1 Pan jenaj kꞌi̱j xponic ribiral ru̱cꞌ Jesus chi reꞌ take cow laj aj niminel reh Cꞌuhbal Yeꞌo̱j reh Moyses xquibiraj chi yohbal wach take tinamit cꞌahchiꞌ quiponic ru̱cꞌ Jesus chi rikahsjic quiha̱ꞌ eh quiꞌoquic chi raj tahkanel chic take, ra̱j ru̱cꞌ i Wa̱n maꞌ qꞌuih ta ti take quiponic chi rikahsjic quiha̱ꞌ. 2 To̱b ta woꞌ nak maꞌ reꞌ ta i Jesus nbanic i kahsanic haꞌ, reꞌ laꞌ i hoj raj tahkanel kojbanic, reꞌ Jesus xicapaj chi tare̱t chi nakacana̱b cahnok i yukꞌul reꞌreꞌ ruꞌum i yohbal ricꞌam cho chi reh i ribiral nelic lok reꞌreꞌ. 3 Jeꞌ reꞌ kꞌuruꞌ reꞌ Jesus xojresaj je pa riyukꞌul i Jure̱ya eh xichop woꞌ chic je i be̱h rimol je pa riyukꞌul i Calile̱ya.

4 Jeꞌ reꞌ ajic ruꞌum chi curman chi nariqꞌuic ponok chipam quiyukꞌul take aj Sama̱rya 5 xiqꞌuic ponok chipam jenaj tinamit, Sicar ribihnal reꞌ wilic chipam i yukꞌul reꞌreꞌ. Reꞌ tinamit Sicar, ar wilic maꞌ naht ta ru̱cꞌ i yeꞌa̱b xiyew cho i Jacow reh racꞌu̱n reꞌ Chep ribihnal. 6 Chipam i yeꞌa̱b reꞌreꞌ wilic jenaj rijulil haꞌ cꞌoto̱j cahnok najtir kꞌi̱j ruꞌum i maꞌ Jacow. Naxponic ar jeꞌ na cablaj o̱ra reh kꞌi̱j, reꞌ Jesus xitzꞌuka̱ꞌ ri̱b chi chi̱ꞌ rijulil cꞌotoj laj haꞌ reꞌreꞌ ruꞌum kꞌe̱ꞌ xkꞌuhtic chi behic. 7 Nok juncꞌam chic ritzꞌuhkic ar i Jesus, xponic jenaj ixok aj Sama̱rya chi ricꞌamaric riha̱ꞌ. Jeꞌ reꞌ kꞌuruꞌ reꞌ Jesus jeꞌ wili xikꞌor reh ixok reꞌreꞌ:

«Chacuy tu̱t chayew soꞌ niha̱ꞌ, nqui reh.

8 Naxikꞌor take kꞌoric reꞌreꞌ maꞌ wilco̱j ta nak i hoj ar maj maꞌ jaꞌ kojcꞌulic ta nak lok reh rilokꞌoric paꞌ bih soꞌ keh xo̱j kaꞌn ar pan tinamit. 9 Jeꞌ reꞌ ajic reꞌ ixok reꞌreꞌ jeꞌ wili xikꞌor reh Jesus:

«Reꞌ hat, hat ra̱ꞌ riꞌsil cho maꞌ Israhel eh reꞌ hin, hin aj Sama̱rya. Chaj bih riwi̱ꞌ kꞌuruꞌ chi napahkaj cho aha̱ꞌ wi̱n nok awehtꞌalim woꞌ nak chi maꞌ riban ta chi jenoꞌ keh hoj aj Sama̱rya eriyew riha̱ꞌ jenoꞌ ra̱ꞌ riꞌsil cho maꞌ Israhel? nqui xikꞌor ixok reꞌreꞌ.

