1 Nok reꞌ Apo̱los wilic chic ponok ar Cori̱nto, reꞌ maꞌ Lu̱ꞌ xo̱j pan tinamit E̱peso nok iqꞌuinak chic cho chipam take tinamit wilque̱b johtok chiwach naht na̱ yu̱kꞌ wilic pa riyukꞌul Cala̱sya chꞌi̱l Pirji̱ya. Ar ajic E̱peso naxirak take juꞌjun aj niminel reh cꞌuhbal xiban i Wa̱n aj kahsem haꞌ 2 jeꞌ wili xikꞌor queh:

«Naxanimej tak cꞌuhbal xikꞌor i Wa̱n, xtakꞌabjic na cho chana̱ tak i Lokꞌ laj Uxlabal chi naroquic pan awa̱mna tak on maꞌxta? nqui queh.

Reꞌ take reꞌ jeꞌ wili xquikꞌor:

«Maꞌxta! Xa ta woꞌ nak kabiram chi wilic take cꞌacharel xtakꞌabjic chic cho i Lokꞌ laj Uxlabal chi quina̱, nqui take.

3 Reꞌ maꞌ Lu̱ꞌ jeꞌ woꞌ chic wili xikꞌor queh:

«Haj wilic i cꞌuhbal xanimej tak kꞌuruꞌ naxkahsjic aha̱ꞌ tak? nqui queh.

Nok reꞌ take aj niminel reꞌreꞌ xquikꞌor chi xa reꞌ woꞌ i cꞌuhbal cꞌuhtumaj ruꞌum i Wa̱n naxiban cho kahsanic haꞌ xquinimej, 4 reꞌ maꞌ Lu̱ꞌ jeꞌ wili xikꞌor queh:

«Naxiban cho kahsanic haꞌ i Wa̱n, jeꞌ wili xikꞌor queh tinamit xquikahsaj quiha̱ꞌ naxquijal wach quinoꞌjbal:

‹Chachꞌica̱ꞌ acꞌux tak chiri̱j i cꞌuhbalanel cꞌulic lok reh chiwi̱j i hin, nqui queh.

«Reꞌ cꞌuhbalanel reꞌreꞌ, reꞌ aj woꞌ i Jesus reꞌ Pahbamaj chi Kꞌatal Kꞌoric. Chiri̱j aj reꞌ curman chi reꞌ take cꞌacharel naquichꞌica̱b quicꞌux, nqui maꞌ Lu̱ꞌ.

5 Naxquibiraj i kꞌoric reꞌreꞌ, reꞌ take aj niminel reꞌreꞌ xquikahsaj woꞌ chic quiha̱ꞌ reꞌ cok ruꞌ chi cꞌahchiꞌ quikꞌorom chi reꞌ Jesus Ajabe̱s chi quina̱. 6 Chi jeꞌ reꞌ xchalic cu̱cꞌ i Lokꞌ laj Uxlabal nok reꞌ maꞌ Lu̱ꞌ xicoj kꞌab chi quina̱. Ru̱cꞌ aj reꞌ pꞌuht quikꞌorom i kꞌoric nkꞌormojic queh ruꞌum Lokꞌ laj Uxlabal eh pꞌuht woꞌ quikꞌoric pan toco̱m chic kꞌoric take aj niminel reꞌreꞌ, 7 reꞌ cablaj chi winak quiwi̱ꞌ.

