1 Naxicohlaj cho riti̱j i Jesus, xelic je chipam i yeꞌa̱b wilic nak wi̱ꞌ eh chi jeꞌ reꞌ chi kichꞌi̱l chic i hoj raj tahkanel xoj-o̱j jok ar wach jenaj yu̱kꞌ cu rehtal xojponic jok chipam jenaj chiki̱j laj rokbal haꞌ Seyron ribihnal. Nok hoj chic iqꞌuinak chipam i rokbal haꞌ reꞌreꞌ, xkapꞌut woꞌ chic tok johtic wach jenaj yu̱kꞌ cu rehtal xojponic chipam i jenaj yeꞌa̱b banbal wi̱ꞌ tic, 2 reꞌ naꞌbamaj woꞌ pa̱m ruꞌum i Ju̱ras maj qꞌuih pech hoj wihꞌinak ar chꞌi̱l i Jesus chipam i yeꞌa̱b reꞌreꞌ. Reꞌ Ju̱ras kꞌuruꞌ reꞌ naricꞌulum nak ritzꞌakil rikꞌahsjic i Jesus naribanam pan quikꞌab take raj ixowonel, 3 naxelic cho cu̱cꞌ take nahsil cꞌamol quibe̱h take aj kꞌahsem si̱ chiwach i Dios chꞌi̱l woꞌ take cꞌacharel jeꞌ ru̱cꞌ cow laj aj niminel reh Cꞌuhbal Yeꞌo̱j reh Moyses, xicꞌam je quibe̱h take sol aj Ro̱ma chꞌi̱l take aj chaꞌjanel reh Lokꞌ laj Pa̱t reꞌ nlokꞌonjic wi̱ꞌ wach i Dios, reꞌ takꞌamaj take je cuꞌum take nahsil richoporic i Jesus. Reꞌ take riqꞌuihal winak takꞌamaj take je reꞌreꞌ xquicꞌam je quichaj chi quisakombal eh xquicꞌam woꞌ je quimache̱t jeꞌ woꞌ quiche̱ꞌ chi chopbal reh Jesus. 4 Ar ajic reꞌ Jesus ruꞌum rehtꞌalim chic nicꞌ nimal i tiꞌcꞌaxic narichalic china̱, xikꞌehtaj cho wach quikꞌorbal nok jeꞌ wili xikꞌor cho queh:

«Hab wach xchalic asicꞌ tak? nqui queh.

5 Jeꞌ aj wili xquikꞌor reh:

«Reꞌ hoj cꞌahchiꞌ kasiqꞌuim i Jesus reꞌ ribihnej chi aj Nasaret, nqui take.

Reꞌ Jesus jeꞌ wili xikꞌor queh:

«Reꞌ aj woꞌ hin ruꞌ, nqui queh.

Chi quixilac take xibirinic reh kꞌoric xikꞌor i Jesus reꞌreꞌ, wilic woꞌ cok ar i Ju̱ras reꞌ xcꞌambic je quibe̱h take cꞌacharel reꞌreꞌ chi richoporic i Jesus.

6 Reꞌ Jesus jeꞌ woꞌ chic wili xikꞌor queh:

«Reꞌ aj woꞌ hin ruꞌ, nqui queh.

Reꞌ take tinamit reꞌreꞌ xquijil je qui̱b chiqui̱j eh xikꞌehbic wach acꞌal naxquibiraj take kꞌoric reꞌreꞌ. 7 Chiri̱j i wili reꞌ Jesus xibiraj woꞌ chic queh chi jeꞌ wili:

«Hab wach i nasicꞌ tak? nqui queh.

—Reꞌ Jesus reꞌ ribihnej chi aj Nasaret nkasicꞌ, nqui take.

8 Reꞌ Jesus xikꞌor woꞌ chic queh chi jeꞌ wili:

«Xnikꞌor chic aweh tak chi reꞌ hin ruꞌ, nqui queh.

Nok rikꞌorom chic reꞌreꞌ, jeꞌ woꞌ chic wili xikꞌor queh:

«Ruꞌum chi reꞌ hin cꞌahchiꞌqui̱n asiqꞌuim tak, chacana̱ꞌ tak chi equiꞌo̱j take wili, nqui queh.

