1 О Исус мангелас тэ сикавэл э сиклярдэнги, кай камэл екхараи тэ мангес ко Дэл тай тэ на керэс касэвэти, тай пхукавдяс лэнги акасавко пхукаипэ.

2 — Андэ екхе дизатэ сас цындомари, саво на трашалас катар Дэл тай на ладжялас катар мануша. 3 Андэ одолэ жэ дизатэ бэшэлас пхивли, сави екхараи пхирэлас лэстэ тай мангелас: «Чячимаса кер ми дила, кутардие ман мэ дошалэстар». 4 Саво-то вахыти о цындомари лаки пхэнэлас «на», тай дэчи тюшунды: «Мэ катар Дэл на трашав тай манушэндар на ладжяв, 5 ай адая пхивли на дэл ман рагати. Мэ кан кутардияв ла, тэ на авэл ой генэ тэ быздэрдиел ман».

6 Тай о Сагбус пхэнляс:

— Шунэн, со пхэнляс о хохавно цындомари? 7 Ай сар о Дэл на кан кутардиел одолэн, савэн Ов лиляс, савэ манген Лэс ли о дес ли э рат? Сар Ов кан сидэл э ярдымеса? 8 Пхэнав тумэнги: Ов бисидимаско кан кутардиел лэн. Ай кана о Чяво о Манушыкано кан овэл, Ов кан аракхел пакяпэ опэр пху?

9 Одолэнги, кон пакялас андэ пумаро чячипэ тай фаласа дикхенас карин аврэндэ, о Исус пхукавдяс акасавко пхукаипэ:

10 — Дуй мануша алэ андэ храми тэ манген э Дэвлэс. О екх андар лэндэ сас фарисеи, ай авэр — кидимари э налогенго. 11 О фарисеи ущино тай акаякха пхэнэлас э Дэвлэски: «Дэвла, лачипэ Туки, кай мэ на асавко, сар авэра мануша: чёра, наисаня, кахпэдэс я сар акава кидимари э налогенго. 12 Мэ астарав оразас дувар андэ базари тай дав дэшто паи мэ казандимастар». 13 Ай о кидимари э налогенго тэрдо дурал, на мангелас джи пэ якха тэ ваздэл опрэ, ами марэлас по колин тай пхэнэлас: «Дэвла, ов миласа мандэ, бэзялэстэ». 14 Пхэнав тумэнги, кай адава мануш гело кхерэ чячё ангал Дэл, ами на о фарисеи. Вай кажни, кон ваздэлпэс, кан овэл тикнярдо, ай кажни, кон тикнярэлпэс, кан овэл ваздино.

15 Сарсавэ мануша анэнас ко Исус пуен, Ов тэ колизэл лэндэ. О сиклярдэ дикхенас адава тай тэрдярэнас лэн. 16 Ай о Исус диняс икос лэн Пэстэ тай пхэнляс:

— Мукен о пуя, мэ авэн Мандэ, ма астарэн лэн, вай э Дэвлэско о Патишайлыки си асавкенги, сар он. 17 Пхэнав тумэнги чячипэ: кон на кан лэл э Дэвлэско Патишайлыки, сар пуёс, одова на кан дэл андэ лэстэ.

18 Екх баро мануш пхучляс Лэс:

— Лачё Сикляримарина, со манги тэ керав, тэ овэл мандэ бибытимаско бэшыпэ?

19 — Соски ту пхэнэс Манги «лачё»? — пхэнляс о Исус. — Никхон нанай лачё, екх о Дэл. 20 Ту джянэс о тхэдиматэс: ма кер кахпэлыки, ма мудар, ма чёр, ма хохав, гин дадэс тай дэя.

21 — Алаи адава мэ керав дага катар деса мэ тикнимаскерэндар, — пхэнляс ов. 22 О Исус шунляс адава тай пхэнляс лэски:

— Екх туки на рэсэл. Бикин алаи, со си тутэ, тай дагытие о ловэ ко чёрэ, тай дэчи тутэ кан овэл барвалипэ опрэ. Дэчи эла тай джя пал Мандэ.

23 Кана о баро шунляс адава, ов уло касэвэтлыс, вай сас бут барвало. 24 О Исус дикхляс карин лэстэ тай пхэнляс:

— Со пхаро э барвалэнги тэ дэн андэ Дэвлэско Патишайлыки! 25 Локес эси э камилаки тэ накхел андар ки сувьяко кан, ниш э барвалэски тэ дэл андэ Дэвлэско Патишайлыки.

26 Одола, кон адава шунэлас, пхучлэ:

— Кон дэчи кан кутардиелпэс?

27 О Исус пхэнляс:

— Со нащи керэл о мануш, си зор ко Дэл тэ керэл.

28 Дэчи о Пётар пхэнляс:

— Аки, амэ ачявдям алаи, со амэндэ сас, тай гелям пал Тутэ.

29 О Исус пхэнляс лэнги:

— Пхэнав тумэнги чячипэ: кажни, кон мукляс кхер, я ромня, я пхралэн, я дадэс тай дэя, я пуен булуб э Дэвлэски Патишайлыкески, 30 кан диндёл май бут адалэ вахытестэ, тай дэчи — э бибытимаско бэшыпэ.

31 О Исус гелдяс дэшудо сиклярдэн ригатэ тай пхэнляс лэнги:

— Аки, амэ ваздасамэн ко Иерусалими, тай отхэ кан овэл кердо алаи, со яздылар о прарокя катар Чяво ко Манушыкано. 32 Ов кан овэл дино ко мануша, савэ на джянэн э Дэвлэс. Одола кан асан Лэстар, кан кушэн Лэс, кан чюнгарэн опэр Лэстэ, 33 кан марэн камчияса тай пал отхэ кан мударэн. Ай ко трито дес Ов кан дживиндёл.

34 О сиклярдэ ништо андар адалэстэ на галилэ; алаи, со Ов пхэнляс, сас лэнги пханло, тай он на галёнас, состар Ов пхэнляс.

35 Кана о Исус пашолас ко Иерихони, ко дром бэшло сас коро тай мангелас. 36 Кана ов шунляс, кай пашал джял дюняс, ов пхучляс, со овэл.

37 — Авэл о Исус андар Назарет, — пхэнлэ лэски. 38 Дэчи о коро диняс бэбэря:

— Исус, Чяво э Давидеско! Аядие ман!

39 Одола, кай джянас ангал, лилэ тэ пхэнэн ов тэ пхандэл по муй, ай о коро дэлас бэбэря май лачес:

— Чяво Давидеско, аядие ман!

40 О Исус тэрдило тай пхэнляс, адалэ манушэс тэ анэн Лэстэ. Кана одова пашыло, о Исус пхучляс лэс:

41 — Со ту мангес, Мэ тэ керав туки?

— Сагбуса, мэ мангав тэ дикхав, — пхэнляс о коро.

42 О Исус пхэнляс лэски:

— Дикх! То пакяпэ аиндэрды тут.

43 О коро бирдэн лиляс тэ дикхел тай гело пал Исус, та ли махтадиелас э Дэвлэс. Тай алаи о дюняс, саво дикхелас адава, махтадиелас э Дэвлэс.