8 Chiri̱j chic reꞌ, reꞌ maꞌ Lu̱ꞌ xitik juꞌ cꞌuhbalanic ar chipam i pa̱t ntijiljic wi̱ꞌ i Cꞌuhbal Yeꞌo̱j reh Moyses eh jeꞌ reꞌ xiban chiwach i xib poh chi cu wilic chipam i tinamit reꞌreꞌ. Chiwach aj xib poh xcahnic cu̱cꞌ take nquimol qui̱b ar, reꞌ maꞌ Lu̱ꞌ xkꞌoric chiri̱j i Jesus chi maꞌxta nechꞌ ok riyoꞌjic eh ru̱cꞌ i cꞌuhbalanic riban chiri̱j rajawric i Dios chi kꞌatal kꞌoric, pꞌuht woꞌ richꞌuksam quicꞌux take cꞌahchiꞌ quibirinic reh. 9 Xa reꞌ laꞌ wilic take jeꞌ ru̱cꞌ maꞌ xquichop ta quicꞌux chiri̱j cꞌuhbal rikꞌor maꞌ Lu̱ꞌ xquicowsaj quicꞌux eh chi quiwach take riqꞌuihal nquimol qui̱b ar xiꞌoquic chi ritzꞌujuric i Jesus reꞌ aj Cꞌamol Be̱h ru̱cꞌ i Dios. Xa reꞌ aj woꞌ cho ruꞌ, reꞌ maꞌ Lu̱ꞌ maꞌ cu ta chic xponic chipam i pa̱t reꞌreꞌ, reꞌ laꞌ chic xiban, jarub paꞌ take cꞌacharel xiniminic reh Jesus xicꞌam je take chiri̱j ar chipam i maꞌ laj pa̱t reꞌ riban wi̱ꞌ cꞌuhtunic i winak Tira̱no ribihnal eh ar chic xitik juꞌ quicꞌuhbaljic.

10 Jeꞌ aj reꞌ ruꞌ chiwach i quib chic ha̱b cu xcahnic i maꞌ Lu̱ꞌ ar pan tinamit E̱peso reꞌ wilic pa riyukꞌul i A̱sya, jeꞌ chi ra̱ꞌ riꞌsil eh jeꞌ chi maꞌ reꞌ ta ra̱ꞌ riꞌsil cho maꞌ Israhel quipatanic chipam i yukꞌul reꞌreꞌ, xquibiraj i cꞌuhbalanic riban maꞌ Lu̱ꞌ chiri̱j kAja̱w Jesus.

11 Chiwach aj quib ha̱b reꞌ cu xcahnic wi̱ꞌ i maꞌ Lu̱ꞌ ar pan tinamit E̱peso, reꞌ Dios yohbal wach lokꞌ laj nawa̱l sachbal cꞌuxlis xicꞌuhtaj ru̱cꞌ ro̱k kꞌab ruꞌ. 12 Til kꞌe̱ꞌ woꞌ chic rajawric i Dios wilic ru̱cꞌ i maꞌ Lu̱ꞌ chi xa paꞌ jaric suꞌtal ricojom chi jucꞌbal riwach on chi jucꞌbal rikꞌab, quicowjic take yowaꞌi̱b nanquitzꞌaꞌj i xa paꞌ jaric suꞌtal ncꞌamaric je queh. Jeꞌ woꞌ take cꞌacharel wilic maꞌ tob laj uxlabal cu̱cꞌ, quicahnic woꞌ chi suk nanquitzꞌaꞌj i xa paꞌ jaric suꞌtal reꞌreꞌ. 13 Raj nchel take juꞌjun ra̱ꞌ riꞌsil cho maꞌ Israhel jeꞌ ru̱cꞌ aj tꞌerem take maꞌ tob laj uxlabal quiꞌo̱j xa paꞌ tinamit, naxquitijej nak ti queh jeꞌ ricab riban i maꞌ Lu̱ꞌ chi quitꞌermejic lok take maꞌ tob laj uxlabal, maꞌ xibirinic ta kꞌoric. Jeꞌ reꞌ ajic, chi quesmejic lok take maꞌ tob laj uxlabal cu̱cꞌ take cꞌacharel pꞌuht quikꞌorom ribiral rajawric i Jesus chi jeꞌ wili:

«Maꞌ tob laj uxlabal, ru̱cꞌ rajawric i Lokꞌ laj Ajabe̱s Jesus reꞌ rikꞌor ribiral i maꞌ Lu̱ꞌ, nkakꞌor aweh chi telen lok ru̱cꞌ cꞌacharel wilca̱t wi̱ꞌ, nqui nquikꞌor.