9 Ru̱cꞌ take kꞌoric xiban reꞌreꞌ xmanlajic wach i rikꞌoroj cho chi jeꞌ wili:

10 Jeꞌ reꞌ kꞌuruꞌ chiri̱j nok reꞌ Jesus rikꞌorom chic reꞌreꞌ, reꞌ Simon reꞌ ribihnej woꞌ chi Luch naxilow chi naquichopom nak chic i Jesus xehsaj ti cho rikꞌas laj chꞌihchꞌ pa ripatil wilic ru̱cꞌ eh xicoj ti je chi tiꞌ i winak Ma̱lco ribihnal, reꞌ raj tzꞌeꞌ wa̱ch i nahsil cꞌamol quibe̱h take aj kꞌahsem si̱ chiwach i Dios, naxiniqꞌuej nak ricansjic xa reꞌ laꞌ, xa reꞌ woꞌ ti i jenaj chi xiquin xirak je riyocꞌoric. 11 Naxilow chi jeꞌ reꞌ i Jesus, jeꞌ wili xikꞌor reh maꞌ Luch:

«Chacꞌol woꞌ chic akꞌas laj chꞌihchꞌ pa ripatil. Reꞌ wAja̱w Dios ritikꞌa̱b chic cho wach chi nanicꞌulum i tiꞌcꞌaxic. Jeꞌ ricab chi jenoꞌ cꞌacharel nyeꞌeric reh pan jenoꞌ culc chi naruqꞌuem i cꞌah laj haꞌ, tokꞌlic woꞌ naruqꞌuem, jeꞌ aj woꞌ reꞌ wu̱cꞌ i hin xa nanicꞌulum woꞌ i paꞌ bih tikꞌimaj cho wach ruꞌum i wAja̱w Dios chi nanicꞌulum, nqui reh.

12 Ar ajic naxikꞌor reꞌreꞌ i Jesus, reꞌ take juntuhm chi sol chꞌi̱l i cꞌamol quibe̱h eh chꞌi̱l woꞌ take chaꞌjanel reh Lokꞌ laj Pa̱t reꞌ nlokꞌonjic wi̱ꞌ wach i Dios, xquichop i Jesus eh nok bacꞌlic chi kꞌab, 13 xquicꞌam je chi pe̱t ru̱cꞌ i maꞌ Anas reꞌ raja̱w rehqꞌue̱n i maꞌ Caypas reꞌ wilic chi nahsil cꞌamol quibe̱h take aj kꞌahsem si̱ chiwach i ha̱b reꞌreꞌ. 14 Reꞌ maꞌ Caypas reꞌreꞌ, reꞌ woꞌ reꞌ xyeꞌbic quinoꞌjbal take rich ra̱ꞌ riꞌsil cho maꞌ Israhel reꞌ aj cꞌamol quibe̱h woꞌ take aj Jure̱ya naxikꞌor queh chi jeꞌ wili:

«Sakbih chi keh chi xa reꞌ wach i jenaj chi cꞌacharel enquimic je chiwach chi ekojquimic i hoj chiꞌnchel cꞌacharel wilco̱j chipam i tinamit wili, nqui rikꞌorom cho queh.

15 Naxcꞌamaric je Jesus ru̱cꞌ i cꞌamol quibe̱h take aj kꞌahsem si̱ chiwach i Dios, xtahkaljic je cuꞌum quib keh hoj raj tahkanel, reꞌ Simon reꞌ ribihnej woꞌ chi Luch chꞌi̱l i jenaj chic kich aj tahkanel. Reꞌ kich aj tahkanel reꞌ xihchꞌilej je i maꞌ Luch, ehtꞌalamaj wach ruꞌum i cꞌamol quibe̱h take aj kꞌahsem si̱ chiwach i Dios eh ruꞌum reꞌ xyeꞌeric kꞌab reh chi xoquic cok chiꞌ ripa̱t i cꞌamol be̱h reꞌreꞌ naxcꞌamaric woꞌ cok i Jesus ar. 16 Nok oconak aj chic cok ar i kich aj tahkanel reꞌ ehtꞌalamaj wach ruꞌum i cꞌamol quibe̱h take aj kꞌahsem si̱ chiwach i Dios, xsoljic woꞌ chic cho chi chi̱ꞌ ocbal eh ruꞌum chi xilow chi cu wilic lok ar i maꞌ Luch, xipahkaj atoꞌbil reh aj chaꞌjanel tzꞌahp chi eriyew kꞌab chi naroquic cok i maꞌ Luch. 17 Reꞌ ixok aj chaꞌjanel reh chi̱ꞌ ritzꞌahpil ocbal, jeꞌ wili xikꞌor reh maꞌ Luch naxilow wach:

