1 Пашолас мисяфири Писное Питэнго, кай бучёлас Пэсах. 2 О барэ попазя тай о сикляримаря э Тхэдимаски родэнас, сар тэ мударэн э Исусес, ами трашанас катар дюняс.

3 Дэчи о Сатанас гело андэ Иуда, савэски пхэнэнас Искариот, о екх андар дэшудуй. 4 О Иуда гело тай зборисаило э барэ попазенца тай э салдатенца андар храми, сар тэ дэл лэндэ э Исусес. 5 Одола лошасаилэ тай пхэнлэ, кай кан покинэн лэски. 6 О Иуда пхэнляс лачё тай лиляс тэ родэл вахыти, кана э Исусеса на кан овэл дюняс, тэ пхукавэл Лэс.

7 Уло о дес э Писное Питэнго, кана камэлас тэ чинэн пэсахески бакрорэс, 8 тай о Исус бичялдяс э Пётарэс тай э Иоаннес:

— Джян тай гортярэн амэнги э пэсахеско хапэ.

9 — Катэ Ту мангес, амэ тэ гортярас? — пхучлэ он.

10 Ов пхэнляс:

— Кана тумэ кан авэн андэ диз, кан дикхен манушэс, кай гелэл кхоро панеса. Джян пал лэстэ андэ кхер, катэ ов кан дэл, 11 тай пхэнэн э сагбуски э кхерэскерэски: «О Сикляримари пхучел тут: "Кай о тхан, катэ Мэ кан хав э пэсахеско хапэ Мэ сиклярдэнца?"» 12 Ов кан сикавэл тумэнги баро тхан андэ кхер опрэ, катэ си алаи гортярдо; отхэ да гортярэн хапэ.

13 Он гелэ, тай алаи уло аякха, сар пхэнляс лэнги о Исус, тай он гортярдэ э пэсахеско хапэ.

14 Кана ало о вахыти, о Исус тай Лэскерэ апостоля кидинэпэс пал конас. 15 О Исус пхэнляс лэнги:

— Мэ бут манглём тэ хав адава Пэсах тумэнца ангал Мэ хурлукестэ. 16 Пхэнав тумэнги, Мэ на кан хав генэ лэс джи одолэ вахытески, бискай ов на кан овэл андэ Патишайлыки ки Дэвлэско.

17 Лиляс о кадеи, мангляс андар лэстэ э Дэвлэс, Ов пхэнляс:

— Лэн адава кадеи тай пиен андар лэстэ алаи. 18 Пхэнав тумэнги, кай Мэ на кан пияв катар имишы ки дракхако джи одолэ вахытески, бискай на кан авэл э Дэвлэско Патишайлыки.

19 Дэчи Ов лиляс о манро тай мангляс андар лэстэ э Дэвлэс, пхагердяс лэс тай диняс лэндэ зборэнца:

— Адава си Мо тэни, дино андар тумэндэ. Керэн адава, кана тюшундиен Мандар.

20 Аякха лиляс ли о кадеи пал хапэ тай пхэнляс:

— Адава кадеи — о нэво завети, колимэ Мэ ратэса, саво андар тумэндэ чёрдёл. 21 Аки, о вас одолэско, кон пхукавэл Ман, опэр екх конас Манца. 22 Э Чявэса э Манушыканэса алаи кан овэл аякха, сар сас пхэнло, ай касэвэти одолэ манушэски, саво кан пхукавэл Лэс.

23 Дэчи о сиклярдэ лилэ тэ пхучен екх аврэстэ, кон андар лэндэ би керэлас асавко.

24 Дэчи он лилэ тэ ирищиен, кон андар лэндэ камэл тэ овэл о баро. 25 О Исус дэчи пхэнляс лэнги:

— О патишая дюнядэс барярэнпэс опэр пумарэ манушэндэ, лэнги сагбудэнги пхэнэн, кай он керэн лэнги лачипэ, 26 ай тумэ ма овэн, сар он. Ами мэ овэл алаендар о баро андар тумэндэ сар алаендар о тикно, тай о баро — сар иргати. 27 Вай кон баро: одова, кон овэл пал конас, я одова, кон керэл иргатлыки? Та со, на одова, кон бэшло? Ай Мэ машкарэ тумэндэ сар иргати. 28 Тумэ санусас Манца андэ алаи Мэ пхаримастэ, 29 тай сар Мо Дад диняс Ман патишайлыки, аякха Мэ акана дав лэс тумэн, 30 тумэ тэ хан тай тэ пиен пал Мэ конастэ андэ Мэ Патишайлыкестэ. Тумэ кан бэшэн палко троня тэ керэн цындос дэшудо породэнги э Израилескерэнги.

31 — Симон, Симон, о Сатанас мангляс, тумэ тэ овэн зумавдэ тай шужардэ, сар о гив катар чёплики, 32 ай Мэ мангавас э Дэвлэс андар тутэ, тэ на нашавэс ту то пакяпэ. Тай кана ту кан авэс Мандэ палэ, зоралякер тэ пхралэн.

33 О Пётар пхэнляс:

— Сагбуса, мэ газыри тэ джяв Туса ли андэ пханли, ли ко мэрипэ!

34 Ай о Исус пхэнляс:

— Пхэнав туки, Пётар, дага о башно на кан дэл бэбэря авдес, сар ту тривал кан пхэнэс, кай на джянэс Ман.

35 Дэчи о Исус пхучляс лэндэ:

— Кана Мэ бичялавас тумэн би кисяко, би гонэско, би минидэнго, на рэсэлас тумэнги со-то?

— Алаи рэсэлас, — пхэнлэ он.