14 Jeꞌ reꞌ xquitik juꞌ ribanaric xa reꞌ laꞌ junpech jeꞌ wilic xquicꞌul take wuku̱b chi winak quipatanic ar E̱peso. Reꞌ take reꞌ racꞌu̱n take i jenaj ra̱ꞌ riꞌsil cho maꞌ Israhel, Ese̱wa ribihnal reꞌ cꞌamol quibe̱h take aj kꞌahsem si̱ chiwach i Dios. Reꞌ take cꞌacharel reꞌreꞌ kꞌuruꞌ naxquikꞌor nak ti reh maꞌ tob laj uxlabal chi narelic lok ru̱cꞌ i cꞌacharel wilic wi̱ꞌ, 15 jeꞌ pe wili xkꞌormojic queh ruꞌum maꞌ tob laj uxlabal:

«Reꞌ hin wehtꞌalim nicꞌ wach rajawric i Jesus, jeꞌ woꞌ i rajawric maꞌ Lu̱ꞌ, raj nchel hat-tak maꞌxta nechꞌ ok awajawric tak chi equinawesaj tak lok, nqui xkꞌormojic queh.

16 Chiri̱j reꞌ, reꞌ winak wilic wi̱ꞌ i maꞌ tob laj uxlabal naxyeꞌeric reh ransil ruꞌum maꞌ tob laj uxlabal, xicut je ri̱b chi quina̱ take wuku̱b reꞌreꞌ. Chiri̱j ruꞌ xichacabej take pan acꞌal, xisecꞌlom take cu rehtal xicahnic chi xa tiꞌ chic wilque̱b. Ar ajic xa wekwek chic xcahnic i quisoꞌ chiqui̱j naxiꞌelic je chipam ripa̱t i winak reꞌreꞌ.

17 Nok quibiram chic ribiral chaj bih xquicꞌul take wuku̱b chi racꞌu̱n i Ese̱wa, reꞌ take ra̱ꞌ riꞌsil cho maꞌ Israhel chꞌi̱l take maꞌ reꞌ ta ra̱ꞌ riꞌsil cho maꞌ Israhel quipatanic ar E̱peso, xoquic cho jenaj rinimal yoꞌjic cu̱cꞌ eh ru̱cꞌ reꞌreꞌ pꞌuht quikꞌorom chi reꞌ Lokꞌ laj Ajabe̱s Jesus til wilic rajawric. 18 Chi quixilac take xquiyew rilokꞌil i Jesus, wilic take quichopom nak quicꞌux chiri̱j banoj waranic i̱b. Reꞌ take tinamit reꞌreꞌ naxquichꞌahba̱ꞌ wach quimahc chiwach maꞌ Lu̱ꞌ, xquipahkaj cuybal quimahc reh Dios 19 jeꞌ ricab xcaꞌn woꞌ take wilic nak quicamaj chi aj war take. Reꞌ take aj war reꞌreꞌ xquicꞌam cho quihu̱j ncamanic queh chi banoj war eh xquicꞌat. Chiꞌnchel take hu̱j reꞌreꞌ xponic wakcꞌahl ikꞌob hoꞌikꞌob (50,000) riqꞌuihal ritzꞌakil naxajlanjic ri̱j.

20 Ru̱cꞌ aj rinimal rajawric i Ajabe̱s Jesus, reꞌ quicomonil take quiniminic reh cꞌuhbal chiri̱j ruꞌ, xiqꞌuihbic wach eh ru̱cꞌ woꞌ rinimal rajawric ruꞌ, kꞌe̱ꞌ chic take tinamit quibirinic reh cꞌuhbal reꞌreꞌ.

21 Chiri̱j aj chic ricꞌuluric chiꞌnchel reꞌreꞌ, reꞌ maꞌ Lu̱ꞌ xichꞌica̱ꞌ ricꞌux chi ojic ar Jerusalen chi jeꞌ wili cꞌahchiꞌ rikꞌorom pa ricꞌux:

«Nok wilqui̱n chic ar Jerusalen, curman chi wi̱n chi nawojic woꞌ ar Ro̱ma, nqui cꞌahchiꞌ rikꞌorom pa ricꞌux.