«Maꞌ reꞌ ta na nchel hat jenaj queh raj tahkanel i winak reꞌ wilic cok chipam i pa̱t reꞌreꞌ? nqui reh.

Reꞌ maꞌ Luch jeꞌ wili xikꞌor reh:

«Maꞌxta! Maꞌ reꞌ ta hin, nqui reh.

18 Chiri̱j wili reꞌ maꞌ Luch xo̱j pahꞌok cu̱cꞌ take juꞌjun cꞌacharel quicamanic chipam i pa̱t reꞌreꞌ, reꞌ quichꞌi̱l qui̱b chꞌi̱l take juꞌjun take aj chaꞌjanel woꞌ reh pa̱t reꞌreꞌ eh ar xcahnic chi kꞌixinic maj chiꞌnchel take cꞌacharel reꞌreꞌ xquicꞌula̱ꞌ lok quikꞌa̱kꞌ ruꞌum reh cꞌuxic cꞌahchiꞌ ribanam eh ar cꞌahchiꞌ quikꞌixinsam cok qui̱b.

19 Ar chic cok chipam i pa̱t reꞌ xcꞌamaric je wi̱ꞌ i Jesus reꞌ cꞌamol quibe̱h take aj kꞌahsem si̱ chiwach i Dios xibiraj reh Jesus hab wach take raj tahkanel eh jeꞌ woꞌ chaj bih take tijinic riban. 20 Chalic i Jesus jeꞌ wili xicꞌuꞌlej wi̱ꞌ:

«Reꞌ hin maꞌxta bih nikꞌorom cho xa pan cꞌolic, chiꞌnchel laꞌ sakom wach naxniban i cꞌuhtunic cu̱cꞌ take tinamit jeꞌ ricab nok xa eli̱c woꞌ xniban cho cꞌuhtunic chipam take pa̱t ntijiljic wi̱ꞌ ri̱j take Cꞌuhbal Yeꞌo̱j reh Moyses on jeꞌ ricab nok chi chi̱ꞌ i Lokꞌ laj Pa̱t reꞌ nlokꞌonjic wi̱ꞌ wach i Dios xniban woꞌ i cꞌuhtunic. 21 Jeꞌ reꞌ kꞌuruꞌ, chaj waꞌric nanabiraj wi̱n chi reꞌ hin nanikꞌoric aweh chiri̱j i cꞌuhtunic niban? Chabiraj laꞌ queh take quibiram chaj bih nikꞌorom cho. Reꞌ take reꞌ quinaꞌbem chic chaj bih aj chiri̱j hin kꞌoronak cho, nqui reh.

22 Naxibiraj chaj bih xikꞌor i Jesus, jenaj queh take aj chaꞌjanel wilque̱b cok ar xisecꞌ je pan wach i Jesus chi kꞌabis eh xikꞌor reh chi jeꞌ wili:

«Maꞌ riban ta chi jeꞌ reꞌ ricꞌuꞌljic xaꞌn i cꞌamol quibe̱h take aj kꞌahsem si̱ chiwach i Dios, nqui reh.

23 Reꞌ Jesus jeꞌ wili ricꞌuꞌljic xiban:

«Wi laꞌ wilic i maꞌ holohic ta laj kꞌoric xnikꞌor, nwa̱j chi enakꞌor wi̱n haj wilic i kꞌoric reꞌreꞌ eh wi laꞌ tare̱t take kꞌoric xnikꞌor, chaj bih riwi̱ꞌ chi cꞌahchiꞌqui̱n achꞌeyem? nqui Jesus reh.

