Tjukurpa Niyamayanyatjara
Nehemiah
Nyangatja Ngaṉmanytju Nyakula Wangkanytjaku
Nyangatja Godaku tjukurpa munu tjukurpa nyanga paluṟu tjakultjunanyi wati ini Niyamayalu ngura Jerusalemala waḻi piṟuku palyantja. Panya ngaṉmanytju mulatuya wati Jew wiya tjuṯangku ngura Papilantanguṟu warmaḻa pitjala waḻi Jerusalemanya uwankara piḻuntankula wiyaṉu munuya aṉangu Jew tjuṯa pungkula tjuṯa mulapa iluntanu munuya tjara kutjupa ngura pararikutu katingu palumpa tjanampa ngurakutu, Niyamayaku tjamu kuḻu.
Ka ngula mulapa yiya tjuṯa ngaṟala wiyaringkunyangka Niyamayanya iṯi ngaringu ngura nyara Papilanta munu paluṟu puḻkaringkula Papilanku mayatja puḻkaku waṟkaripai nyinangi. Munu paluṟu Godala rawangku tjapiningi palunya Jerusalemalakutu iyantjaku. Ka mulapaṯu Papilanku mayatjangku palunya wituṟa iyaṉu waḻi panya Jerusalemanya piṟuku palyantjaku.
Wati panya paluṟu wiṟu mulapa munu ngura nyara Jerusalemala aṉangu tjuṯa mayatjarira nintingku kanyiningi munu paluṟu tjanala tjungu wiṟuṟa waṟkaripai. Ka tjana ngaṟala waḻingka waṟkarinyangka tjanampa mirpaṉtju tjuṯa tjanalakutu rawa pitjangi munuya tjananya rawangku pikaringkula kuraningi. Palu tjananya Godalu aṯunytju kanyiningi. Ka ngula paluṟu tjana waḻi palyaṟa wiyaringkula Godanya pukuḻarira puḻkaṟa waḻkuṉu. Ka wati tjukurtjarangku Godaku tjukurpa tjanala nyakula wangkangi nyiringuṟu.
[Tjukurpa nyanga paluṟu mutumutuntja ngaṟanyi, uwankara wiya. Palu ngulaya tjukurpa winki palyalku.]
Tjukurpa nyanganpa ngarinyi:
1:1—2:10 Niyamayanya tjana Jerusalemalakutu ankunytja
2:11—7:3 Niyamayalu tjana wall-pa puḻka Jerusalemala para-arintaṟa ngarinytja piṟuku palyantja
7:4-73 Aṉangu nyanga tjana Papilaniyalanguṟu pitjanytja Israeltakutu
8:1—10:39 Tjukurtjara ini Itjuṟalu Godaku tjukurpa aṉangu tjuṯangka nyakula wangkanytja
11:1—13:31 Tjukurpa kutjupa kutjupa tjuṯa Niyamayalu walkatjunkunytja
1
1-2 Uwa, ngayulu wati ini Niyamayanya munuṉa kuwari nyiri nyangangka tjakultjunanyi ngayulu palyantjatjanungku. Panya ngayulu ngaṉmanypa nyinangi ngura kutjupangka tawunu ini Tjuutjala, ka nyara palula-aṟangka wati ini Tjuukitjinya mayatja puḻka nyinangi ngura winkiku Israelku kuḻu, panya paluṟu ngura tjuṯa mulapa tjunguṟa mayatjangku kanyiningi ini Puutjanya. Ka ngayulu mayatja panya palumpa waṟkaripai nyinangi.
Ka kutjupa-aṟa ngayulu ngura nyara Tjuutjala nyinanyangka ngayuku kuṯa Jerusalemalanguṟu maḻpa tjuṯatjara pitjangu. Kaṉa palunya nyakula puḻkaṟa pukuḻaringu munuṉa tjanala tjapinu, “Ngurangkampaya uwankara palya nyinanyi? Ka waḻi panya Jerusalemanya palya ngaṟanyi?”
3 Kaya wangkangu, “Wiya, nganampa walytja tjuṯaya tjituṟu-tjituṟu puḻka nyinanyi panya tjanampa tuṟapula puḻka rawa ngaṟanyi. Kaya nganaṉanya ngura ititja tjuṯanguṟu kuraṟa pungkupai. Ka wall-pa panya puḻka Jerusalemala kaṯalypaṯu ngaṟanyi munu kaita tjuṯa kuḻu waṟungku kampanytja ngaṟanyi, ka uwankara palyantja wiyaṯu kuwaripaṯu ngaṟanyi.”
4 Ka ngayulu nyangatja kuliṟa puḻkaṟa ulangi tjituṟu-tjituṟurira. Munuṉa tjiṉṯu tjuṯa mai ngalkuwiya nyinara Godala rawangku tjapiningi aṉangu Jew tjuṯaku. Alatjiṉa tjapiningi,
5-11 “Mayatja God ilkaṟitja! Nyuntu panyan mayatja puḻka mulapa nyinanyi, kaya aṉangu uwankara nyuntumpa puḻkaṟa nguḻuringkupai. Ka panya aṉangu tjuṯangku nyuntumpa puḻkaṟa mukuringkula nyuntumpa tjukurpa wangaṉarangku kulinnyangka nyuntu tjanampa ngaṉmanytju kalkuntjatjanungku palyalpai alatjiṯu wantinytja wiyangku. Katju kuwari ngaḻṯuringama, munuṉi nyuntula tjapinnyangka kulinma. Panya nganaṉa Jew uwankarangku nyuntula puḻkaṟa tungunpungkula tjukurpa panya nyuntu Mosenya ungkunytjitja kuliṟa wantingu. Ka panyan Mosenya wangkara kalkuṉu alatji, ‘Aṉangu nyanga ngayuku walytja tjuṯa ngayula rawa tungunpungkunyangkaṉa tjananya ngura walytjanguṟu paiṟa iyalku, kaya ankula wiyaringkuku ngura malikitja tjuṯakutu.’ Palu panya nyuntun kutjupa kuḻu kalkuṉu alatji, ‘Palu tjana tjinguṟu ngura pararinguṟu piiwiyaringkula ngayunya piṟuku kuliṟa wangaṉararingkunyangkaṉa tjananya maḻakungku katiku ngura walytjakutu ngayunya piṟuku waḻkuntjaku.’ Alatji panyan Mosenya wangkara kalkuṉu. Kala kuwari nyanga nyuntula puḻkaṟa tjapini nganaṉanya ngura walytjakutu maḻakungku katinytjaku. Ka wanyu ngayulu mayatja nyara Tjuukitjila kuwari waṟkarinyangkampa palunya kulintja kampa kutjupanama wangaṉararingkula ngayula kulintjaku.”
Alatjiṉa Godala tjapiningi.