godaku mulamularingu munuya Godalu wangkanyangka wangaṉarangku kuliṟa tawunu panya Jerichola tjiṉṯu 7-aṟa para-arintanangi, ka wall panya puḻka para-arintaṟa ngaṟanytja piḻukatingu.

31 Ka minyma panya wati tjuṯangka kampangkaṯu ngaripainya ini Rayapanya Godaku mulamularingkula wankaringu. Panya piḻukatinytja kuwaripangka Tjatjuwalu wati kutjara iyaṉu Jerichola tjarpara kampangkaṯu para-nyakula maḻaku pitjala tjakultjunkunytjaku. Ka pula Jerichola wirkankunyangka, Rayapalu palunya pulanya Jerichonya nguraṟa tjuṯaku nguḻungku mantjiṟa kutitjunu palumpa ngurangka iluntankunytjaku-tawara. Nyara palulanguṟu paluṟu wankaringu, panya maḻangkalta Israelkunu tjuṯangku Jerichonya nguraṟa kutjupa uwankara iluntanu Godanya kuliṟa wantinyangka.

32 Wanyuṉa piṟuku nyurala tjakultjunkuku aṉangu mulamularingkupai kutjupa tjuṯa? Wiya wanti, panya tjuṯa mulapa ngaṟanyi wangkara wiyantjaku wiya, panya Kitiyannga, Paṟakanya, Samsonnga, Tjaipatjanya, Davidanya, Samuelnga munu wangkatjara kutjupa tjuṯa kuḻukuḻu panya winki mulapa. 33 Wati nyanga paluṟu tjana Godaku mulamularingkula ngura walytjangku anga-kanyiningi warmaḻangku pitjala tjulyantjaku-tawara ngura kutjupitja tjuṯangku. Munuya ngura tjananku tjukaṟurungku kanyiningi aṉangu tjuṯa pukuḻpa palya nyinanytjaku. Munuya nyangangi Godalu panya kalkuntjitja tjuṯa utiringkunyangka.

Panya kutjupa tjuṯangku Godaku mulamularingkula lion tjuṯa tjaa patiningi patjantjaku-tawara. 34 Kaya tjara kutjupa Godaku mulamularingkula waṟu puḻkangka wankaṟu ngaṟangi kampanytja wiya. Kaya kutjupa tjuṯa Godaku mulamularingkula wankaringangi tjananya tjuḻangka wakaṟa iluntankunytjikitjangku aṟunnyangka. Kaya kutjupa tjuṯa upa ngaṟala Godaku mulamularingkula kuṉpuringangi. Kaya tjaultji tjuṯa Godaku mulamularingkula witulya puḻkatjararingkula warmaḻa ngura kutjupitja tjuṯa pika pitjanyangka pungkula wiyaningi. 35 Kaya minyma tjuṯangku purkutjararingkula Godaku mulamularingkula nyangu Godalu tjanampa tjitji maḻakungku wankannyangka.

Kaya tjara kutjupa Godaku mulamularingkula ilungi, panya mirpaṉtju tjuṯangkuya tjananya nguḻuningi wangkara, “Nyura Godanya wantinyangkala nyuranya walatjunkuku iluntankunytja wiyangku.” Kaya kuliningi, “Wiya, nganaṉa Godanya wantinytja wiya. Palyantilanyaya nganaṉanya pungkula iluntanama panya Godalu nganaṉanya wankalku palula tjungu wanka mulapa tiṯutjara nyinanytjaku.” Alatjiya kuliningi, kaya mirpaṉtju tjuṯangku tjananya puṯu nguḻutjingaṟa pungkula iluntanangi. 36 Munuya mirpaṉtju tjuṯangku Godaku walytja kutjupa tjuṯa ananingi, munuya wiipangka alkaningi, munuya kutjupa tjuṯa tjiinangka karpiṟa tjailangka tjarpatjuṟa kanyiningi. 37-38 Munuya kutjupa tjuṯa puḻingka atuṟa iluntanangi, munu kutjupa tjuṯa wanka winki kultu kaṟilpa kaṯaṟa kutjaranangi, munuya kutjupa tjuṯa wakaṟa iluntanangi tjuḻa puḻkangka.

Kaya tjara kutjupangku tjiipiku nanikutaku miṟinguṟu ulytja palyaṟa tjarpangi munuya ngaḻṯutjara tjuṯa puṟunypa para-ngaṟangi mani wiya mai wiya paḻtjatjiratja alatjiṯu. Kaya aṉangu tjuṯangku tjananya nyakula analpai munu kuraṟa pungkupai. Panya tjanaya mantatjaku mukuringkula puṯu ngurkantanangi palya mulapa nyinanyangka. Kaya tjana ilytjingka waara para-ngaṟangi pilangka puḻi katu kuḻukuḻu. Munuya kuḻpingka piṯingka kuḻu nyarkaṟa nyinangi.

39-40 Ka Godanya puḻkaṟa pukuḻaringi aṉangu nyanga palumpa tjanampa, panya tjanaya palumpa puḻkaṟa mulamularingangi. Palu panya Godalu kalkuntja tjana nyakunytja wiyaṯu munuya ngaṉmanypaṯu ilungi palumpa mulamularingkula kutju. Panya Godalu ngaṉmanytju nganampa palyaṟa wantingu wiṟu mulapa. Panya paluṟu mukuringangi nganaṉanya tjanala tjunguṟa wiṟuṟa palyaṟunguṟa kanyintjikitja palumpa mulamularingkupai uwankara.