Nok rikꞌorom chic reꞌreꞌ pa ricꞌux, xoquic woꞌ cho pa ricapew-bal i maꞌ Lu̱ꞌ chi naquiqꞌuic ponok chi pe̱t pa riyukꞌul Masero̱nya chꞌi̱l ar pa riyukꞌul Aca̱ya. 22 Jeꞌ reꞌ nok reꞌ maꞌ Lu̱ꞌ xitakꞌa̱ꞌ je ar Masero̱nya take quib chi raj toꞌo̱l, reꞌ Timote̱yo chꞌi̱l Era̱sto quibihnal nok reꞌreꞌ cu xcahnic pe chic soꞌ chi naht ar E̱peso reꞌ wilic pa riyukꞌul A̱sya.

23 Chiwach woꞌ take kꞌi̱j reꞌreꞌ nok cu wilic maꞌ Lu̱ꞌ ar E̱peso, jenaj rinimal wolic xuctic chi quina̱ take xquinimej i Jesus reꞌ Cꞌamol Be̱h ru̱cꞌ i Dios. 24 Reꞌ wolic reꞌreꞌ xchꞌihquic cho ruꞌum reh winak Reme̱triyo ribihnal aj chꞌeyol wach sak laj chꞌihchꞌ eh reꞌreꞌ ncamanic reh chi tikꞌinbal take cu̱cꞌ rijalwachil ripatil tiyo̱x Riya̱na ribihnal. Reꞌ Reme̱triyo wili chꞌi̱l take toco̱m rich ehcham reh camanic reꞌreꞌ, ruꞌum chi yohbal wach tumi̱n nquicꞌul ru̱cꞌ ritikꞌinjic take rijalwachil ripatil tiyo̱x ncaꞌn, 25 ximol quiwach take richꞌi̱l chꞌi̱l chiꞌnchel take caj camanom eh jeꞌ wili xikꞌor queh:

«Hat-tak was nicha̱kꞌ, reꞌ hat-tak awehtꞌalim chi ru̱cꞌ i kacamaj wili qꞌuih tumi̱n nkacꞌul maj reꞌ take tinamit nquicoj chi reꞌ take tiyo̱x nkatikꞌa̱ꞌ i hoj, reꞌreꞌ i quidios take ruꞌ. 26 Raj laꞌ yuꞌna nawilom tak eh nabiraj woꞌ tak chi yohbal wach take tinamit cꞌahchiꞌ quicana̱b ricojoric wach reꞌreꞌ ruꞌum cꞌahchiꞌ richꞌuksjic quicꞌux ruꞌum maꞌ Lu̱ꞌ chi naquikꞌebem lok rij quicꞌux reꞌreꞌ, maj maꞌ xa reꞌ ta ayuꞌ E̱peso jeꞌ laꞌ woꞌ chi junsut riyukꞌul A̱sya cꞌahchiꞌ rikꞌorom chi reꞌ take tiyo̱x xa tikꞌimaj cuꞌum winak maꞌ reꞌ ta dios take. 27 Ru̱cꞌ cꞌahchiꞌ ribanam i winak reꞌreꞌ, yohbal chi reꞌ kacamaj nkaꞌn i hoj eno̱j pa ri̱j, jeꞌ woꞌ chi reꞌ pa̱t nlokꞌonjic wi̱ꞌ i lokꞌ laj katiyo̱x nim riwaꞌric, Riya̱na ribihnal, maꞌ eta chic no̱j ilmijok cuꞌum take tinamit. Wi je aj reꞌ encꞌuluric, yohbal woꞌ chi reꞌ rilokꞌonjic i lokꞌ laj katiyo̱x Riya̱na nbanaric cuꞌum i tinamit chi junsut E̱peso jeꞌ woꞌ pa riyukꞌul i A̱sya, ensahchic wach chi junpech, nqui xikꞌor i Reme̱triyo.