Jeꞌ reꞌ xikꞌor ruꞌum rehtꞌalim nok chi kaxilac i hoj ra̱ꞌ riꞌsil cho maꞌ Israhel, ncojoric wach chi kojcahnic chi hoj chic aj mahc chiwach i Dios wi xkacoj jenoꞌ quiculc take aj Sama̱rya. 10 Jeꞌ reꞌ kꞌuruꞌ reꞌ Jesus jeꞌ wili ricꞌuꞌljic xiban:

«Til ta woꞌ nak awehtꞌalim chaj bih riyew i Dios chi si̱ eh awehtꞌalim ta woꞌ nak chi nim wach wajawric i hin reꞌ cꞌahchiꞌ nipahkam cok soꞌ niha̱ꞌ aweh, reꞌ hat enak napahkaj aha̱ꞌ wi̱n eh enak niyew aweh i haꞌ reꞌ riyew i cꞌacharic, nqui Jesus.

11 Naxibiraj ixok chi jeꞌ reꞌ jeꞌ wili xikꞌor:

«Ajabe̱s reꞌ rijulil haꞌ cꞌoto̱j wili, kꞌe̱ꞌ chamil pa̱m eh maꞌxta woꞌ jenoꞌ alecbal esbal cho reh haꞌ. Nicꞌ wach resmejic i haꞌ enaꞌn cho nanacapaj i hat on haj nawesan cho haꞌ reꞌ nbanic chi enwihꞌic nicꞌacharic chi junelic? 12 Ra̱j na rikꞌorom kꞌuruꞌ chi reꞌ hat kꞌe̱ꞌ woꞌ chic anoꞌjbal chiwach i kama̱m maꞌ Jacow chi rehtꞌaljic haj encan kaha̱ꞌ? Jeꞌ reꞌ nikꞌor maj reꞌ kama̱m maꞌ Jacow xcꞌotbic cahnok reh rijulil haꞌ wili chi cꞌambal riha̱ꞌ eh jeꞌ woꞌ chi naquicꞌamam quiha̱ꞌ take racꞌu̱n rixkꞌu̱n chꞌi̱l woꞌ nicꞌ paꞌ qꞌuihal take quichico̱p, nqui ixok reꞌreꞌ.

13 Reꞌ Jesus jeꞌ woꞌ chic wili xikꞌor reh:

«Ruꞌum chi reꞌ haꞌ wilic pan jul wili maꞌ eta resaj achikchiꞌi̱l chi junpech, reꞌ cꞌacharel narucꞌunic reh haꞌ wili xa nariwihꞌic woꞌ richikchiꞌi̱l. 14 Tzꞌa̱b ruꞌ i cꞌacharel naruqꞌuem reh haꞌ niyew i hin maꞌ jaruj ta chic nariwihꞌic richikchiꞌi̱l. Jeꞌ aj reꞌ naricꞌulum maj jeꞌ ricab chi reꞌ haꞌ nelic cho chipam jenoꞌ rasbal haꞌ xa cꞌahchiꞌ woꞌ cho chi elic, jeꞌ woꞌ reꞌ i haꞌ niyew i hin xa nariwihꞌic woꞌ cho ru̱cꞌ i cꞌacharel reꞌreꞌ reh chi naricꞌacharic chi junpech, nqui Jesus.

15 Chalic ixok reꞌreꞌ jeꞌ wili xikꞌor reh Jesus:

«Chacuy Ha̱w, chayew wi̱n i haꞌ nakꞌor ribiral reꞌreꞌ reh chi maꞌ eta chic nwihꞌic nichikchiꞌil eh xa ta woꞌ nak chic equinchalic cꞌamol haꞌ chipam rijulil i cꞌotoj haꞌ wili, nqui ixok reꞌreꞌ.

16 Reꞌ Jesus jeꞌ woꞌ chic wili xikꞌor reh:

«Yuꞌna hiy chakꞌoꞌrej cho abahi̱l eh chacꞌam cho ayuꞌ, nqui Jesus reh.

17 Reꞌ ixok reꞌreꞌ jeꞌ wili xikꞌor:

«Ay Ha̱w, chajaric nakꞌor i hat? Reꞌ hin maꞌxta nibahil, nqui xikꞌor.

—Ho̱ꞌ, coric xakꞌor chi maꞌxta abahi̱l chi coric, 18 maj hoꞌo̱b winak iqꞌuinak awu̱cꞌ eh reꞌ wilic awu̱cꞌ yuꞌna maꞌ reꞌ ta woꞌ abahi̱l. Coric aj ruꞌ xakꞌor chi maꞌxta abahi̱l, nqui Jesus reh ixok reꞌreꞌ.

