1 MAIN Kot, da me kom kotin kaje kin kit ala, o da me re onioniki japwilim omui jip akan?

2 Kom kotin kupura japwilim omui momodijou, me kom kotin pwaindar maj o, o me komui dorelar, pwen wiala japwilim omui, kotin kupura dol Jion, waja me kom kotikot ia.

3 Kom koti don waja me lijelipin anjau warai; imwintiti me kawelar meakaroj nan im jaraui.

4 Me palian komui, kin weriwer nan tanpaj omui o pwilikidi arail dikedik en ani mal akan lole.

5 Irail pwaradar dueta ir, me wia palapal nan wei.

6 Re kin kawela did kajelel akan ki jile laud o tikitik.

7 Irail karonala tanpaj omui; irail kajaminela o tiakedi waja me mar omui kotikot ia.

8 Irail kin inda nan monion arail: Na, kitail pan kawela! Irail karonalar wajan kaudok karoj nan jap o.

9 Jolar manaman akai janjal on kitail, o jolar jaukop amen mia, o jota amen re atail me pan aja imwilan mepukat.

10 O Main Kot, arai da me morjued o pan lalaue, o imwintiti o pan mamaleki mar omui?

11 Da me komui kotiki wei jan lim omui? Kotikida pali maun omui o kaimwijokala.

12 Pwe Kot ai Nanmarki jan maj o. I me jauaj pan meakaroj, me kin wiaui nin jappa.

13 Kom kotin kamueit pajaner madau ki omui manaman, o kom kotin kawelar monan drake nan pil.

14 Kom kotin kawelar monan walroj, ap kotiki on aramaj nan jap tan, pwen kanala.

15 Komui kotin kapwaredar parer o pilap akan, o pilap kalaimun akan me kom kotin kanalanaladi.

16 Ran o pon me japwilim omui; komui kotin wiadar jaunipon o katipin.

17 Komui wiadar irair en jap akan; komui me kin wia anjaun karakar o kapou.

18 Kom kotin kupura mepukat: Imwintiti o lalaue komui Main, o aramaj pweipwei kan mamaleki mar omui.

19 Kom der kotiki on man laualo nen en japwilim omui muroi, o kom der likidmaliela pwin en japwilim omui luet akan.

20 Kom kotin tamanda inau o, pwe jap olar waja karoj o im akan pual pajaner.

21 Re der kotin mueid on me luet o, en namenok purela, me jamama o luet akan en kapina mar omui.

22 Main Kot, kom kotida o kotin kaimwijokala japwilim omui dodok; kom kotin tamanda kankaurur, me kin wiaui on kmui jan ren me pweipwei kan.

23 Kom kotin der maliela weriwer en japwlim omui imwintiti, moronoron en me palian komui kan, me kin lalaudalar karoj.