4
Godanya Waḻkuntja Ngura Ilkaṟitjangka
1 Palunyatjanungkuṉa piṟuku nyangu nyara tuwa aḻaringu ilkaṟingka. Ka wangka puḻkaṟa wangkangu ilkaṟinguṟu tuṟampata puṟunypa, panya ngayulaṉi ngaṉmanytju wangkangu Jesulu, panya paluṟu. Munuṉi paluṟu aḻṯira wangkangu alatji, “Ngalya-pitja ngayulakutu munuṉi ilangku nyakula kulila, kaṉanta nintila nyaaringkuku ngula nyanganguṟu nyanga palula maḻangka.”
2 Kaṉi Kurunpa Miḻmiḻṯu ngayunya mapalku katingu ilkaṟikutu, kaṉa nyangu tjiya wiṟu panya mayatja puḻka nyinapai ilkaṟingka ngaṟanyangka. Ka tjiya nyara palula kutjupa nyinangi. 3 Ka palumpa pitalytjingku irnyaningi puḻi kala wiṟutjara puṟunytju. Ka tjiya panya wiṟungka tjuṯiṟangu puṟunypa para-arintaṟa ngaṟangi kala puḻi ukiṟi-ukiṟi wiṟutjara palu puṟunypa.
4 Ka tjiya wiṟu kutjupa tjuṯa ngaṟangi panya mayatja puḻka kutjupa tjuṯa nyinapai palu puṟunypaṯu, ka tjiya nampa nyangatja 24 para-nyinara arintaṟa waṉaningi, ka tjiya palumpa nguṟurpa ngaṟangi. Ka tjiya nyara palula tjanala nyinangi tjiḻpi tjuṯa. Paluṟu tjana mantara piṟantjara nyinangi munuya katangka puṯuru puṟunypa kanyiningi, puṯuru panya mayatjangku kanyilpai gold-nguṟu palyantja, palu puṟunypa.
5 Ka tjiya panya nguṟuritjanguṟu pinpangi wanangaṟa tuu winki. Ka tjiya nyara palula kuranyu waṟu tjangi 7 ngaṟala kampangi nyara paluṟu tjana Godaku kurunpa 7. 6 Munu tjiya palula kuranyu uṟu puḻka kaḻṯaṟa puṟunypa ngaringi kalawatja puṟunypa wiṟu mulapa.
Ka nguṟurpa kuka nyaḻpitjara kutjara kutjara ngaṟangi tjiya palula itingka. Nyara paluṟu tjana kuṟu kutjara wiya, kuṟu tjuṯa mulartjara piḻpirta munu tjaṉangka kuḻu. 7 Munuya tiṯutiṯu ngaṟangi, kutjupa lion puṟunypa, kutjupa puluka puṟunypa, munu kutjupa yunpa aṉangu puṟunypa, ka kutjupa waḻawuru puṟunypa nyaḻpi lipiringkula ankupaitjara ngaṟangi. 8 Palu tjana nyaḻpi kutjara wiya nyaḻpi maṉkur-maṉkurtjara ngaṟangi, ka kuṟu panya tjuṯa mulapa aṉangungka winki alatjiṯu ngaṟangi, nyaḻpingka unngu kuḻu tjuṯa mulapa. Kuka nyara paluṟu tjana rawangku tjiṉṯu tjuṯangka munga tjuṯangka kuḻu inma inkara waḻkuningi alatji wangkara,
“Mayatja Godanya miḻmiḻpa alatjiṯu, witulya puḻka mulapa uwankarangka waintarinytja tiṯutjara nyinanyi.
Paluṟu kuwaripatjara nyinanytjanya, munu kuwari paluṟuṯu nyinanyi, munu ngula pitjaku paluṟuṯu panya kuwaripatjara nyinanytjanya.”
9-10 Nyara paluṟu tjana rawangku tjuṯa-aṟangku inma inkara palunya waḻkulpai nyara tjiya wiṟungka wanka tiṯutjara nyinanytjanya, munuya palunya wiṟunmankupai palumpa pukuḻarira. Ka paluṟu tjana inma tjaatarira inkanyangka tjiḻpi panya tjuṯa waṯungaṟakatipai tjiya panya palula kuranyu munuya pala palunya waḻkulpai. Munuya palulanguṟu puṯuru panya mayatjaku tjananku kanyiṟa mantjiṟa tjunkupai tjiya panya palula kuranyu munuya paluṟu tjana wangkapai nyanga alatji,
11 “Nyuntun nganampa Mayatja Godanya nyinanyi mayatja wiṟu mulapa,
ka nyuntunya uwankarangku rawangku waḻkuntjaku ngaṟanyi witulya pitalytji puḻkanya.
Panya nyuntu uwankara witulyangku paluṉu.
Munun nyuntu mukuringkula kuwaripatjara tjananya uwankara paluṟa tjunu mantatja tjuṯa munu ilkaṟitja tjuṯa kuḻu tjana wanka nyinanytjaku.”
Uwa, alatjiya palunya wangkara waḻkuningi tjiḻpi panya tjuṯangku.