Tjukurpa Ruthanyatjara
Ruth
Nyangatja Ngaṉmanytju Nyakula Wangkanytjaku
Nyangatja Godaku tjukurpa minyma ini Ruthanya-tjara, panya paluṟu Jew wiya ngura kutjupangka nyinangi ini Mawapala. Ka ailuru puḻka manta Israelta ngaṟanyangka wati Jew kuritjara Mawapalakutu pitjangu. Wati panya palumpa kuri ini Nayuminya. Ka ngura nyara palula palumpa pulampa katjangku kungkawaṟa Ruthanya aḻṯingu. Palu ngula wati panya Ruthaku mingkayi wiyaringu, ka palula maḻangka Ruthanya ngapartji kutjuringu. Ka minyma panya palumpa mingkayingku Nayumilu ngura walytjakutu ankunytjikitjangku wangkangi, ka Ruthanya kuḻu mukuringu palula tjungu ankunytjikitja ngura nyara Israeltakutu Jew tjuṯangka tjunguringkula Godanya waḻkuntjikitja.
Ka ngula ngura nyara palula wati panya palumpa kuriku walytjangku palunya aḻṯingu. Munu paluṟu pula katja kutju kanyinu. Wati nyara katja paluṟu panya Mayatja Davidaku tjamu. Ka ngula mulapalta Jesunya kuḻu palumpa walytja panya maḻatja mularnguṟu utiringu. Ka tjukurpa nyangangku utini panya Godaku walytja tjuṯa Jew tjuṯa munu Jew wiya tjuṯa kuḻu nyinanyi, panya Ruthanya Jew wiya nyinara Godaku walytjaringu.
Tjukurpa nyanganpa ngarinyi:
1:1-22 Tjituṟu-tjituṟu puḻka Nayumila tjanala wirkankunytja
2:1-23 Ruthalu mai para-ngurintja
3:1—4:12 Wati kutjupangku Ruthanya aḻṯinytja
4:13-22 Nayuminya Ruthanya tjana pukuḻpa nyinanytja
1
Nayuminya Tjana Ngura Ini Mawapala Ankula Nyinanytja
1 Iriti mulapa aṉangu tjuṯa manta Israelta nyinangi. Ka tjanampa mayatja puḻka kuranyitja nyinanytja wiya ngaṟangi. Kaya walytjangku walytjangku kuliṟa nyinangi. Ka nyara palula aṟangka ngura paluṟu mai puḻkatjara ngaṟanytjatjanu ailuru puḻkaringu, ka mai uwankara wiyaringu. Kaya aṉangu panya tjuṯa paḻtjatjiratja nyinangi.
2 Ka wati ini Ilima-likanya nyinangi tawunu ini Bethlehemala panya manta ini Judah-la nguṟurpa. Wati nyanga paluṟu panya wati Ipuṟatjalanguṟu kanyintja. Munu paluṟu pula kuriṟara tjitji nyiṯayira kutjaratjara nyinangi. Ka minyma kuri ini Nayuminya. Ka tjitji katja kutjara ini Maalannga pula Tjiliyannga. Ka panya mai wiyaringkunyangka paluṟu tjana Bethlehemanya wantikatira anu ngura kakaraṟa mulapa manta panya Judah-nya ma-wantikatira. Munuya ankula manta kutjupangka nyinangi mai puḻkangka ngura ini Mawapala. 3 Munuya rawa nyinangi, ka wati panya paluṟu ngaḻṯutjara ngulalta ilungu. Ka minyma panya wanakaḻarira nyinangi katja kutjaratjara. 4 Ka pula katja panya kutjarangku puḻkaringkula kungkawaṟalta aḻṯingu Israelnga nguraṟa wiya ngura kutjupitja Mawapanya nguraṟa. Ka wati kuṯangku kungkawaṟa ini Uupanya aḻṯingu ka maḻanypangku kungkawaṟa ini Ruthanya aḻṯingu. Munuya kuriṟara kuriṟara rawa nguwanpa nyinangi ngura nyara Mawapala. 5 Munu pula palulanguṟu tjitji utilwiyaṯu wiyaringu, ngaḻṯutjara kutjara. Ka Nayuminya mingkayi kutjaratjara kutju nyinangi ngura panya palula.
Nayuminya Pula Ruthanya Bethlehemalakutu Maḻaku Ankunytja
6-13 Munu ngula paluṟu kulinu kutjupangku pitjala wangkanyangka ngura panya Bethlehemala kunyu mai puḻka pakaṉu Godalu mina iyannyangka. Ka Nayumilu kulinu, “Munta-uwa. Kuwariṉatju maḻaku ankuku ngurakutu panya.” Munu mingkayi kutjaratjara pirtji-pirtjingu ankunytjikitja. Munuya ma-pakaṉu.
Munu tjukutjuku ankula Nayumilu palumpa mingkayi kutjarangka wangkangu, “Awa! Nyupali-puṯa ngurakutu maḻaku ara mamangka ngunytjungka nyinanytjikitja, kaṉa ngayulu kutju palya ara. Munuṉa nyupalimpa Godala tjapinma nyupalinya wiṟuṟa kanyintjaku. Panya ngayunya nyupali wiṟuṟa kanyiningi ngayuku kuri katja kutjara kuḻu. Kaṉa kuwari tjapini Godala palu puṟunytjuṯu nyupalinya wiṟuṟa kanyintjaku. Munuṉa nyupalimpa tjapilku wati kuri kutjupaku aḻṯira tjitji utiṟa kanyintjaku.” Munu pulanya Nayumilu mingkayi kutjara ampuṟa mitamita kutjara nyunytjuṟa wangkara iyaṉu pula maḻaku ankunytjaku.
