1 Jesús, Cristo caskanta tucuy creejka Diospaj wawan. Uj tatata munacojka munacullantaj chay tatapaj wawancunata. 2 Diosta munacuspa, mandacuskanta casucuspa, ciertota munacunchis Diospaj wawancunata. 3 Diosta munacoyka mandacuskancuna casucuymi, mandacuskancunataj junt'ay atinalla. 4 Diospaj tucuy wawancunaka Dios contra cajcunata atipancu; creeskanchiswan atipanchis. 5 Jesús Diospaj Churin caskanta creejka Dios contra cajcunata atipan.

6 Jesucristo jamuspa unuwan bautizachicorkan; wañuspa yawarninta jich'arkan. Unuwan yawarpiwan Jesucristomanta willawanchis. Verdad Espíritu quiquin cayta willawanchis. 7 Quimsa willacojcunaka: 8 Santo Espíritu, unu, yawarpiwan; quimsantincu jinatacama willawanchis. 9 Runacunapaj willacuskanta jap'ekanchis chayka, Diospaj Churinmanta willacuskanka astawan valorniyojraj. 10 Diospaj Churinpi creejka Diospaj willaskanta sonkonpi jap'in. Diospi mana creejtaj Diosta llullapaj jap'in, imaraycuchus mana creenchu Dios Churinmanta willacuskanta. 11 Dios willawanchis wiñay causay kowaskanchista, cay causaytaj Churinpi caskanta. 12 Diospaj Churinta jap'ekajka cay wiñay causayta jap'ekan. Diospaj Churinta mana jap'ekajka mana cay wiñay causayta jap'ekanchu.

13 Diospaj Churinpi creejcunaman escribimuyquichis, wiñay causayniyoj caskayquichista yachanayquichispaj.

14 Diospi confianchis imaraycuchus yachanchis: munaskanman jina mañacusunchis chayka, pay uyariwanchis. 15 Dios uyariwanchis chayka, yachallanchistaj mañacuskanchisman jina ruwaska cananta.

16 Pichus hermanonta perdonanapaj jina jucha ruwachcajta ricun chayka, Diosmanta mañapuchun. Diostaj chay hermanota causachenka. Can juchaka mana perdonanapaj; chaypajka mana “mañapuychis” niyquichischu. 17 Tucuy mana allin ruwaycunaka jucha, chaywanpas can juchaka perdonanapaj jina.

18 Yachanchis jina, Dios Tatapaj wawancunaka mana juchapi purincuchu, imaraycuchus Diospaj Churin wakaychan, supaytaj mana urmachiyta atinchu. 19 Yachanchis Diosmanta caskanchista, Dios contra tucuy cajcunataj supaypaj atiyninpi cancu. 20 Yachallanchistaj Diospaj Churin jamuskanta; payka yachayta kowanchis verdadero Diosta rejsinanchispaj. Verdadcajwan ujchaska causanchis; niyta munan, Churin Jesucristowan. Caymi verdadero Dioska, wiñay causaypas. 21 Wawitacuna, falso dioscunamanta cuidacuychis. Ajina cachun.