24 Chiri̱j chic i wili reꞌ maꞌ Anas xitakꞌa̱ꞌ je Jesus ru̱cꞌ i maꞌ Caypas reꞌ wilic woꞌ chi cꞌamol quibe̱h take aj kꞌahsem si̱ chiwach i Dios eh xa cu bacꞌlic woꞌ take kꞌab naxcꞌamaric je Jesus ru̱cꞌ.

25 Nok reꞌ maꞌ Luch xa cu kꞌixinic woꞌ riban chiꞌ kꞌa̱kꞌ, ar ajic jenaj cꞌacharel jeꞌ wili xibiraj reh:

«Maꞌ reꞌ ta na nchel hat jenaj queh take raj tahkanel i Jesus? nqui reh.

Chalic maꞌ Luch jeꞌ wili xikꞌor reh:

«Maꞌxta! Maꞌ reꞌ ta hin, nqui.

26 Chiri̱j wili jenaj queh take raj camanom i nahsil cꞌamol quibe̱h take aj kꞌahsem si̱ chiwach i Dios, ru̱cꞌ cho winak reꞌ xyocꞌoric i xiquin ruꞌum i maꞌ Luch, jeꞌ wili xikꞌor reh:

«Maꞌ xwilow ta na cho awach kꞌuruꞌ chi awichꞌi̱l i Jesus ar chipam i yeꞌa̱b reꞌ wilic wi̱ꞌ tic muꞌu̱n? nqui banol reh.

27 Naxibiraj chi jeꞌ reꞌ, reꞌ maꞌ Luch xikꞌor woꞌ chic chi maꞌ reꞌ ta raj tahkanel i Jesus eh xa cu reꞌ woꞌ ti xicohlaj kꞌoric i maꞌ Luch, xkꞌoric woꞌ chic cho i jenaj las wilic ar.

28 Chiri̱j chic riwihꞌic pa ripa̱t i maꞌ Caypas, reꞌ Jesus xcꞌamaric je chipam i pa̱t nponic wihꞌok wi̱ꞌ i raj toꞌo̱l i kꞌatal kꞌoric aj Ro̱ma reꞌ pahbamaj chi rikꞌataric kꞌoric chipam i riyukꞌul Jure̱ya. Reꞌ take cꞌacharel jeꞌ ru̱cꞌ ra̱ꞌ riꞌsil cho maꞌ Israhel reꞌ xicꞌambic je reh Jesus chipam i pa̱t reꞌreꞌ, cu wahkꞌek woꞌ ti xiponic ar, xa reꞌ laꞌ ruꞌ maꞌ xiꞌoquic ta cok chipam i pa̱t reꞌreꞌ ruꞌum chi reꞌ take ra̱ꞌ riꞌsil cho maꞌ Israhel maꞌ quiꞌoquic ta chipam quipa̱t take maꞌ reꞌ ta ra̱ꞌ riꞌsil cho maꞌ Israhel maj chi queh ruꞌ wi ncaꞌn reꞌreꞌ til cꞌahchiꞌ quimahcanic eh wi ncaꞌn i mahc reꞌreꞌ maꞌ nyeꞌeric ta chic kꞌab queh chi enquicꞌsaj rinimjic i ninkꞌi̱j reꞌ ncꞌuxuric wi̱ꞌ i qꞌuijol me̱ꞌ. 29 Jeꞌ reꞌ ajic nok reꞌ take ra̱ꞌ riꞌsil cho maꞌ Israhel reꞌ xicꞌambic je reh Jesus, wilque̱b lok chi chi̱ꞌ i pa̱t reꞌreꞌ, reꞌ raj toꞌo̱l i kꞌatal kꞌoric reꞌreꞌ, reꞌ Po̱nsyo Pila̱to ribihnal xelic cho cu̱cꞌ eh xikꞌor queh chi jeꞌ wili:

«Chajaric i mahc cꞌahchiꞌ atzꞌakam tak chiri̱j i winak wili? nqui xikꞌor queh.

