1 О Исус бытэрды тэ пхэнэл э дюняски, гело ко Капернаум. 2 Отхэ екх баро, саво сас опэр шэлэ салдатендэ, лэстэ сас насвало тай пашло опэр мэримастэ иргати. Лэски сас бут багалыс адава лэско иргати. 3 Тай кана ов шунляс катар Исус, бичялдяс Лэстэ иудейски барэ манушэн, тэ манген тэ авэл тай тэ аиндэрдиел лэски иргатес. 4 О барэ мануша алэ ко Исус тай лилэ бут лачес тэ манген Лэс:

— Адава мануш керэл То ярдыми, 5 вай ов дэхэл амарэ дюняс, тай адава ов кердяс амэнги синагога.

6 О Исус гело лэнца. Ов пашолас ко кхер, тай бичялдяс о баро, саво сас опэр шэлэндэ, Лэстэ пэ амалэн, тэ пхэнэн:

— Сагбуса, ма кхиняр Тут, вай мэ на керав одова, тэ дэс Ту андэ мэ кхерэстэ. 7 Мэ ли ман на гиндём, кай керав, тэ авав Тутэ. Ай пхэн екх збора, тай мо иргати кан аиндиел. 8 Вай ли опэр мандэ си барипэ, тай ли мандэ си, савэ тхэн кан ман салдатя. Мэ пхэнав екхески: «Джя!» — та`й ов джял, аврэски: «Эла!» — тай одова авэл. Иргатески минрэски пхэнав: «Кер акава!» — тай ов керэл.

9 О Исус шунляс адава, шашты тай болдиняспэс ко дюняс, кай авэлас пал Лэстэ, пхэнляс:

— Пхэнав тумэнги, кай джи андэ Израиль Мэ на аракхлём асавко пакяпэ.

10 Кана о бичялдэ алэ палэ андэ кхер, он дикхлэ о иргати аинды.

11 Набут пал отхэ о Исус гело андэ диз, кай бучёлас Наин. Лэса сас Лэскерэ сиклярдэ тай бут авэра мануша. 12 Кана Ов пашолас ки бар ки дизаки, андар латэ никалэнас мулэс, чявэс, саво сас екх ки дай, ай ой сас пхивли. Екхетханэ ласа андар диз никлёлас бут дюняс. 13 Кана о Сагбус дикхляс адалэ джювля, Ов аяды ла.

— Ма ров, — пхэнляс Ов лаки.

14 Дэчи Ов пашыло тай колисаило ко гробос. Одола, кон гелэнас лэс, тэрдилэ, тай о Исус пхэнляс:

— Тэрнагара, пхэнав туки: ущи!

15 О муло бэшло тай лиляс тэ зборизэл, тай о Исус диняс лэс ки дай. 16 Алаен, кон отхэ сас, лиляс траш, тай о мануша махтадиенас э Дэвлэс:

— Баро прароки уло машкарэ амэндэ! О Дэл ало Пэ дюнястэ!

17 О зборэс катар Исус шунлилэ алаи ко Иудея тай агорял лаки пхуендэ.

18 О сиклярдэ э Иоаннески пхукавдэ лэски алаестар, со уло. Тай дэчи о Иоанн диняс икос пэстэ дон андар лэндэ 19 тай бичялдяс лэн ко Сагбус тэ пхучен:

— Ту сан Одова, Кон камэл тэ авэл, я амэнги тэ ишандияс кас-то аврэс?

20 О мурша алэ ко Исус тай пхэнлэ:

— О Иоанн Болдимари бичялдяс амэн Тутэ тэ пхучяс: Ту сан Одова, Саво камэл тэ авэл, я амэнги тэ ишандияс кас-то аврэс?

21 О Исус сами адава вахыти аиндэрды бутэ манушэн катар дукха тай катар насвалипэ, тай катар джюнгалэ духя, тай бутэ корэн башлады дикхипэ. 22 Тай Ов пхэнляс э бичялдэнги:

— Джян, пхукавэн э Иоаннески одолэстар, со тумэ дикхлянус тай со шунлянус: о корэ дикхен, о банге пхирэн, о гералэ шужон, о кашуке шунэн, о мулэ дживиндён тай э чёрэнги пхукавдёл Лошано Габэри. 23 Бахтало одова, кон андар Мандэ на кан джял опрал дром!

