18
Tawunu Puḻka Papilannga Piḻukatinytja
1 Nyanga palula maḻangkaṉa piṟuku nyangu angelpa kutjupa ukalingkunyangka ilkaṟinguṟu. Ka angelpa nyanga paluṟu mayatja puḻka ngaṟangi witulya puḻka mulapa. Munu paluṟu tili pitalytji puḻkangku pitjala manta winki alatjiṯu irnyaningi. 2 Munu wirkaṟa paluṟu puḻkaṟa mirara wangkangu,
“Tawunu panya Papilannga tjuṯangku mirawaṉipai, palu nyara paluṟu kuwari punkaṟa piḻukatingu, munu aṉangu tjuṯa kuḻu wiyaringu ngura palula nyinanytja tjuṯa. Ka aṉangu tjuṯa wiya ngaṟanyangka ngura nyara palula mamu tjuṯa kutju nyinanyi munu tjuḻpu kurakura tjuṯa kuḻu maḻaringkula nyinara waṉinyi.
3 Panya aṉangu tjuṯa kura mulapa nyinangi ngura pala palula, kura tjuṯa kutju kulilpai. Munuya aṉangu kutjupa tjuṯa ngura winkinguṟu pitjanytjaku aḻṯingi tjanala tjunguringkula kuraringkunytjaku, kaya aḻṯinyangka mulapaṯu tjuṯa pitjala tjanala tjunguringkula uwankara kuraringu munuya Godaku watarkurira palunya kulintja wiyaringu.
Kaya mayatja puḻka tjuṯa kuḻu ngura tjuṯanguṟu pitjala tjanala tjunguringkula palu puṟunypaṯu kuraringangi.
Kaya kutjupa tjuṯa ngura tjuṯanguṟu kuḻu pitjangu kutjupa kutjupa tjuṯa tjanala tjalamilantjikitja manikitjangku, munuya tjalamilaṟa mani puḻkatjararingu. Panya tawunu nyara palunya nguraṟa tjuṯa kutjupa kutjupa tjuṯaku puḻkaṟa mukuringkupai kurunpa winki, munuya palunya tjananya kutju kuliṟa puḻka mulapa payamilalpai.”
Alatji angelpa nyara paluṟu ngayula wangkangi.
4 Kaṉa piṟuku kulinu wangka kutjupa ilkaṟinguṟu wangkanyangka nyanga alatji,
“Ngayuku walytja tjuṯa, tawunu palatjaya wantikati munuya ngalya-pakala. Nyura tjinguṟu tjanala tjungu rawa nyinara tjanala aaṉarira kura kutju kulilpairingkuku. Ngayulu kuwari tjananya pika puḻka ungkuku, kaya tawunu palatja wantikati nyura kuḻu pika urantjaku-tawara.
5 Panya tawunu pala palulaya tiṯutjarangku kura puḻka mulapa palyalpai nyinanyi. Ka Godalu nyakula palunya tjananya pungkunytjikitjangku kulini kura puḻka rawangku palyannyangka.
6 Kuwari palunya tjananya ngapartji pungkunytjaku ngaṟanyi panya nyuranya pungkunytjanguṟu. Tjana panya nyuranya rawangku pungangi, ka kuwari palunya tjananya ngapartji puḻkaṟa mulapa pungkunytjaku ngaṟanyi.
7 Panya tawunu pala palula nyinanytja tjuṯangkuyanku walytjangku mirawaṉipai. Nyara paluṟu tjana ulytja puḻkatjara nyinanyi munuya mani puḻka kuḻu kanyini. Ka tjananya ngapartji uwankara pika puḻka puḻkaṟa pungkunytjaku ngaṟanyi.
Panya tawunu nyara palula nyinanytja tjuṯangkuya wangkapai, ‘Nganaṉalanku minyma mayatja puḻka puṟunypa nyinanyi wiṟu mulapa. Munu nganaṉa wanakaḻarinytja puṟunypa wiya nganaṉa pukuḻpa tiṯutjara nyinaku.’ Alatjiyanku tawunu nyara palumpa tjanampa ngura wangkara mirawaṉingi.