30 Reꞌ take reꞌ jeꞌ wili xquicꞌuꞌlej wi̱ꞌ:

«Reꞌ winak wili mahc xiban. Wi ta nak maꞌ reꞌ ru̱cꞌ maꞌ holohic ta wach ribano̱j, maꞌ xkakꞌahsaj ta nak aweh, nqui take.

31 Reꞌ Po̱nsyo Pila̱to jeꞌ wili xikꞌor queh:

«Wi chiwach i Cꞌuhbal nchopbic ana̱ tak mahc xiban i winak wili, chacꞌam tak je eh chaꞌn tak ru̱cꞌ jeꞌ ricab rikꞌor i cꞌuhbal reꞌreꞌ, nqui queh.

Naxquibiraj chi jeꞌ reꞌ xikꞌor i Po̱nsyo Pila̱to reꞌ take ra̱ꞌ riꞌsil cho maꞌ Israhel reꞌreꞌ jeꞌ wili xquikꞌor reh:

«Wi chiwach i cꞌuhbal nkꞌatbic kꞌoric chi kana̱ i hoj, reꞌ winak wili tanlic chiri̱j chi naricansjic, reꞌ hoj maꞌxta kajawric chi enkacansaj je ruꞌum nok maꞌ xyeꞌeric ta kajawric chi ribanaric reꞌreꞌ awuꞌum hat-tak aj Ro̱ma, nqui take reh.

Jeꞌ reꞌ xquikꞌor reh chi ripahkaljic reh chi reꞌ Jesus naricansjic wach curu̱s 32 eh ru̱cꞌ take kꞌoric xcaꞌn reꞌreꞌ, xo̱j elok wach i kꞌoro̱j chic cho ruꞌum i Jesus keh hoj raj tahkanel reh chi enkarak chiri̱j chaj bih riwi̱ꞌ quimic naricꞌulum.

33 Chiri̱j chic quikꞌoꞌrjic take ra̱ꞌ riꞌsil cho maꞌ Israhel xcꞌambic cho reh Jesus ru̱cꞌ Po̱nsyo Pila̱to, reꞌ Po̱nsyo reꞌreꞌ xsoljic woꞌ chic cok chipam pa̱t reꞌ cꞌahchiꞌ wi̱ꞌ chi wihꞌic eh naxitakꞌa̱ꞌ rikꞌormojic chi naricꞌamaric cho Jesus chiwach, jeꞌ wili xikꞌor reh nok cꞌamoj chic cho:

«Reꞌ na hat quikꞌatal kꞌoric take ra̱ꞌ riꞌsil take cho maꞌ Israhel? nqui reh.

34 Chalic i Jesus jeꞌ wili cꞌuꞌlunic xiban:

«Til na pan acꞌux i hat nchalic chi jeꞌ reꞌ cꞌahchiꞌ akꞌorom wi̱n on xa cꞌahchiꞌ acaꞌpechem i kꞌoro̱j cuꞌum take toco̱m cꞌacharel? nqui reh.

35 Reꞌ Po̱nsyo Pila̱to jeꞌ wili xikꞌor reh chi ricꞌuꞌljic:

«Reꞌ hat awehtꞌalim chi reꞌ hin maꞌ reꞌ ta hin awich ra̱ꞌ riꞌsil cho maꞌ Israhel, ruꞌum reꞌ xa maꞌxta bih nwa̱j reh i kꞌoro̱j chawi̱j cuꞌum take awich atinami̱t. Yuꞌna kꞌuruꞌ chakꞌor wi̱n, chaj bih abanam cho maj xatkꞌahsjic pa nikꞌab cuꞌum take cꞌamol quibe̱h awich ra̱ꞌ riꞌsil cho maꞌ Israhel chꞌi̱l take cꞌamol quibe̱h take aj kꞌahsem si̱ chiwach i Dios, nqui reh.

