40
1 Mayatja God, ngayuluṉa purkaṟa paṯalpai nyuntu alpamilantjaku,
Kaṉin nyuntu ulara tjapinnyangka kulilpai alatjiṯu.
2 Ngayuluṉa tjuḻpirpangka kaṟalukatingu ngaṯi puḻkangka mununa puṯu pakaṟa nguwanpa ilungu,
kaṉi nyuntu mantjiṟa apu waḻungka tjunu wankaṟu rapa ngaṟanytjaku.
3 Munuṉin nyuntu inma kuwaritja nintinu inkara nyuntunya waḻkuntjaku.
Kaya aṉangu tjuṯangku nyuntu palyantja nyakula kulilku, “Munta-uwa, mulapa Godanya witulya puḻka nyinanyi.”
Munuya palulanguṟu nyuntumpa mulamularingkuku.
4 Mayatja God, aṉangu panya nyuntumpa mulamularingkupai pukuḻpa mulapa nyinaku.
Aṉangu nyanga palu puṟunypa panya kaṉany-kaṉanypa nyinapai tjuṯangka puṯu tjunguringkupai.
Munu palumpa tjanampa god ngalypa-ngalypa tjuṯa tjunguringkula waḻkulpai wiya.
5 Mayatja God, nyuntu puḻka mulapa nganampa palyaṉu kutjupa kutjupa wiṟu tjuṯa.
Ka nyanga palu puṟunypa kutjupangku puṯu alatjiṯu palyalpai.
Ka panyan piṟuku wiṟu tjuṯa palyantjikitjangku kalkuṉu.
Uwa nyuntu palyantja winki mulapa ngaṟanyi,
kaṉa puṯu nguwanpa uwankara tjakultjunkuku nyuntu panya palyantjitja tjuṯa.
6 Tjinguṟuṉa puluka munu tjiipi ngalya-katira pungkula tiliwakaṟa nyuntunya ungama ngayuku kalyparingkunytjaku,
palu nyuntu mukuringkunytja wiya ngayulu nyanga alatji palyantjaku.
Panya nyuntu ngayunya pina palyaṉu nyuntunya wangaṉarangku kulintjaku.
7 Kaṉa nyuntula wangkangu, “Nyangatjaṉa ngayulu pitjangu,
panya iriti nyuntu nyiri miḻmiḻṯa walkatjunu tjukurpa ngayunyatjara.
8 Uwa Mayatja God, ngayuluṉatju puḻkaṟa pukuḻaripai nyuntu mukuringkunytjitja tjuṯa palyantjikitja,
panya ngayuluṉa nyuntumpa tjukurpa kurunpa winkingku tiṯutjarangku kulilpai.”
9 Ka panya nyuntumpa walytja tjuṯa nyuntunya waḻkuntjikitja tjunguringangi,
kaṉa tjanala tjakultjunangi panya nyuntu palyantja uwankara tjukaṟuru alatjiṯu.
Nyuntu ninti Mayatja, panya ngayulu nyuntunyatjara rawangku wangkapai wantinytja wiyangku.
10 Ngayuluṉa aṉangu tjuṯangka tjakultjunangi panya nyuntu ngayunya mulapa alatjiṯu wankaṟunu.
Alatjiṉa tjanala wangkangi, “Nganampa mayatjangku nganaṉanya ngaḻṯunytjungku kanyilpai tiṯutjarangku.
Panya paluṟu kalkuntjatjanungku palyalpai alatjiṯu.”
11 Mayatja God, wanyutju tiṯutjara ngaḻṯunytju ngaṟama.
Munuṉi wankaṟu kanyinma panya nyuntun tiṯutjarangku mukulyangku aṯunymankupai,
munu panyan kalkuntjatjanungku palyalpai alatjiṯu.
12 Kura winki mulapa nyangatja ngayula utiringanyi munuṉi puuntananyi.
Kaṉa puṯu alatjiṯu kulini.
Ngayuluṉa kura tjuṯa mulapa palyaṉu, munuṉa kuwari puṯu nyanganyi iwara palyangka ankunytjikitjangku.
Kuwariṉa uparingkula rapa ngaṟanytja wiyaringu.
13 Mayatja God, wanyuṉitju warpungkula pitjala ngayunya alpamilala wankaṟu nyinanytjaku.
14 Aṉangu tjuṯangkuya ngayunya iluntankunytjikitjangku kulini,
ka mayatja, wanyu tjananya painma kaya kuṉṯaringkula anama alatjiṯu.
15 Paluṟu tjana panya ngayunya kuraṟa pungangi munu ananingi.
Ka wanyu mayatja, tjananya puḻkaṟa painma,
kaya kuṉṯaringkula wangkama, “Munta, kurangkula palunya kuraṟa pungangi.”
16 Kuwariṉa nyuntula tjapini aṉangu panya nyuntunya waḻkulpai tjuṯaku,
paluṟu tjana nyuntumpa puḻkaṟa pukuḻarinytjaku,
panya nyuntun palunya tjananya wankaṟunkunytjanguṟu.
Wankaṟunkunytja nyara palulanguṟu tjana uti tiṯutjarangku mirawaṉira alatji wangkama, “Mayatja Godanya puḻka mulapa.”
17 Ngayulu ngaḻṯutjara,
munuṉa kurunpa uparingu.
Palu Mayatja God, wanyuṉitju tiṯutjarangku kulinma,
munuṉin wankaṟuṟa aṯunymaṟa mukulyangku kanyinma.
Wanyuṉitju warpungkula pitjala alpamilala!