1 Екхвар о Исус тэрдо сас паш ко бошы пани Генисарет, тай о дюняс тасавэнас Лэс агорял, тэ шунэн э збора э Дэвлэски. 2 О Исус дикхляс паш ко пани дуй лодкес. О мануша, савэ астарэнас э мачен, никлистэ андар лодкес, чяйкадиенас пумарэ сеткес. 3 Ов диняс андэ екх лодка, сави сас э Симонэски, тай мангляс лэс, тэ дэл джялдави залаг э лодкаса катар чети ки панеско. Дэчи Ов бэшло тай лиляс тэ сиклярэл э дюняс андар лодка. 4 Кана о Исус бытэрды тэ зборизэл, Ов пхэнляс э Симонэски:

— Дэ джялдави э лодкаса ко хор тхан тай чи о сеткес, тэ астарэс мачен.

5 О Симон пхэнляс:

— Сикляримарина, амэ керасас пхари бути састи рат тай ништо на астардям, эй сар Ту аякха пхэнэс, кан чяв о сеткес.

6 Тай кана он кердэ адава, астардэ аборкха маче, кай о сеткес лилэ тэ пхаравдён. 7 Он вастэнца дэнас икос ярдымески э амалэн андар авэр лодка. Одола алэ, тай екхетханэ он пхэрдэ дуй лодкес аякха, кай о лодкес лилэ тэ бугулдиен. 8 Кана о Симон Пётар адава дикхляс, ов пэло ко чянга ки Исусески тай пхэнляс:

— Наш мандар, Сагбуса, вай мэ мануш бэзяло!

9 Ов пхэнляс аякха, кай лэс тай алаен, кон лэса астарэлас мачен, лиляс бари траш, кай дикхлэ аборкха маче. 10 Сас шаштимэна ли о амала э Симонэски: о Яков тай о Иоанн, о чявэ э Зеведеески. О Исус пхэнляс э Симонэски:

— Ма траша, акана ту кан астарэс манушэн.

11 Тай никалдэ о лодкес опэр пху, он ачявдэ алаи тай гелэ пал Лэстэ.

12 Екхвар, кана о Исус сас андэ екхе дизатэ, Ов дикхляс манушэс, гералэс* 5.12 Опэр гречески чиб «лепра» — моркхяки дукх. О мануш, кастэ сас асавки дукх, гинэласпэс нашужо, камэлас тэ овэл дурал катар мануша, тай на мукенас лэс андэ храми.. Кана ов дикхляс э Исусес, пэло моса тэлэ тай лиляс лачес тэ мангел Лэс:

— Сагбуса! Тэ мангес, Тутэ си зор тэ шужарэс ман.

13 О Исус сидиняс по вас, колисаило лэстэ тай пхэнляс:

— Мангав, шужо!

Э гер бирдэн гили опрал лэстэ. 14 О Исус пхэнляс лэски холяса никхаски адалэстар тэ на пхукавэл:

— Джя, сикав тут э попазески тай ан курбанес, кай шужылян, сар адава пхэнляс о Маисей. Тай алаи мэ дикхен адава.

15 О зборэс катар Исус шунлёнас май буглэс, тай бут мануша джянас Лэстэ, тэ шунэн Лэс тай тэ аиндиен катар дукха. 16 О Исус бутвар джялас ки биманушэнги тхана тай зборизэлас э Дэвлэса.

17 Екхвар, кана о Исус сиклярэлас, пашэ бэшлэ сас о фарисея тай о сикляримаря э Тхэдимаски, савэ кидинэпэс андар алаи ко диза ки Галилеяки тай Иудеяки, тай андар Иерусалими. Э Исусеса сас э зор э Сагбуски, тэ аиндэрдиел э насвалэн. 18 Тай алэ мануша, анэнас опэр матрази астардэс, тай мангенас тэ гелэн лэс андэ кхер, тэ пашлярэн ангал Исус. 19 Тай андар дюняс он нащи адава кердэ, тай дэчи он ваздинэпэс опэр кхер, тай лилэ опрал э черепица, тай муклэ э насвалэс опэр матрази машкарэ ко кхер, доврус ангал Исус. 20 Кана о Исус дикхляс лэнго пакяпэ, Ов пхэнляс э насвалэски:

— Амал, муклён туки тэ бэзя!

