1 О Павел ало андэ Дервия тай Листра. Отхэ бэшэлас сиклярдо, саво бучёлас Тимафей.

Э дай э Тимафеески сас пакяли иудейка, ай о дад лэско сас греки. 2 Катар Тимафей лачё пхэнэнас о пхрала андэ Листра тай Иконий. 3 О Павел мангляс тэ лэл лэс пэса ко дром. Тай булуб э иудеенги, савэ бэшэнас одолэ дизэндэ, кердяс лэски абризания, вай алаи джянэнас, кай о дад э Тимафееско сас греки. 4 О Павел тай кон э сас лэса пхирэнас андар диз андэ диз тай сиклярэнас э пакялэн тэ астарэнпэс ко сиклярипэ ки апостоленго тай ки барэ манушэнго андэ Иерусалими. 5 О кхангеря зоралёнас андэ пакяпэ, тай о гиндипэ э пакялэнго кажын дес бутёлас.

6 Он накхлэ андар Фригия тай Галатия, ай о Шужо Духос на мукляс лэн тэ пхукавэн э збора андэ правинцыя Азия. 7 Он пашылэ ко чети Мисия тай кидинэпэс тэ джян андэ Вифиния, ай о Духос э Исусеско на мукляс лэн, 8 тай он накхлэ э Мисия тай алэ андэ Троас. 9 Рати о Павел дикхляс дикхипэ: лэстэ ало мануш андар Македония. Ов сас тэрдо тай мангелас лэс:

— Эла андэ Македония тай кер ярдыми амэнги!

10 Пал адалэ дикхимастэ амэ гиндям, кай о Дэл бичялэл амэн тэ пхукавас лэнги о Лошано Габэри, тай лилэ тэ гортярэнпэс тэ джян андэ Македония.

11 Андар Троас амэ накхлям доврус андэ Самофракия тай отхар авэр дес андэ Неаполь. 12 Андар Неаполь амэ гелям андэ Филиппи, андэ римски калония тай андэ бари диз одолэ ригатэ ки Македония. Отхэ амэ самас набут дес. 13 Андэ суббота амэ никлистям пал бар ки дизаки ки диряв, катэ, сар амэ тюшундиясас, сас тхан тэ зборизас э Дэвлэса. Амэ бэшлям тай лилям тэ зборизас э джювлянца, савэ отхэ кидэнаспэс. 14 Машкарэ лэндэ сас екх, сави бучёлас Лидия, андар диз Фиатира, сави бикнэлас багалыдэс лолэ-синя басмадэс. Э Лидия гинэлас э Дэвлэс, тай о Сагбус пхутэрдяс лако ило одолэстэ, со пхэнэлас о Павел. 15 Пал отхэ, сар ой тай лаки кхерутнэ сас болдэ, ой диняс икос амэн пэстэ.

— Тумэ тэ гинэн ман чячя э Сагбуски, дэчи элан тай ачён мандэ андэ кхер, — ой лачес-лачес мангелас, тай амэ кердям аякха.

16 Екхвар, кана амэ джясас ко тхан, катэ зборизасас э Дэвлэса, опэр дром дикхлям екхе иргатинка, андэ савятэ сас духос Питонеско* 16.16 Андэ екх авгутногречески пхукаипэ о Питон бучёлас баро сап, кай хурдярэлас алаи агорял ки Дэльфи. Ой дикхелас палко дэльфийски оракули-храми тай отхэ дэлас дорикерипэ джи одолэски, сар мудардяс лэс о Аполлон. Дэчи о мануша лилэ тэ пхэнэн «Питон» э духоски дорикеримаски, саво бэшэлас андэ мануша тай зборизэлас андар лэндэ.. Дорикеримаса ой анэлас баро казандима пэ сагбудэнги. 17 Э иргатинка джялас палко Павел тай пал амэндэ тай дэлас бэбэря:

— Адала мануша — иргатя э Уче Дэвлэски! Он пхукавэн тумэнги о дром э кутардимаско!

18 Ой керэлас адава бут деса, тай кана э Павлэс адава быздэрды, ов болдиняспэс тай пхэнляс э духоски:

— Андэ Нав ки Исусеско Христоско мэ пхэнав туки: никлё андар латэ!