8 Palu nyanga tjana alatji kaṉany-kaṉanytju mirawaṉinyangka Godalu tjananya mapalku pungkuku pika puḻka tjana watarku nyinanyangka. Kaya puḻkaṟa pikatjararingkuku, munuya ilunyangka puḻkaṟa tjituṟu-tjituṟuriku, ka ailuru puḻka kuḻu ngaṟaku ngura pala palula. Panya tawunu nyara palunya Godalu tililku waṟu puḻkangka, ka kampara uwankara wiyalku. Panya Godanya mayatja puḻka nyinanyi munu paluṟu tjukaṟurungku ngurkantaṟa ngura palunya waṟungka tililku, ka tjananya kampaku uwankara.”
Alatji wangka kutjupa ilkaṟinguṟu wangkangi.
9 Ka mulapa tawunu paluṟu kampanyangka puyu puḻka pakalku, kaya mayatja puḻka tjuṯangku ngura uwankaranguṟu nyakula puḻkaṟa tjituṟu-tjituṟurira ulaku. Panya paluṟu tjana aṉangu ngura palunya nguraṟa tjuṯangka pukuḻpa tjunguringkupai. Munuya palulanguṟu nyakula puḻkaṟa ulaku Godalu tjananya uwankara tiliṟa wiyannyangka. 10 Paṯunguṟuya ngaṟala nguḻungku nyakuku Godalu tjananya kuḻu tjungu tilintjaku-tawara. Munu nyara paluṟu tjana ngaṟala ruuru kuliṟa wangkaku,
“Ai, ngaḻṯutjara tjuṯa. Tawunu nyara palula nyinapai tjuṯa kuwari uwankara wiyaringu. Tawunu paluṟu puḻka mulapa ngaṟangi panya aṉangu tjuṯangku palunya mirawaṉipai. Ka Godalu kuwari tiliṟa mapalku uwankara wiyaṉu.”
11 Kaya wati tjalamilalpai tjuṯa kuḻukuḻu uwankara ulaku tawunu nyara palumpa, panya tjanala payamilalpai tjuṯa ilunyangka. 12 Munuya puṯu kulilku,
“Nganalulampa payamilalku gold, tjiilpa, upula, apu kutjupa kutjupa wiṟu tjuṯa? Nganalulampa payamilalku mantara kala wiṟu tjuṯatjara munu puṉu kutjupa kutjupa paṉṯi wiṟutjara tjuṯa? Nganalulampa kutjupa kutjupa wiṟu palyantja tjuṯa payamilalku apunguṟu ayananguṟu palyantja tjuṯa. Alatjiṯu nyaranpa kampara wiyaṉu aṉangu winki, ka uwankara wiyaringu kutjupa nyinanytja wiya.
13 Ka nganalu payamilalku wiṟu paṉṯipai tjuṯa nyanga nganampa, munu waina, uwila, mai uḻu, wiita, puluka, tjiipi, nyanytju, wakina uwankara nyanga nganaṉa kanyintja tjuṯa? Munu nyanga aṉangu nganampa waṟkaripai tjuṯa nganalu payamilalku? Alatjiṯu payamilalpai tjuṯa wiyaringu waṟungku kampara uwankara wiyannyangka.”
Alatjiya ngaṟala wangkangi wiṟu tjuṯa tjalamilalpai tjuṯangku ruuru kuliṟa. 14 Munuya piṟuku wangkaku,
“Papilan! Alatjiṯu panya nyuntu wiṟu tjuṯa kanyiningi ka kuwari uwankara wiyaringu, mani, kutjupa kutjupa wiṟu tjuṯa kuḻu. Kan nyara palu puṟunypa tjuṯa nyuntu ngula kanyintja wiya ngaṟaku piṟuku.”
15 Alatjiya wangkaku tjalamilalpai tjuṯangku panya paluṟu tjana tawunu nyara palula tjarpara kutjupa kutjupa tjuṯa tjalamilalpai munuya mani puḻkatjararingkupai. Nyara paluṟu tjana paṯu ngaṟaku nguḻu Godalu palunya tjananya tjungu tilintjaku-tawara. 16 Munuya ulara wangkaku,
“Ai, ngaḻṯutjara tjuṯa. Tawunu nyara palula nyinapai tjuṯa uwankara wiyaringu munu tjana kutjupa kutjupa wiṟu tjuṯa kanyintja kuḻu wiyaringu. Panya paluṟu tjana mantara wiṟu tjuṯangka tjarpapai kala wiṟu tjuṯatjarangka, munuya liringka tjunkupai, manyirkangka tjarpatjura kanyilpai wiṟu tjuṯa gold-nguṟu upulanguṟu kuḻu palyantja. 17 Uwankara nyara paluṟu tjana kanyintja tjuṯa kuwariṯu wiyaringu.”