19 Ar ajic reꞌ ixok reꞌreꞌ xteh soꞌ pa̱m rinoꞌjbal eh jeꞌ wili xikꞌor reh Jesus:

«Reꞌ hat, hat laꞌ poꞌ nchel jenaj raj kꞌorol riCꞌuhbal i Dios. 20 Chakꞌor wi̱n kꞌuruꞌ chaj waꞌric chi reꞌ hat-tak ra̱ꞌ riꞌsil cho maꞌ Israhel nakꞌor tak chi cu ar Jerusalen curman chi narilokꞌonjic wach i Dios? Chaj waꞌric chi maꞌ eta nlokꞌonjic wach i Dios chipam i yu̱kꞌ wili? Jeꞌ reꞌ birinic niban maj reꞌ take kama̱m katiꞌt ayuꞌ xcaꞌn i lokꞌonic, nqui reh Jesus.

21 Reꞌ Jesus jeꞌ wili xicꞌuꞌlej wi̱ꞌ:

«Tu̱t, chacoj wach chi coric i nanikꞌorom aweh wili: Cꞌulic lok reh i kꞌi̱j chi maꞌ cu reꞌ ta chic ar pan tinamit Jerusalen naribanaric rilokꞌonjic wach i Dios on chi cu reꞌ ta nak chic chipam i yu̱kꞌ wili enbanjic chi jeꞌ reꞌ.

22 «Cu yuꞌna chi kꞌi̱j xa reꞌ wach hoj ra̱ꞌ riꞌsil cho maꞌ Israhel nkalokꞌej wach i Dios chi kehtꞌalim chi reꞌreꞌ i kajcoꞌlonel. Reꞌ hat-tak aj Sama̱rya nalokꞌej woꞌ tak wach i Dios xa reꞌ laꞌ maꞌ awehtꞌalim ta tak wach i kaDios chi aj coꞌlonel ruꞌum nok xa reꞌ wach hoj ra̱ꞌ riꞌsil cho maꞌ Israhel xojcoꞌljic ruꞌum. To̱b ta jeꞌ nak reꞌ rilokꞌonjic wach i Dios nbanjic cu yuꞌna chi kꞌi̱j, 23 reꞌ kꞌi̱j xnikꞌor aweh chi cꞌulic lok reh, xcꞌulic chic lok yuꞌna nok reꞌ Lokꞌ laj Uxlabal reꞌ nsakomonic pa̱m quinoꞌjbal take cꞌacharel reh chi naquirakam chiri̱j i coric, reꞌ woꞌ reꞌ entoꞌbonic queh cꞌacharel chi til encaꞌn chi coric i rilokꞌonjic i Dios jeꞌ ricab i lokꞌonic nponic chiwach chi naribanjic reh. 24 Jeꞌ reꞌ nikꞌor maj reꞌ Dios xa pan Lokꞌ laj Uxlabal woꞌ wilic eh ruꞌum aj reꞌ, reꞌ take quilokꞌonic wach curman chi enquilokꞌej wach chi toꞌbomaj take ruꞌum i Lokꞌ laj Uxlabal reh chi reꞌreꞌ encꞌutunic reh i coric laj lokꞌonic, nqui Jesus.

25 Chalic ixok reꞌreꞌ naxkꞌoric chiri̱j i Mesi̱yas reꞌ ra̱j rikꞌorom reꞌ Ripahba̱b i Dios chi Kꞌatal Kꞌoric, jeꞌ wili xikꞌor reh Jesus:

«Reꞌ hin wehtꞌalim chi naricꞌulic lok i Pahbamaj chi Kꞌatal Kꞌoric. Nacꞌolok lok ruꞌ, reꞌreꞌ narisakomonic wach keh chiꞌnchel chaj bih cꞌahchiꞌ akꞌorom i hat, nqui ixok reꞌreꞌ.

26 Reꞌ Jesus jeꞌ woꞌ chic wili xikꞌor reh:

«Reꞌ nakꞌor i hat reꞌreꞌ, reꞌ aj hin ruꞌ reꞌ cꞌahchiꞌqui̱n chi cꞌuta̱j awu̱cꞌ yuꞌna, nqui xikꞌor reh.