36 — Анкха, тэ си тумэндэ киси, лэн ла, лэн ли о гоно, тай тэ нанай тумэндэ камас, дэчи бикнэн тумарэ савутя тай кинэн камас. 37 Пхэнав тумэнги, кай Манца камэл тэ овэл, сар си яздимэ: «Лэс гиндэ сар прахарес». Алаи, со Мандар сас яздимэ, генэ залаг тай кан овэл.

38 О сиклярдэ пхэнлэ:

— Дикх, Сагбуса, амэндэ си дуй камадэс.

— Адава рэсэл, — пхэнляс о Исус.

39 О Исус, сар екхараи керэлас, гело опэр Маслинэнго горас, тай Лэскерэ сиклярдэ гелэ Лэса. 40 Кана алэ ко тхан, о Исус пхэнляс:

— Манген э Дэвлэс, тэ на зумавдён.

41 Ов гело лэндар аборкхески, сар кай чен бар, тэрдило опэр кочендэ тай лиляс тэ мангел э Дэвлэс:

42 — Дадэ, тэ мангес Ту, гел адава кадеи пашал Мандэ. Эй мэ овэл алаи на сар Мэ мангав, ами сар мангес Ту.

43 Дэчи опрал Лэски ало миляики тай зоралякерэлас Лэс. 44 Андэ хурлуки о Исус лиляс тэ мангел э Дэвлэс май лачес, тай кердяспэс Лэско тэри сар каплес ратэски, саво пэрэлас ки пху. 45 Кана Ов ущино тай ало ко сиклярдэ, аракхляс лэн сутэн, вай он сас кхинэ катар касэвэти.

46 — Соски тумэ сутэ? — пхучляс лэн о Исус. — Ущен тай манген э Дэвлэс, тэ на зумавдён.

47 Ов дага пхэнэлас, кана пашыло бут дюняс, ангал джялас одова, саво бучёлас Иуда, о екх андар дэшудуй. Ов пашыло ко Исус, тэ чюмидэл Лэс. 48 О Исус пхэнляс лэски:

— Иуда, ту чюмидимаса пхукавэс э Чявэс э Манушыканэс?

49 Кана одола, кон сас э Исусеса, дикхлэ, со кердёлпэс, он пхучлэ:

— Сагбуса, ами тэ чялаваса камаса?

50 Тай о екх андар лэндэ чялавдяс э иргатес э барэ попазескерэс тай чиндяс лэско кан катар прави риг. 51 Ай о Исус пхэнляс:

— Тэрдярэн, овэл!

Ов колисаило ко кан ки иргатеско тай састярдяс лэс. 52 Дэчи о Исус пхэнляс э барэ попазенги, э салдатенги андар храми тай э барэ манушэнги, савэ алэ пал Лэстэ:

— Та со, Мэ прахари, кай тумэ алянус камадэнца тай дэстэнца? 53 Мэ алаи о деса сомас тумэнца андэ храми, тай тумэ на лилянус Ман. Ай анкха тумаро вахыти, анкха о барипэ э тэминако.

54 Он астардэ Лэс тай гелдэ андэ кхер ки барэ попазеско. О Пётар астарэласпэс сар дур, джялас пал лэндэ. 55 Машкарэ ки бар тхардэ яг, о Пётар екхетханэ аврэ манушэнца бэшло ки яг. 56 Екх андар иргатинкес дикхляс, сар о Пётар бэшло паш ки яг, лачес дикхляс карин лэстэ тай пхэнляс:

— Адава мануш сас Лэса.

57 Ай о Пётар пхэнляс: «На».

— Мэ на джянав Лэс, джювлие, — пхэнляс ов.

58 Дэчи кон-то авэр дикхляс лэс тай пхэнляс:

— Ту сан екх андар лэндэ.

— На, мануша, — пхэнляс о Пётар.

59 Накхло генэ сагати, тай кон-то чячимаса пхэнляс:

— Чячес, адава мануш сас Лэса, вай ов галилеяни.

60 Ай о Пётар пхэнляс:

— Мануша, мэ на джянав, состар ту пхэнэс!

Тай одова вахыти, кана ов дага пхэнэлас, диняс бэбэря о башно. 61 О Сагбус болдиняспэс тай дикхляс карин Пётар. Дэчи ко Пётар ало ки годи о зборэс э Сагбуски, сар Ов пхэнляс лэски: «Бискай дэл бэбэря о башно авдес, ту тривал кан болдэстут Мандар».

62 Тай никлисто о Пётар аври, ов лачес руно.

63 О салдатя, кай дикхенас пал Исус, лилэ тэ асан Лэстар тай тэ марэн Лэс. 64 Он пхандэнас Лэски якха тай пхученас:

— Прароки, пхэн, кон Тут чялавдяс?

65 Тай пхэнэнас Лэски бут авэра кушымаски зборэс.

66 Кана уло дес, о барэ мануша э дюняски, о барэ попазя тай о сикляримаря э Тхэдимаски кидинэпэс екхетханэ. Андэ э Исусес тай тхэдэ Лэс ангал синедриони.

67 — Ту тэ сан о Христос, пхэн амэнги, — пхэнэнас он.

О Исус пхэнляс:

— Мэ тэ пхэнава тумэнги, тумэ на кан пакян. 68 Ай Мэ тумэн тэ пхучява, тумэ Манги на кан пхэнэн. 69 Акана о Чяво о Манушыкано кан овэл бэшло катар прави вас катар Дэвлэски зор.

70 Он алаи лилэ тэ пхучен:

— Та со, Ту о Чяво э Дэвлэско?

Ов пхэнляс:

— Тумэ пхэнэн, кай адава Мэ.

71 Дэчи он пхэнлэ:

— Касавке генэ амэнги камэл сикаиматэс? Амэ шунлям адава андар Лэски уштэндэ!