36 Reꞌ Jesus jeꞌ wili xicꞌuꞌlej wi̱ꞌ:

«Reꞌ wajawric wilic chi quina̱ take cꞌacharel, reꞌ hin maꞌ niban ta ricojoric jeꞌ ricab ricojoric cajawric ncaꞌn take kꞌatal kꞌoric ayuꞌ wach acꞌal. Wi ta nak enicoj i wajawric reꞌreꞌ jeꞌ ricab ncaꞌn take kꞌatal kꞌoric aj ayuꞌ wach acꞌal, reꞌ hin xintakꞌa̱ꞌ nak rikꞌormojic chi equinquicoꞌlej take cꞌacharel jeꞌ ru̱cꞌ wilic wajawric chi quina̱ eh reꞌ take reꞌ xinquicoꞌlej nak chi maꞌxta quinkꞌahsjic pan quicab take wich ra̱ꞌ riꞌsil cho maꞌ Israhel. Jeꞌ reꞌ kꞌuruꞌ to̱b ta wilic wajawric, maꞌ nicoj ta jeꞌ ricab ncaꞌn take kꞌatal kꞌoric aj ayuꞌ wach acꞌal, nqui reh.

37 Reꞌ Po̱nsyo Pila̱to je woꞌ chic wili xikꞌor reh:

«Ru̱cꞌ i xakꞌor nirak chiri̱j chi reꞌ hat, hat woꞌ aj kꞌatal kꞌoric, majeꞌ? nqui reh.

Chalic i Jesus jeꞌ wili ricꞌuꞌljic xiban:

«Reꞌ hat tikꞌoric chi reꞌ hin, hin aj kꞌatal kꞌoric. Reꞌreꞌ kꞌoric naꞌn chiwi̱j, raj i hin reꞌ wili kꞌoric niban aweh chiwi̱j: Reꞌ hin xinchalic ayuꞌ wach acꞌal eh xinasjic ayuꞌ reh chi nanikꞌoric chiri̱j i coric. Ruꞌum aj reꞌ nikꞌor chi reꞌ cꞌacharel coric wach rinoꞌjbal reꞌ aj reꞌ ricoj rehtal chi coric i cꞌuhtunic niban, nqui Jesus.

38 Naxibiraj xikꞌor i Jesus, reꞌ Po̱nsyo Pila̱to xikꞌor reh chi jeꞌ wili:

«Chi wi̱n i hin reꞌ coric maꞌ hab ta wach nehtꞌalanic reh, nqui xikꞌor.

Chiri̱j chic ruꞌ xelic woꞌ chic lok rij pa̱t, xikꞌor queh ra̱ꞌ riꞌsil cho maꞌ Israhel chi jeꞌ wili:

«Reꞌ hin maꞌ nirak ta jenoꞌ mahc chiri̱j i winak wili, 39 reꞌ cok ruꞌ xa paꞌ bih nawa̱j tak chi eniban reꞌ woꞌ reꞌ eniban. Nawa̱j na tak kꞌuruꞌ chi enwokꞌtaj je aweh tak i winak reꞌ nakꞌor tak chi xikꞌor chi reꞌreꞌ i kꞌatal kꞌoric chana̱ hat-tak ra̱ꞌ riꞌsil cho maꞌ Israhel on nawa̱j tak chi jenoꞌ chic enwokꞌtaj je? Cꞌolok pan acꞌux tak, chiwach take kꞌi̱j reꞌ nawicꞌsaj tak wi̱ꞌ i ninkꞌi̱j wilca̱t tak wi̱ꞌ wili, hat-tak ocronak chi nwesaj je jenoꞌ cꞌacharel wilic pan che̱ꞌ, nqui queh.

40 Naxquibiraj reꞌreꞌ, chi cunchelal take cꞌacharel reꞌreꞌ jeꞌ wili xquikꞌor chi cow:

«Maꞌ nka̱j ta chi reꞌ Jesus enawokꞌtaj je, reꞌ laꞌ Warawas nka̱j, nqui take.

Jeꞌ reꞌ xquikꞌor to̱b ta quehtꞌalim woꞌ nak chi reꞌ Warawas jenaj aj lekꞌ.