27 Jeꞌ reꞌ cꞌahchiꞌ rikꞌorom reh naxoj-o̱j cꞌolok i hoj raj tahkanel. Naxkilow chi cꞌuta̱j riban ru̱cꞌ ixok reꞌreꞌ, reꞌ hoj xsahchic kacꞌux chi reꞌ kaj tijinel cꞌahchiꞌ chi cꞌuta̱j ru̱cꞌ jenaj ixok, xa reꞌ laꞌ ruꞌum chi nkayohbalej wach maꞌ hab ta woꞌ wach keh xbirinic ta nak reh Jesus chi jeꞌ wili:

«Chaj bih nabiraj reh ixok reꞌreꞌ on chaj bih nacꞌuꞌtjaj tak, maꞌ kojqui ta woꞌ reh ruꞌum nkayohlej wach i kAjabe̱s.

28 Jeꞌ reꞌ ajic naxicohlaj kꞌoric i Jesus, reꞌ ixok reꞌreꞌ xicahnaj cahnok rico̱m chi chi̱ꞌ rijulil i cꞌotoj haꞌ reꞌreꞌ eh xo̱j johtok pan tinamit chi rikꞌormojic queh take rich ritinami̱t chi jeꞌ wili:

29 «Jenaj winak xnirak chi chi̱ꞌ rijulil i cꞌotoj haꞌ reꞌ nkacꞌam wi̱ꞌ kaha̱ꞌ. Ar naxoquic chi cꞌuta̱j wu̱cꞌ xikꞌor wi̱n nicꞌ wach riwi̱ꞌ nicꞌacharic. Maꞌ reꞌ ta na nchel reꞌreꞌ i Pahbamaj chi Kꞌatal Kꞌoric kꞌoro̱j cho ribiral chi naricꞌulic lok? Tak-tak kꞌuruꞌ kilow tak cho hab wach i winak reꞌreꞌ, nqui queh.

30 Reꞌ take cꞌacharel xibirinic reh xikꞌor ixok reꞌreꞌ, xiꞌelic cho pan tinamit eh xichalic chipam i yeꞌa̱b reꞌ wilic wi̱ꞌ i Jesus. 31 Nok cu jaꞌ quiponic ta take cꞌacharel reꞌreꞌ, reꞌ hoj aj tahkanel jeꞌ wili xkakꞌor reh Jesus ruꞌum nok xkacꞌam chic cho i wiꞌc:

«Ajabe̱s kaj tijinel, chacuy chaꞌn awaꞌ, kojqui reh.

32 Reꞌ Jesus jeꞌ wili xikꞌor keh:

«Reꞌ hin xniban chic niwaꞌ, xa reꞌ laꞌ hat-tak maꞌ awehtꞌalim ta tak chajaric xnicꞌux, nqui keh.

33 Jeꞌ reꞌ nok reꞌ hoj pꞌuht kabiram chi kawach hab woꞌ wach kꞌuruꞌ xcꞌambic cho riwaꞌ i Jesus, 34 xa reꞌ laꞌ naxojribiraj chi jeꞌ reꞌ nkakꞌor jeꞌ wili xikꞌor keh:

«Naxnikꞌor aweh tak chi xniban chic niwaꞌ, reꞌ wili xwa̱j nikꞌorom aweh tak: Jeꞌ ricab nok ncahnic chi suk nitiꞌjolal naniban niwaꞌ jeꞌ woꞌ reꞌ sukquil quincahnic naniban i haj wilic ra̱j i kAja̱w Dios reꞌ xtakꞌanic cho wi̱n ayuꞌ wach acꞌal. Jeꞌ woꞌ chic, kꞌe̱ꞌ woꞌ suk wi̱n ricohlsjic wach i haj wilic nicamaj xiyew wi̱n 35 chi nanibanam cu̱cꞌ take tinamit reꞌ jeꞌ na ricab take junseht ok chi abi̱x. Coric ruꞌ, yuꞌna cu wilic i ra̱j chi narijacharic cho abi̱x, cu quejeb chic poh ra̱j tiqui tak. Xa reꞌ laꞌ i hin nikꞌor aweh tak chi maꞌ jeꞌ ta reꞌ cu̱cꞌ take tinamit reꞌ nawilow tak chi cꞌahchiꞌ quicꞌulic lok reꞌreꞌ. Chawilow aj tak je, reꞌ take reꞌ cꞌahchiꞌ quicꞌulic lok chi tikilque̱b chic chi rinimjic reꞌ enakꞌor tak queh chiri̱j riCꞌuhbal i Dios. 36 Ruꞌum aj reꞌ nanikꞌor aweh tak chi reꞌ hat-tak jeꞌ acab tak i aj jacho̱l maj jeꞌ ricab chi reꞌreꞌ ricꞌul ritojbal ruꞌum i jach riban jeꞌ woꞌ reꞌ hat-tak na̱cꞌulum woꞌ aco̱ch tak nachiyew queh cꞌacharel i co̱ch chi naquicꞌacharic chi junelic. Jeꞌ woꞌ chic, jeꞌ ricab i sukquil cꞌuxlis xwihꞌic pa ra̱mna i aj tico̱l chꞌi̱l aj jacho̱l naxcaꞌn i jach, jeꞌ woꞌ reꞌ hat-tak kꞌe̱ꞌ woꞌ sukquil cꞌuxlis nariwihꞌic pan awa̱mna tak nachiyew i Dios chi reꞌ take cꞌacharel naquicꞌacharic chi junelic.

37 «Ayuꞌ aj no̱j elok wach ricorquil reꞌ kꞌoro̱j chi jenaj nbanic i tic eh jenaj chic nbanic i jach. 38 Jeꞌ reꞌ nikꞌor maj reꞌ hin cꞌahchiꞌca̱t nitakꞌa̱b tak je chi narimanlajic wach i kꞌoro̱j chic cho chiwi̱j ruꞌum jenaj toco̱m cꞌacharel. Ruꞌum chi jeꞌ reꞌ na̱banam tak, til nikꞌor aweh tak chi reꞌ hat-tak na̱banam tak jeꞌ ricab ncaꞌn take toco̱m chic aj camanom nok quitakꞌabjic je ruꞌum jenoꞌ ajabe̱s chi naquijacham cho i jal reꞌ maꞌ reꞌ ta take xiticbic reh, nqui Jesus keh.

39 Jeꞌ reꞌ xikꞌor keh nok jaꞌ quiponic ta woꞌ take cꞌacharel quicꞌacharic chipam i tinamit Sicar ar pan quiyukꞌul aj Sama̱rya.

Chi quixilac take tinamit reꞌreꞌ yohbal wach queh xquinimej i Jesus ruꞌum rikꞌorbal ixok xponic cu̱cꞌ chi rikꞌormojic chi reꞌ Jesus xikꞌor reh chiꞌnchel nicꞌ wach riwi̱ꞌ ricꞌacharic. 40 Naxiponic ru̱cꞌ Jesus take tinamit reꞌreꞌ, xquipahkaj atoꞌbil reh chi naricahnic pan quitinami̱t eh ruꞌum reꞌ, reꞌ Jesus xcahnic woꞌ quib kꞌi̱j cu̱cꞌ. 41 Chiwach i quib kꞌi̱j reꞌreꞌ wilic woꞌ chic take tinamit xquinimej i Jesus ruꞌum i kꞌoric xquibiraj ru̱cꞌ. 42 Reꞌ take xiniminic reꞌreꞌ jeꞌ wili xquikꞌor reh ixok reꞌreꞌ:

«Yuꞌna xkanimej i Jesus maꞌ ruꞌum ta i xakꞌor keh hat, ruꞌum laꞌ chi reꞌ hoj xkabiraj woꞌ rikꞌorbal eh yuꞌna kehtꞌalim chic chi reꞌreꞌ i Pahbamaj chi Kꞌatal Kꞌoric reꞌ ncoꞌlonic queh cꞌacharel, nqui take reh.

43 Chiri̱j chic quib kꞌi̱j xiban ar Sama̱rya, reꞌ Jesus xitik juꞌ rojic pa riyukꞌul i Calile̱ya 44 ar pan toco̱m chic tinamit reꞌ xikꞌor wi̱ꞌ take kꞌoric wili:

«Maꞌ jenoꞌ aj kꞌorol riCꞌuhbal i Dios maꞌ ta nak ixowomaj wach pa ritinami̱t, nqui xikꞌor.