Ka pula puḻkaṟa ampuṟa ulangi palula tjungu ankunytjikitja, munu pula wangkangu, “Wiya, nyaakulinyan maḻakungku wituṉi? Ngali mukuringanyi nyuntula tjungu ankula nyuntumpa walytja tjuṯangka nyinanytjikitja.”
Ka Nayumilu pulala wangkangu, “Nyaaku nyupali ngayula ankunytjikitja mukuringanyi? Ngayulu minyma pamparingu munuṉa piṟuku iṯi puṯu kanyini. Ngayunya tjinguṟu watingku aḻṯira tjitji utilku, ka tjitji kutjara kuwaripa puḻkaringkula ngula mulapa watiringkuku panya nyupali kuwaripangku rawangku nyinara paṯannyangka. Palu palya nyupali maḻaku ara wati kutjupangku Mawapanya nguraṟangku aḻṯinytjaku. Mama Godalu ngayuku kuri nyupalimpa kuri kutjara kuḻu mantjinu, ka ngayulu nyupalimpa puḻkaṟa ngaḻṯuringanyi kuri wiyaringkunyangka.”
14-15 Ka pula piṟuku ulangi Nayumiku. Ka kungkawaṟa kutju ini Uupalu palumpa mingkayi mitamita kutjara nyunytjuṟa maḻaku anu ngura panya walytjakutu. Ka kungkawaṟa kutjupa ini Ruthanya palumpa mingkayiku puḻkaṟa mukuringangi palula tjungu ankunytjikitja munu palunya witiṟa ngaṟangi. Ka Nayumilu wangkangu, “Awa Rutha! Nyuntumpa kangkuṟu maḻaku anu walytja tjuṯakutu ngurangka nyinanytjikitja munu god kutjupa palumpa nyurampa nyinara kulintjikitja. Ka nyuntu kuḻu-puṯa maḻaku ara tjungu, palya?”
16-17 Ka Ruthalu wangkangu palula, “Wiya, nyaaku nyuntu ngayunya maḻaku ankunytjaku wituṉi? Ngayulu mukuringanyi nyuntu ngali tjungu ankunytjikitja. Tjinguṟu nyuntu ngura kutjupa tjuṯakutu ankunyangka ngayulu nyuntula tjunguṯu para-ngaṟama. Ngayulu pukuḻarinyi nyuntumpa walytja tjuṯangka tjungu nyinanytjikitja munuṉa ngayuku walytja tjuṯakutu maḻaku ankunytja wiyangku wantinyi. Munuṉa ngayulu mukuringanyi nyuntu puṟunytju Mayatja Godanya mulapa kulintjikitja. Ka nyuntu ngula nyinara pamparingkula ilunyangka ngayulu wantira maḻaku ankunytja wiya ngura nyara palulaṯu nyinara wiyaringanyi nyuntu wiyaringkunytjitjangkaṯu. Nayumi, ngayulu mulamulangku wangkara kalkuṉi nyuntula tjungu ankunytjikitjangku. Mulapaṉa nyuntula tjungu nyinaku nyuntu ilunytjakutu alatjiṯu.”
18 Ka Nayumilu kulinu, “Munta-uwa, Ruthanya mulapa ngayula ankunytjikitja puḻkaṟa alatjiṯu mukuringanyi.” Munu paluṟu wangka pilunarira pula tjungu anu ngura panya Bethlehemalakutu.
19 Munu pula pitjala pitjala wirkanu ngura nyara palula. Kaya aṉangu nguratja tjuṯangku minyma panya Nayuminya pula pitjanyangka nyakula puḻkaṟa mulapa pukuḻaringu uwankara. Munuya minyma tjuṯangku wangkangu, “Munta, minyma panya Nayuminyampal palatja, minyma panya pukuḻtjumpa.”
20-21 Ka Nayumilu pitjala tjanala wangkangu, “Wiya, ngayunyaṉiya Nayuminya panya ini pukuḻtju wangkawiyangku wantima. Panya ngura nyanganguṟuṉa kuri munu katja kutjaratjara ankula ma-kawalinu munu nyangaṉa kutjuringkulalta maḻaku wirkanu nyuralakutu. Mulapaṉi nyangatja Godalu tjituṟu-tjituṟu mularmanu. Kura yaaltji-yaaltjinguṟu tjananya mantjinu? Palu nyura ngayunya ini wangkawiyangku wantima munuṉiya ngayunya ini tjituṟu-tjituṟunya tjura, ini panya Maaṟanya.”
22 Nyanga alatji panya Nayuminya ngura Mawapalanguṟu pitjala wirkankunytja mingkayi nyara palunya nguraṟa kutjutjara. Minyma nyanga paluṟu pula kuḻingka pitjala wirkanu ngura pala Bethlehemala ukiṟi mai uṉinypatjara kunartjirira ngaṟala waṉannyangka paama tjuṯangka.