Ka palu puṟunypaṯu pautangka ankupai tjuṯangkuya paṯu ngaṟala nyakuku tawunu panya kampanyangka. 18 Panya pautaku mayatja tjuṯa, pauta katipai tjuṯa, munu tjanala tjungu pautangka ankupai tjuṯa, nyara paluṟu tjana puyu puḻka pakannyangka nyakula mirara wangkaku, “Tawunu nyaratja puḻka mulapa ngaṟangi, ka kutjupa palu puṟunypa ngaṟanytja wiya ngaṟaku.”
19 Munuya nyakula tjuni kuraringkula mantangka tjuṉpangka katanguṟu tjarpangu puḻkaṟa tjituṟu-tjituṟurira. Munuya ulara wangkaku,
“Ngaḻṯutjara tjuṯa, tjananya tawunu nyarangka nyinapai tjuṯa uwankara wiyaṉu. Tjananya panya mirawaṉipai aṉangu tjuṯangku ngura uwankaranguṟu. Ka panya pautatjara tjuṯangku kutjupa kutjupa tjuṯa katira tjanala tjalamilalpai munuya mani puḻkatjararingkupai. Ka kuwari tjana kutjupa kutjupa wiṟu tjuṯa kanyintja wiyaringu munuya uwankara maṟalaringu.
20 Kaya kuwari uwankara pukuḻari ilkaṟingka nyinanytja tjuṯa ngura nyara paluṟu wiyaringkunyangka. Pukuḻariya Godaku walytja tjuṯa Godaku wangkatjara tjuṯa kuḻu munu Jesulu iyantja tjuṯa kuḻukuḻu uwankara. Panya Godalu ngura nyara palula nyinanytja tjuṯa uwankara iluntaṟa wiyalku ngapartji nyuralanguṟu.”
Alatjiya wangkangi pautangka ankupai tjuṯangku.
21 Ka palulanguṟu angelpa kuṉpu puḻkangku apu puḻka mulapa katuṟa uṟu puḻkangka aṉṯa-waṉingu. Munu alatji wangkangu,
“Apu nyangatjaṉa waṉira uṟungka tjarpatjunu ka wiyaringu. Ka palu puṟunypa tawunu Papilannga wiyaringkuku, ka nyura puṯu nyakuku. 22 Aṉangu kita wangkatjingalpai tjuṯa munu tuṟampata puuṟa wangkatjingalpai tjuṯa, inma wiṟuṟa inkapai tjuṯa kuḻu uwankara wiyaringkuku ngura nyara palula. Munuya kutjupa kutjupa tjuṯangka waṟkaripai tjuṯa, mai uṉinypa runyuṟa waṉalpai tjuṯa, nyanga paluṟu tjana uwankara wiyaringkuku. 23 Munuya tawunu nyara palula piṟuku lampa tilintja wiya ngaṟaku, munuya piṟuku kuri aḻṯinytja wiya nyinaku panya uwankara wiyaringkunyangka.
Tawunu nyara palula panya wati tjalamilalpai tjuṯa nintipuka nyinangi, ka aṉangu manta winkitjangku tjananya mirawaṉingi. Kaya tawunu palula ngangkaṟi tjuṯangku kuḻu aṉangu ngura winkitja ngunti kuraningi ayinayiningku palyaṟa, kaya nyakula kuliṟa mulamularingangi.
24 Palu panya ngura Papilanta nyinanytja tjuṯangku Godaku wangkatjara tjuṯa iluntanangi, palumpa walytja tjuṯa kuḻukuḻu, munuya aṉangu kutjupa tjuṯa kuḻukuḻu iluntanangi ngura winkingka. Ka nyanga palulanguṟu Godalu palunya tjananya ngapartji iluntaṟa uwankara wiyalku.”
Alatji angelpa kuṉpu puḻkangku wangkangu.