45 Jeꞌ reꞌ ajic naxponic pa riyukꞌul i Calile̱ya kichꞌi̱l i hoj raj tahkanel, reꞌ Jesus xcꞌulmujic chi suk cuꞌum take tinamit ar maj reꞌ take tinamit reꞌreꞌ quilom chic cho nicꞌ wach take lokꞌ laj nawa̱l ribanam i Jesus naxiponic chipam i ninkꞌi̱j xbanaric ar Jerusalen. 46 Nok pa riyukꞌul chic Calile̱ya wilic, reꞌ Jesus xo̱j woꞌ chic wihꞌok chipam i tinamit Canah reꞌ xicꞌuhtaj wi̱ꞌ i pe̱t lokꞌ laj nawa̱l ru̱cꞌ rimiksjic i haꞌ chi ri̱s u̱wa. Nok wilic i Jesus ar, jenaj winak cꞌacharic riban ar pan tinamit Capernahum reꞌ wilic wi̱ꞌ jenaj nim wach ricamaj ru̱cꞌ i kꞌatal kꞌoric, xyowabjic cho racꞌu̱n. 47 Jeꞌ reꞌ nok reꞌ winak reꞌreꞌ naxibiraj chi reꞌ Jesus xelic cho pa riyukꞌul i Jure̱ya eh xponic chipam i yukꞌul Calile̱ya, xcꞌulic lok ru̱cꞌ i Jesus ar Canah eh xa nchꞌuk chic ricꞌux xipahkaj atoꞌbil reh chi naricowsam i racꞌu̱n ruꞌum nok wilic nak chic pan quimic ruꞌum riyaꞌbilal.

48 Ar ajic reꞌ Jesus jeꞌ wili xikꞌor reh winak reꞌreꞌ:

«Reꞌ hat-tak tinamit maꞌ ta cꞌahchiꞌ awilom tak take yohbal wach lokꞌ laj nawa̱l rehtalil chi til hin ritakꞌanic cho i Dios, maꞌ eta nak nachꞌica̱ꞌ acꞌux tak chiwi̱j, nqui Jesus.

49 Reꞌ winak reꞌreꞌ jeꞌ woꞌ chic wili xikꞌor reh Jesus:

«Chacuy Ha̱w, yuꞌna chi cu cꞌachlic cho wacꞌu̱n tak ti chiwi̱j pa nipa̱t eh chawikꞌomej cho wi̱n ruꞌum nok pan quimic chic wilic, nqui woꞌ chic reh.

50 Naxibiraj chi jeꞌ reꞌ i Jesus jeꞌ wili xikꞌor reh:

«Tisoljen je, reꞌ awacꞌu̱n suk chic ricꞌux natiponok, nqui reh.

Reꞌ winak reꞌreꞌ xicoj wach xkꞌormojic reh eh xsoljic woꞌ chic je pa ripa̱t. 51 Nok behic chic riban je, wilic take raj camanom xichalic chi ricꞌuluric eh xquikꞌor reh chi reꞌ racꞌu̱n maꞌ xquimic ta suk laꞌ chic ricꞌux. 52 Jeꞌ reꞌ kꞌuruꞌ reꞌ winak reꞌreꞌ xibiraj queh raj camanom nicꞌ o̱ra xcꞌulic ricꞌux eh naxquikꞌor reh chi e̱w china̱ cablaj o̱ra cꞌulunak ricꞌux, 53 reꞌ ajabe̱s reꞌreꞌ xcꞌulic cho pa ricꞌux chi je woꞌ reꞌ o̱ra xikꞌor i Jesus chi reꞌ racꞌu̱n xcꞌulic chic ricꞌux. Ru̱cꞌ xcꞌuluric reꞌreꞌ, reꞌ winak reꞌ chꞌi̱l take raj pan pa̱t xquinimej i Jesus. 54 Reꞌ aj reꞌ i ricab lokꞌ laj nawa̱l xiban i Jesus chipam riyukꞌul i Calile̱ya reꞌ xponic wi̱ꞌ naxelic je pa riyukꞌul i Jure̱ya.