1-2 Ka panya manta ngaṉmanypa kurakura ngaṟanytjanya Godalu piṟuku palyalku wiṟu ngaṟanytjaku, ka ilytjingka inuntji tjuṯa pakalku ka wiṟu mulapa ngaṟaku, panya puḻi ini Lipanannga pula Kaamulnga munu wimaṟu ini Tjaṟannga wiṟu mulapa ngaṟapai, palu puṟunypa. Kaya uwankarangku nyakula Mayatjanya kulilku, “Awari! Mayatjalu wiṟu mulapa palyaṉu.”

3-4 Ka nyura uti aṉangu kutjupa tjuṯa uparingkula nyinanyangka nyakula aṯunymanama. Tjinguṟuya maṟa waḻpa-waḻparingkula muṯi tjititingkula paku puḻkaringu munuya nguḻu-nguḻu nyinanyi puṯu kuliṟa, ka nyura uti palunya tjananya wangkara kuṉpunma alatji wangkara, “Nguḻuringkunytja wiyaya rapa nyinama, panya Godanya kuwari pitjanyi nyuranya warmaḻa tjuṯanguṟu wankaṟunkunytjikitja munu paluṟu tjananya ngapartji pungkuku.” Alatji tjananya wangkara kuṉpunma. 5 Ka nyara palulanguṟu kuṟutjara tjuṯangku piṟuku nyakuku kaya pina pati tjuṯangku kulilku. 6-7 Kaya nyumpu tjuṯa tarka kuṉpuringkula pakaṟa para-waṟarakatiku puḻkaṟa pukuḻarira. Kaya puṯu wangkapai tjuṯa wangkapairingkuku munuya pukuḻṯu mirara wangkaku.

Ka ilytjingka manta unngunguṟu mina tjuṯa pakalku munu karu tjuṯangka uṟu puḻka ukalingkula pilangka tjintjiṟa puḻka tjuṯa palyalku, panya ngaṉmanypa pila kutju ngaringi kuḻi puḻkangka ukiṟi wiya, ka aṉangu puṯu paḻtjulpai manta panya waṟu puḻka ngaṟanyangka, ka papa inuṟa tjuṯa kutju ngura nyara palula para-ngaṟapai. Palu kuwari manta nyara piḻṯingka uṟu puḻka rawa ukalingkula tjintjiṟa tjuṯangka ngariku, ka ukiṟi puḻka pakalku tjuṉa-tjuṉa tjuṯa kuḻu.