28 Ar ajic chiꞌnchel take xmoloric quiwach ruꞌum Reme̱triyo naxquibiraj chaj bih xkꞌormojic queh, kꞌe̱ꞌ naxchalic quicꞌa̱ eh pꞌuht quiqꞌuerem quichi̱ꞌ chi jeꞌ wili:

«Reꞌ Riya̱na reꞌ katiyo̱x hoj aj E̱peso kꞌe̱ꞌ rinimal rajawric. Maꞌ reꞌ ta nchel i Dios cꞌahchiꞌ rikꞌorom ribiral maꞌ Lu̱ꞌ, nqui take.

29 Jeꞌ aj reꞌ kꞌuruꞌ reꞌ quicꞌa̱ take winak reꞌreꞌ xinih ri̱b cu̱cꞌ take toco̱m chic quich quitinami̱t eh ruꞌum reꞌ xquichop take qui̱b richꞌi̱l maꞌ Lu̱ꞌ aj Masero̱nya take, reꞌ Ca̱yo chꞌi̱l Arista̱rco quibihnal eh xquicꞌam je take chipam jenaj maꞌ laj pa̱t nquimol wi̱ꞌ qui̱b reh chi ar richꞌukuric kꞌoric chi quina̱. 30 Naxibiraj reꞌreꞌ i maꞌ Lu̱ꞌ, xa̱j nak ojic chipam i pa̱t reꞌreꞌ chi ricꞌuhtjic ri̱b chi quiwach take quimolom qui̱b ar, xa reꞌ laꞌ maꞌ xyeꞌeric ta kꞌab reh cuꞌum take aj niminel. 31 Jeꞌ woꞌ reꞌ xcaꞌn take juꞌjun cꞌacharel wilic cajawric chipam riyukꞌul A̱sya eh tiꞌ woꞌ nquicꞌraj i maꞌ Lu̱ꞌ, maj reꞌ take reꞌ xquitakꞌa̱ꞌ cho rikꞌormojic reh chi maꞌxta rojic chipam i pa̱t molbal i̱b reꞌreꞌ ruꞌum nok yohbal chi reh chi eno̱j ricꞌuhtaj ri̱b. 32 Chiri̱j chic ruꞌ naxiponic take tinamit chipam i pa̱t quimolom wi̱ꞌ qui̱b take cꞌacharel johtonak quicꞌux reꞌreꞌ, reꞌ take tinamit pꞌuht quipahkam chi quiwach chi jeꞌ wili:

«Chaj woꞌ bih nkꞌoric wi̱ꞌ i moloj i̱b wili? nqui take.

Jeꞌ reꞌ nquikꞌor ruꞌum chi maꞌ sakom ta wach chi queh chaj bih riwi̱ꞌ i moloj i̱b reꞌreꞌ, maj chiꞌnchel take johtonak quicꞌux, rehreh wach nquikꞌor chi xa qꞌueric chic quichi̱ꞌ.

33 Jeꞌ reꞌ nok wilic take ra̱ꞌ riꞌsil cho maꞌ Israhel xquicꞌam cok i jenaj maꞌ winak Lej ribihnal eh nok cu chi quiwach chic paꞌlic cho, quipahkaj reh chi narikꞌoric cho chi quina̱ take tinamit reꞌreꞌ. Jeꞌ reꞌ nok reꞌ maꞌ Lej xiban je kꞌab chi naquimayam ahnic eh chi jeꞌ reꞌ naripꞌutum nak je kꞌoric cu̱cꞌ tinamit chi ricoꞌljic ri̱j quiniminic take ra̱ꞌ riꞌsil cho maꞌ Israhel, 34 xa reꞌ laꞌ take tinamit reꞌreꞌ naxquinaꞌbej wach i maꞌ Lej chi ra̱ꞌ riꞌsil woꞌ cho maꞌ Israhel, xa junkꞌoric chic take xquiqꞌuer quichi̱ꞌ chi jeꞌ wili:

«Reꞌ Riya̱na, reꞌ katiyo̱x hoj aj E̱peso, kꞌe̱ꞌ rinimal rajawric, nqui take.

