3
1 ¿Imapajtaj valin judío cana, circuncidaska canapas? 2 Achqhapaj valin, achqha razoncuna can. Ñaupajta, Dios palabranta judiocunaman korkan. 3 Waquin judiocuna mana fiel capojtincu, ¿imataj pasanman? ¿Chayraycuchu Dios mana fiel canman? 4 ¡Chayka mana jinachu! Astawanpas Dioska verdadman jina tucuy imata ruwan, tucuy runa llulla cajtincupas. Escrituraka nin:
“Niskayquicunapi justopaj jap'iska canqui,
juchachajtincupas atipanqui.”
5 Sajra cayninchis Diospaj justo cayninta ricuchejtinri, ¿imatataj nisunman: Dios nokanchista castigaspa, manachu justo? (Caytaka parlachcani juchasapa runacuna jinalla.) 6 ¡Mana ari! Dios mana justo caspari, ¿imaynatataj runacunata juchachanman?
7 Waquincuna nincu: “Llullacuyniywan Diospaj verdadnin sut'inchacun chayka, ¿imaraycutaj Dios juchachawan juchasapata jina?” 8 Nillancutaj: “Mana allincunata ruwasun, allincuna astawanraj sut'inta riqhurinanpaj.” Waquincuna jinata yachachiskayta nichcancu, “Mana allinchu yachachiskan” ninawancupaj. Chaycunaka ruwaskancuman jina castigaska canancu.
Tucuy juchayoj canchis
9 ¿Imataj, nokanchis judiocuna waj runacunamanta nejtin astawan allinchu canchisri? ¡Chayka mana jinachu! Ricuchiycunña judiocuna mana judío cajcunapas juchapi caskancuta. 10 Escrituraka nin:
“¡Mana ujpas canchu allin ruwajka!
¡Mana canchu ni ujllapas!
11 ¡Mana ujpas canchu yuyayniyojka!
¡Mana canchu Diosta masc'ajka!
12 Tucuynincu mana allinman puripuncu;
tucuynincu millay ruwajcama cancu.
¡Mana ujpas canchu allin ruwajka!
¡Mana canchu ni ujllapas!
13 Parlaskancoka sepultura quicharaska jina.
Kalluncuwan parlaskancupas llullacuna.
Simincu uqhupi palli veneno pacaska jina.
14 Simincoka sajra parlaycunawan phiñacuywan
junt'a cachcan.
15 Chaquincupas phawan runacunata
wañuchinancupaj.
16 Causaynincoka ñut'uska nanaywan,
ñac'ariycunawan.
17 Sonko tiyaycuy causayta mana rejsincuchu.
18 Jayc'ajpas Diosta manchacuncuchu.”
19 Yachanchis leypaj tucuy niskanka leypi cajcunapaj churaska caskanta, tucuy runa ni ima niytapas atinancupaj, juchancuta rejsinancupaj, tucuy runacuna Diospaj ñaupakenpi juchachaska canancupaj. 20 Manami Moisespaj leyninta junt'askancuraycuchu Dioska pitapas salvan; leyka rejsichiwanchis juchasapa caskallanchista.
Salvacionka Jesucristopi creejcunapaj
21 Cunanka mana leyllawan Dios yachachiwanchis imaynamanta salvaska cananchista. Chaymantaka leenchis Moisespaj leyninpi profetacunapaj libronpipas: 22 Dioska salvawanchis Jesucristopi creeskanchisraycu. Dios tucuy creejcunata salvan. 23 Tucuy juchallicuncu, salvacoj Diosmantataj carunchacapuncu. 24 Diostaj sumaj favorninpi juchamanta kasilla salvan Jesucristo uqhunta libraspa. 25 Dios Jesucristota churarkan, juchamanta wañunanpaj, jich'aska yawarninwan perdonananpaj. Chaywanpas creejcunallata perdonan. Ajinapi Dioska ricuchicun justo caskanta. Manaraj Jesucristo wañojtenka, Dios pacienciacuspa juchasapacunata mana castigarkanchu. 26 Chaywanpas cunanka Jesucristopaj wañuskanwan Dios ricuchicun justo caskanta. Justopuni cachcan, Dios nin: “Jesuspi creejcunaka juchancumanta salvaska cancu.”
27 Diospaj ñaupakenpi, ¿maytaj runapaj alabacuskanri? ¡Mana canchu! ¿Imaraycutaj? Imaraycuchus mana leyta junt'askanraycuchu salvaconka, manachayri creeskancurayculla. 28 Ajinapi yachanchis, Dios sut'inchan creejcuna salvaska caskancuta, leypaj mandaskancunata junt'ananta mana obligaspa.
29 ¿Judiocunallapajchu Diosri? ¿Manachu tucuy nacioncunapi caj runacunapajpiwan? Arí, tucuy runacunapajpiwan. 30 Uj Dioslla can, creejcunata salvaj Dios; mana importanchu circuncidaska, mana circuncidaska canancoka. 31 Chhicari, ¿creeywanchu ley mana valipun? ¡Chayka mana jinachu! Astawanpas leyka valinpuni.