3
Juan Bautista ch'usaj lugarpi willan
1 Chay p'unchaycunapi Judeapi caj ch'usaj lugarpi Juan Bautista riqhurerkan. 2 Willaskanpi nerkan: “¡Diosman cutiricuychis! ¡Diospaj gobiernonka kayllapiña cachcan!”
3 Juanmanta Diospaj profetan Isaías escriberkan:
“Ch'usaj lugarpi uj runa wajach'aconka:
‘Señor jamuchcan.
Sonkoyquichista paypaj waquichiychis
recto ñanta jina.’ ”
4 Juanpaj p'achantaj camello millmamanta carkan, karamanta cinturonwan chumpiycuska. Miqhunantaj carkan langosta niska athun t'inti, t'aja misq'ipiwan. 5 Runacuna Jerusalenmanta, tucuy Judea provinciamanta, Jordán kayllacunamantawan jamorkancu uyarej. 6 Juantaj juchancu willacojcunata bautizarkan Jordán mayupi.
7 Achqha fariseocunata saduceocunatawan bautizachicoj jamojta ricuspa, nerkan: “¡Pallicunapaj miraynin! ¿Pitaj kancunaman nerkasunquichis Diospaj jamoj castigonmanta escapacunayquichista? 8 Allinta causaychis, Diosman cutiriskayquichis sut'inta ricuchicunanpaj. 9 Amataj ninacuychischu: ‘Nokanchiska Abrahampaj wawancuna canchis’ nispaka. Segurayquichis, Dioska cay rumicunatapas Abrahampaj wawancunaman tucuchinman. 10 Jacha listoña, sach'acunata saphinmantapacha p'atanapaj. Tucuy sach'ata mana allin urejtaka p'ataspa ninaman wijch'uncu. Chay jinata Dios castigasunquichis. 11 Ciertota noka unullawan bautizayquichis, Diosman cutiriskayquichis ricuchicunanpaj. Nokamanta waj jamuchcan, paycajka Santo Espirituwan ninapiwan bautizasunquichis. Payka nokamanta astawan atiyniyoj; paypaj ñaupakenpi ni imapaschu cani, ni abarcanta pascaranallaypajpas. 12 Pay maquinpi wayrachinata apamuchcan, trigota limpiochaspa trojenpi wakaychananpaj, yurantataj mana jayc'aj wañoj ninawan ruphachipunanpaj.”
Jesús bautizachicun
13 Jesús Galileamanta Jordán mayuman purerkan, Juanwan bautizachicoj. 14 Juantaj ni imaraycu Jesusta bautizayta munarkanchu:
—Astawanpas noka kanpaj bautizaskayqui canay. Kantaj jamunqui nokaman bautizachicoj —nispa.
15 Jesustaj contestarkan:
—Cunanka ruwallay, Diospaj tucuy mandacuskancunata junt'ananchispaj.
Juantaj casucorkan. 16 Jesús bautizachicuspa unumanta llojsichcajtin, janaj pacha quicharacorkan. Ricorkantaj Diospaj Espíritun pay pataman paloma jina uraycamuchcajta. 17 Janaj pachamantataj Dios nimorkan: “Caymi munaska Chureyka. Payta ajllani.”