24 Кана о бичялдэ э Иоаннески гелэ, о Исус лиляс тэ пхэнэл э дюняски катар Иоанн:

— Со тумэ гелянусас тэ дикхен ки ливади? Карин камышы, кай кхелавдёл катар балвал? 25 Дэчи со тумэ гелянусас тэ дикхен? Манушэс, урявдэс андэ багалыдэс савутя? На, одола, кон урявэн багалыдэс савутя тай бэшэн андэ барвалимастэ, си андэ патишаитика кхера. 26 Дэчи со тумэ пхирэнас тэ дикхен? Э прарокес? Ва, тай пхэнав тумэнги, кай баро, ниш прароки. 27 Ов одова, кастар яздимэ:

28 Пхэнав тумэнги, машкарэ алаи, кай аракхлилэ джювлятар, нанай баро, ниш о Иоанн. Ами алаендар о тикно андэ Дэвлэско Патишайлыки — баро лэстар.

29 Тай алаи о дюняс, тай джи о кидимаря э налогенги, кай шунлэ о зборэс э Исусески, пакянилэ кай э Дэвлэско дром чячё, тай он лилэ о болдипэ э Иоаннеско. 30 О фарисея тай о сикляримаря э Тхэдимаски на манглэ, тэ лэн болдипэ лэстар, динэ бутуря э Дэвлэско мангипэ.

31 — Каса дэчи Манги тэ ушатэрдияв э манушэн адалэ вахытескерэн? — пхэнэлас о Исус. — Каски он ушадиен? 32 Он сар пуя, савэ бэшлэ ко майдани тай дэн бэбэря екх аврэски:

33 Дикхен, аки ало о Иоанн о Болдимари, на хал манро тай на пиел винас, тай тумэ пхэнэн: «Андэ лэстэ шэйтани» 34 Ало о Чяво о Манушыкано, хал тай пиел, тай тумэ пхэнэн: «Аки о хавджяло тай о матимари, о амал э кидимаренго э налогенгерэнго тай э бэзялэнго». 35 Алаи о пуя э годявэримаски сикавэн, кай о годявэрипэ си чячё.

36 Екх андар фарисея диняс икос э Исусес пэстэ тэ хал. О Исус ало лэстэ андэ кхер тай лиляс тхан пал конас. 37 Адава вахыти екх джювли андар адалэ дизатэ, савя джянэнас, сар бэзяля, галили, кай о Исус хал андэ кхер ко фарисеи, андяс алебастрови кхоро, андэ савэстэ сас бут багалыс духыс. 38 Э джювли тэрдили палал ко чянга ки Исусески тай, ровэлас, чёрэлас Лэски пинрэндэ ався. Ой лиляс тэ кхосэл Лэски пинрэ пэ балэнца, чюмидэлас лэн тай макхелас духыса. 39 Кана о фарисеи, саво диняс икос э Исусес, дикхляс адава, ов тюшунды: «Тэ овэл би Адава Мануш чячес прароки, Ов би джянэлас, кай э джювли, сави Лэстэ колизэл, — бэзяли». 40 Дэчи о Исус пхэнляс лэски:

— Симон, Мэ мангав туки со-то тэ пхэнав.

— Пхэн, Сикляримарина, — пхэнляс ов.

41 — Дуй мануша сас борджи екхе манушэски, — пхэнэлас о Исус. — О екх сас борджи панджшэл динаря, ай авэр — пэинда. 42 Ли э екхески, ли аврэски на сас соса тэ дэн о борджи, тай мукляс о борджи лэнги э донги. Кон андар лэндэ, ту тюшундиес, кан дэхэл лэс бут?

43 О Симон пхэнляс:

— Мэ тюшундияв, одова, каски сас мукло о баро борджи.

— Ту чячи тюшундын, — пхэнляс о Исус. 44 Тай болдиняспэс ки джювли, пхэнляс э Симонэски:

— Ту дикхес адалэ джювля? Мэ алём андэ тэ кхерэстэ, тай ту на динян Ман джи пани, тэ халярав Мэ пинрэ, ай ой халярдяс Мэ пинрэ авсенца тай кхосляс пэ балэнца! 45 Ту джи на чюмидын Ман, кана дикхлян, ай адая джювли одолэ вахытестар, сар Мэ алём андэ кхер, на тэрдёл тэ чюмидэл Мэ пинрэ. 46 Ту на макхлян Манги Мо шэро олияса, ай ой макхляс багалыс духыса Мэ пинрэ. 47 Оничин Мэ пхэнав туки: лаки муклилэ бут бэзя, андар адалэстэ ой дэхляс лачес. Ай одова, савэски залаг муклило, дэхэл залаг.

48 Оничин пхэнляс о Исус э джювляки:

— Тэ бэзя муклэ си.

49 Ай авэра мануша, кай сас Лэса пал конас, лилэ тэ тюшундиен: «Кон Ов асавко, кай джи о бэзя мукел?»

50 О Исус пхэнляс э джювляки:

— То пакяпэ кутарды тут, джя лачимаса.