1 MAIN kom kotin ereki me pun o kotin mani ai likwir o kotin kupura ai kapakap, me jota kin kowei jan nan kil en au likam eu.

2 Ai pun en pwili jan re omui, o kom kotin majan don me pun.

3 Kom kotin kajaui monion I ni pon, o komui kotin jojon ia, ap jota me kom kotin diar. I inaukidi, me i jota pan japun ni ai lokaia.

4 I kin rukila pan majan en jilan omui jan mon tiak en aramaj o al en men kamela.

5 Ni ai alialu wei i jota muei jan nan lip en aluwilu omui, ai kakawei jota katia jan.

6 I likwiri on komui, Main. Kot, kom kotin mani ia, o kapaike don ia karon omui, o kotin ereki ai kapakap.

7 Kom kotin kajaleda omui kalanan kapuriamui, pwe pali maun omui jauaj pan ir, me kin liki komui, on ir me palian ir.

8 Jinjila ia dueta por en maj eu, o kotin pera kin ia mot en lim omui,

9 Mon me japun kan, me men kawe ia la, mon ai imwintiti, me kin kapil ia pena.

10 Re kin kapiridi monion arail; o jan nan au arail re kin lokaia aklapalap.

11 Waja je kin kola ia, re kin kapil kit pena, maj arail kin majamajan, pwen kaje kit di on nan pwel.

12 Dueta laien amen, me inon ion mana, o dueta laien pul amen, me wonon nan waja rir.

13 Main, kom kotida, kaloedi o kanamonokla i; dorela maur i jan me japun kan ki omui kodlaj,

14 Jan ren aramaj akan ki lim omui, Main Ieowa, jan ren aramaj en jappa wet, me pwaij arail ni maur et; kom kotin kadire kila kaped arail omui dipijo kan, me nairail jeri ol me toto, o nairail akan me pan jojoki luan arail kapwa.

15 A i pan ariri jilan omui ni ai pun, o i pan medikila mom omui ni ai pan pirida.