Бирдэн о духос ачявдяс ла. 19 Кана лаки сагбудэс галилэ, кай лэндэ быты о казандима, он астардэ э Павлэс тай э Силас тай сидинэ лэн ко майдани ки дизаки барэ. 20 Он андэ лэн ко преторя† 16.20 О баро римски калонияко. ки дизаки тай пхэнлэ:

— Адала мануша — иудея, тай он ваздэн касэвэти андэ амарэ дизатэ. 21 Он сиклярэн тэ керас одова, со амэнги, э римляненги, на камэл нэ тэ пакяс, нэ тэ керас.

22 О дюняс екхетханэ лэнца керэлас дошалэн э Павлэс тай э Силас, тай о преторя пхэнлэ тэ пхаравэн опрал лэндэ о савутя тай тэ марэн ровленца. 23 Лэн лачес мардэ тай читэ андэ пханли, ай одолэски, кай дикхел пал пханли, пхэнлэ лачес пал лэндэ тэ дикхел. 24 Кана шунляс, со пхэнлэ лэски, ов пханляс лэн андэ андарутни пханли тай мардяс лэнги пинрэ андэ каштэстэ.

25 Паш ки екхпаш рат о Павел тай о Сила мангенас э Дэвлэс тай дэнас Лэски махтадимаски гиля, ай авэра пханлимаря шунэнас лэн. 26 Бирдэн уло асавко зорало пхуяко израипэ, кай о фундамент э пханляко кхелавдило. Алаи о удара пхутэрдилэ, тай алаи ко пханлимаря о джянджира пэлэ катар пинрэ. 27 Кана э пханляко баро джянгавдило тай дикхляс, кай алаи о удара э пханляки пхутэрдэ, ов лиляс камас тай мангляс тэ мударэл пэс, тюшундиелас, кай алаи о пханлимаря нашлэ. 28 Ай о Павел диняс бэбэря:

— Ма кер туки джюнгалипэ! Амэ алаи атхэ!

29 О баро лиляс ярэки, прастанило андэ тай трашаса пэло ангал Павел тай ангал Сила. 30 Ов никалдяс лэн андар тай пхучляс:

— Сагбудэс минрэ, со манги тэ керав, тэ овав кутардимэ?

31 — Пакя э Сагбуски Исусески, — пхэнлэ он, — тай ту, тай тэ кхерутнэ кан овэн кутардимэна.

32 Тай он пхукавдэ э збора э Сагбуски лэски тай алаи лэски кхерутнэнги. 33 Одова ратяко вахыти э пханляко баро халярдяс лэнги мардэ тхана тай сас болдо, ов тай алаи лэски кхерутнэ. 34 Ов андяс э Павлэс тай э Силас пэстэ кхерэ тай тхэдяс лэнги конас. Екхетханэ алаи пэ кхерутнэнца ов лошазэлас одолэски, кай пакянило э Дэвлэски.

35 Уло дес, тай о преторя бичялдэ пумарэ иргатен андэ пханли тэ пхэнэн:

— Тэ мукен адалэ манушэн.

36 Э пханляко баро пхэнляс э Павлэски:

— О преторя пхэнлэ тэ мукав тумэн! Оничин никлён тай джян лачимаса!

37 Ай о Павел пхэнляс:

— Он би цындомаско мардэ амэн ангал дюняс, на дихлэ одолэски, кай амэ сам римскя мануша, тай читэ амэн андэ пханли. Анкха он манген амэн тэ мукен аякха, никхон тэ на джянэл? На! Мэ авэн он сам тай мэ никалэн амэн.

38 О иргатя пхэнлэ адалэстар э преторенги, тай кана одола шунлэ, кай о Павел тай о Сила римскя мануша, трашанилэ. 39 Он алэ, пхэнлэ лэнги апувикерэн амэн, никалдэ лэн андар пханли тай манглэ тэ джян андар диз. 40 О Павел тай о Сила никлистэ андар пханли тай гелэ андэ кхер ки Лидия. Отхэ он дикхлэпэс э пхралэнца тай зоралякердэ лэн. Дэчи он гелэ.