21 О фарисея тай о сикляримаря э Тхэдимаски тюшундиенас андэ пэстэ: «Кон эси адава Мануш, Саво пхэнэл бэзялэ зборэс? Вай екх ко Дэл си зор, тэ мукел бэзя?» 22 Галило, состар он тюшундиен, о Исус пхэнляс лэнги:

— Со тюшундима тумэндэ андэ ило? 23 Со локо — тэ пхэнэс: «Муклён туки тэ бэзя» — я тэ пхэнэс: «Ущи тай пхир?» 24 Тумэ тэ джянэн, кай ко Чяво ко Манушыкано си барипэ опэр пху тэ мукел э манушэнги о бэзя…

Дэчи о Исус пхэнляс э астардэ манушэски:

— Пхэнав туки, ущи, лэ то матрази тай джя кхерэ.

25 Одова бирдэн ангал алаенги якхендэ ущино, лиляс одова, опэр состэ сас пашло, гело кхерэ тай махтадиелас э Дэвлэс. 26 Алаи шаштылар, тай он махтадиенас э Дэвлэс. Тай трашавнэ, он пхэнэнас:

— Барэ дилэс, савэ на овэн, амэ авдес дикхлям.

27 О Исус никлисто андар адалэ кхерэстэ тай дикхляс кидимарес налогенгерэс, лэско нав Левий, бэшлэс ко тхан, кай кидэн о налогя.

— Эла пал Мандэ, — пхэнляс лэски о Исус.

28 О Левий ущино, ачявдяс алаи тай гело пал Лэстэ. 29 Дэчи о Левий кердяс пэстэ кхерэ баро мисяфирлыки э Исусески. Ко мисяфирлыки кидинэпэс бут кидимаря э налогенги тай авэр дюняс. Он сас пал конас екхетханэ э Исусеса. 30 О фарисея тай о сикляримаря э Тхэдимаски холяса пхученас э сиклярдэн э Исусескерэн:

— Соски тумэ хан тай пиен э кидимаренца э налогенгерэнца тай э бэзялэнца?

31 О Исус пхэнляс лэнги:

— На э састярдэнги камэл врачи, ами э насвалэнги. 32 Мэ алём тэ пхэнав на э чяченги, ами э бэзялэнги, тэ болдэнпэс катар бэзя.

33 Дэчи он пхэнлэ э Исусески:

— О сиклярдэ э Иоаннески тай э фарисеенги бутвар астарэн оразас тай мангенпэс ко Дэл, ай Тэ сиклярдэ хан тай пиен.

34 О Исус пхэнляс лэнги:

— Та сар тэ тхэс э манушэн ко бияв, тэ астарэн оразас, кана си лэнца о джямутро? 35 Вай кан авэл вахыти, кана о джямутро кан линдёл лэндар, аки одола деса, он кан астарэн оразас.

36 Ов генэ пхукавдяс лэнги пхукаипэ:

— Никхон на сивэл котор пуранэ савутестэ, чиндо адалэски котор нэвэстар. Ов адава тэ керэла, ов ли о нэво савути кан аравэл, та ли ко пурано о котор на кан уйдиел. 37 Тай никхон на чёрэл о нэво винас андэ пуранэ моркхяки гонэ, вай о нэво винас кан пхаравэл лэн — тай кан чёрдёл, ай о гонэ кан пхаравдён. 38 На, о нэво винас чёрэн андэ нэвэ моркхяки гонэ. 39 Тай никхон, кон пиел пурано винас, на кан мангел тэ пиел винас нэво, вай кан пхэнэл: «О пурано винас зиядэ».