Chi jeꞌ reꞌ xquitik juꞌ chi qꞌueric quichi̱ꞌ chiwach quib o̱ra 35 cu rehtal xipitiric ruꞌum aj tzꞌihm chipam quitinamital. Reꞌ aj tzꞌihm reꞌreꞌ jeꞌ wili xikꞌor queh:

«Hat-tak wich nitinami̱t aj E̱peso, reꞌ hat-tak awehtꞌalim chi chiꞌnchel tinamit pa riyukꞌul i A̱sya quehtꞌalim chi reꞌ hoj, hoj aj camaj chipam ripa̱t i tiyo̱x nim rajawric Riya̱na ribihnal. Jeꞌ woꞌ quehtꞌalim chi hoj aj lokꞌonel wach rijalwachil i tiyo̱x reꞌreꞌ, reꞌ xchalic ar pan taxa̱j. 36 Ruꞌum aj chi reꞌ xnikꞌor wili maꞌ hab ta wach enkꞌoric chi maꞌ coric ta, chamay tak ahnic yuꞌna eh maꞌ chi bih pe aban tak chi cu jaꞌ naꞌn ta pe tak ri̱j chi coric. 37 Jeꞌ reꞌ nikꞌor maj reꞌ hat-tak maꞌ xacꞌam ta tak cho take winak wili chi narichꞌukuric kꞌoric chi quina̱ ruꞌum chi aj banol ta take cꞌahbilal chipam ripatil i katiyo̱x, on chi aj tzꞌuju̱l ta nak take reh lokꞌ laj katu̱t Riya̱na reꞌ katiyo̱x, 38 reꞌ laꞌ hat-tak xacꞌam tak cho take winak wili xa ruꞌum reh Reme̱triyo chꞌi̱l take richꞌi̱l. Jeꞌ reꞌ ajic wi reꞌ Reme̱triyo chꞌi̱l rich ehcham reh camanic chi tikꞌinic tak tiyo̱x wilic ta nak jenoꞌ quiwolic, ar nak xiꞌo̱j cu̱cꞌ take aj chꞌukul wach mahc maj reꞌ take reꞌ nanquimol qui̱b pan quicamaj, wilque̱b chi richꞌukuric wach jenoꞌ mahc. Ruꞌum aj reꞌ hiy tak cu̱cꞌ take aj chꞌukul wach mahc eh ar chakꞌor tak cok amahc chi ajuꞌjunal tak, 39 on chapahkaj tak jenoꞌ kꞌi̱j reꞌ enchꞌukuric wi̱ꞌ wach amahc tak. Jeꞌ reꞌ kꞌuruꞌ reꞌ ok take aj chꞌukul wach mahc quichꞌukbok wach amahc tak nok quimolom chic qui̱b awu̱cꞌ tak jeꞌ ricab rikꞌor i cꞌuhbal nchoponic na̱ katinami̱t 40 maj jeꞌ ricab cꞌahchiꞌco̱j yuꞌna chi maꞌ kichꞌi̱l ta take kaj chꞌukul wach mahc, wilco̱j pan yohbal chi ekojquitzꞌak chi maꞌ nkabiraj ta kꞌoric chi quiwach ruꞌ. Jeꞌ reꞌ nikꞌor maj xa ta nak enkarak kakꞌorbal chiri̱j chaj bih riwi̱ꞌ i moloj i̱b wili ruꞌum nok xa ta woꞌ nak reꞌ wolic xaꞌn tak wili, wilic jenoꞌ riwi̱ꞌ, nqui xikꞌor queh rich ritinami̱t.

41 Naxicohlaj rikꞌororic reꞌreꞌ, xichꞌak je take tinamit mololque̱b chipam i pa̱t reꞌreꞌ.