SAN MATEO
Jesucristupita guelgashgan
Mateoga Jesucristupa discïpulun car paywanmi purergan yachasishgancunata wiyar y milagro rurashgancunatapis ricar. Jesucristupa discïpulun manarä carmi Roma nacionpä impuestuta cobrargan. Mateupita masta musyanayquipä liyinqui San Mateo 9.9-13.
Cay libruta Mateo guelgargan Jesucristo salvacog cashganta Israel mayincunata tantyasinanpämi. Saynöpis Mateo tantyasergan Jesucristupa wilacuynin pï-may runacunapäpis ali cashgantami (San Mateo 28.19-20).
Cay libruta liyirmi musyansi Jesucristo yurishganta (1.1-2.23), wilacushganta (5.1-7.29; 13.1-52; 16.13-20.28), lapanpäpis munayyog cashganta (8.1-9.38), cay pasaman cutimunanpä cashganta (24.1-25.46), cruzcho wanushganta (26.1-27.66) y wanushganpita cawarimushgantapis (28.1-20). Más yachasicuycunapis cay librucho caycanmi.
1
Jesucristupa unay castancuna cashgan
(Lucas 3.23-38)
1 Jesucristo rey David castapita aywaragmi cargan. Davidnami cargan Abrahampa castanpita aywarag. Saymi Abrahampita galaycur Jesucristupa unay castancuna caycuna cayargan:
2 Abrahampa surinmi cargan Isaac.
Isaacpa surinmi cargan Jacob.
Jacobpa surinmi cargan Judá y waquin wauguincunapis.
3 Judäpa surincunami cayargan Fareswan Zara.
Paycunapa mamanmi cargan Tamar.
Farespa surinmi cargan Esrom.
Esrompa surinmi cargan Aram.
4 Arampa surinmi cargan Aminadab.
Aminadabpa surinmi cargan Naasón.
Naasonpa surinmi cargan Salmón.
5 Salmonpa surinmi cargan Booz.
Boozpa mamanmi cargan Rahab.
Boozpa surinmi cargan Obed.
Obedpa mamanmi cargan Rut.
Obedpa surinmi cargan Isaí.
6 Isaïpa surinmi cargan rey David.
Rey Davidpa surinmi cargan Salomón.
Salomón yurergan Uriaspa viüdanchömi.
7 Salomonpa surinmi cargan Roboam.
Roboampa surinmi cargan Abías.
Abiaspa surinmi cargan Asa.
8 Asapa surinmi cargan Josafat.
Josafatpa surinmi cargan Joram.
Jorampa surinmi cargan Uzías.
9 Uziaspa surinmi cargan Jotam.
Jotampa surinmi cargan Acaz.
Acazpa surinmi cargan Ezequías.
10 Ezequiaspa surinmi cargan Manasés.
Manasespa surinmi cargan Amón.
Amonpa surinmi cargan Josías.
11 Josiaspa surinmi cargan Jeconías y waquin wauguincunapis.
Jeconías cawanan wisanmi Israel runacunata Babilonia soldäducuna prësu sarircur apayargan Babilonia nacionman.
12 Saychönami Jeconiaspa surin Salatiel yurergan.
Salatielpa surinmi cargan Zorobabel.
13 Zorobabelpa surinmi cargan Abiud.
Abiudpa surinmi cargan Eliaquim.
Eliaquimpa surinmi cargan Azor.
14 Azorpa surinmi cargan Sadoc.
Sadocpa surinmi cargan Aquim.
Aquimpa surinmi cargan Eliud.
15 Eliudpa surinmi cargan Eleazar.
Eleazarpa surinmi cargan Matán.
Matanpa surinmi cargan Jacob.
16 Jacobpa surinmi cargan Mariapa runan José.
Mariapa wawanmi cargan Jesús. Paymi cargan Tayta Dios cachamushgan salvamagninsi.
17 Saymi Abraham cawashgan wisanpita David yurishganyag chunca chuscu (14) generación cargan.* Juc generacionga runa yurishganpita surin yurishganyagmi caycan. Saypita más juc generacionna caycan say surinpa surin yurishganyag. Saymi juc generación caycan papänin yurishganpita surin yurishganyag, ayca watayog captinpis. Saynölami David cawashgan wisanpita Israel runacunata Babiloniaman apayashgan wisanyag chunca chuscu (14) generación cargan. Saynölami Babiloniaman apayashgan wisanpita Jesucristo yurishganyag chunca chuscu (14) generación cargan.
Jesucristo yurishgan
(Lucas 2.1-7)
18 Jesucristo caynömi yurergan. Mariawan tänanpä José parlacush caycarpis paywan manami punorganräsu. Sayno caycaptinpis María gueshyag ricacorgan Santu Espiritupa munayninwanmi. 19 Gueshyag ricacuptinpis Josëga ali runa car manami munargansu runacuna Mariata jamuränanta. Saymi mana quejacuylapa cachariyta yarpargan. 20 Cacharinanpä yarpachacuycaptinmi Tayta Diosninsipa angilnin Josëta sueñuynincho nergan: “Rey Davidpa castan José, Mariaga manami pï runawanpis punushgasu gueshyag ricacunanpä, sinöga Santu Espiritupa munayninwanmi gueshyag ricacush. Sayno caycaptenga mana rabiacuylapa warmiquipä Mariata shuntacuy. 21 Olgu wamratami María gueshyaconga. Runacuna jusalicushgancunata perdonar salvananpä captinmi say wamrapa jutin canga Jesús.”† “Jesús” ninanga “Runacunata salvan” ninanmi. Sayno nirmi Josëta sueñuynincho ángil parlapargan.
22 Jesús yurinanpämi Tayta Diosninsipa profëtan guelgargan:
23 “Juc doncëlla jipashmi gueshyag ricacur olgu wamrata gueshyaconga.
Say wamrapämi niyanga ‘Emanuel’ cashganta.”* Isaías 7.14
(Emanuel ninanga caycan “Tayta Diosninsi nogansiwanmi caycan” ninanmi.)
24 Sayno niptinmi José punuycashganpita riccharcamur Tayta Diosninsipa angilnin nishgannöla Mariata shuntacorgan warminpä. 25 Isanga Mariawan taycarpis paywan manami punorganräsu wawan yurishganyag. Mariapa wawan yuriycuptinmi jutinta José churapargan Jesús jutin cananpä.
*1:17 Juc generacionga runa yurishganpita surin yurishganyagmi caycan. Saypita más juc generacionna caycan say surinpa surin yurishganyag. Saymi juc generación caycan papänin yurishganpita surin yurishganyag, ayca watayog captinpis.
†1:21 “Jesús” ninanga “Runacunata salvan” ninanmi.
*1:23 Isaías 7.14