34
Dujto vakeriben le Elihuskro
1 Avke o Elihu pale phenďa:
2 „Šunen mire lava, tumen goďaver manušale;
šunen man, tumen avrisikade manušale!
3 Bo o kan preskušinel o lava avke,
sar e čhib koštoľinel o chaben.
4 Aven, rozsudzinas, so hin čačo;
aven, sprindžaras jekhetane, so hin lačho.
5 Bo o Job phenďa: ‚Som spravodľivo,
ale o Del man na kamel te sudzinel čačipnaha.
6 Kajte man hin čačo, phenen pre ma, hoj som klamaris;
kajte som bi o binos, leskro šipos man zraňinel pro meriben.‘
7 Hin vareko ajso sar o Job,
savo vakerel pro Del avke lokes, sar te piľahas paňi?
8 Ov pes ľikerel le nalačhenca
a phirel le binošnenca.
9 Bo phenďa: ‚Le manušes nane chasna olestar,
hoj kamel te avel le Devleske pre dzeka.‘
10 Vašoda man šunen, tumen manušale, so achaľon!
O Del šoha na kerďahas oda, so nane lačho,
o Nekzoraleder šoha na kerďahas oda, so nane čačo!
11 Bo ov počinel le manušeske pal oda, sar kerel,
a kerel sakoneha pal oda, sar dživel.
12 Se o Del šoha na kerďahas o nalačhipen,
o Nekzoraleder na previsarďahas o čačipen.
13 Ačhaďa les vareko aver rajeske upral e phuv?
Diňa leske vareko aver e zor upral calo svetos?
14 Te peske o Del zaiľahas andro jilo,
hoj lela pale peskro duchos the peskro dichos,
15 ta savoro džido jekhvareste našľiľahas
a o manuš geľahas pale andro prachos.
16 Te sal goďaver, šun kada;
šun, so phenav.
17 Či šaj vladňinel oda, ko našťi avri ačhel o spravodľišagos?
Odsudzineha le Spravodľivones the le Zorales?
18 Či nane ov Oda, ko phenel
le kraľiske: ‚Na mos ňič!‘
a le rajeske: ‚Tu nalačho manušeja!‘?
19 Ov nane oda, ko chudel paš o raja
abo del buter pačiv le barvales le čorestar;
se ov stvorinďa savore manušen.
20 Jekhvareste meren, pal jepaš rat;
o manuša izdran a našľon;
o zorale hine ile het bi oda,
hoj pes lendar o manuš te chudel.
21 Bo leskre jakha dikhen pro droma savore manušengre;
pozorinel savore lengre kroki.
22 Ňikhaj nane ajso baro kaľipen,
kaj pes šaj garudehas ola, ko keren o nalačhipen.
23 O Del na mušinel te del te džanel le manušeske anglal,
kana avela pre le Devleskro sudos.
24 Ov ňičinel le zorale muršen bi oda, hoj len ešeb te šunel avri,
a pre lengre thana thovel avren.
25 Bo ov džanel lengre skutki,
avel pre lende rači a hine zňičimen.
26 Vaš lengro nalačhipen len marel ode,
kaj oda savore manuša šaj dikhen,
27 bo pes lestar visarde a na džanas pal leste
a na prilenas ňisavo leskro drom.
28 Vašoda doavľa o roviben le čore manušengro anglo Del
a šunďa avri lengro mangipen.
29 Te ov pes rozhodňinel, hoj na kerela ňič, ko les šaj obviňinel?
Te garuvel peskro muj, ko les šaj dikhel?
Se ov vladňinel upral dojekh narodos the manuš,
30 hoj te na kraľinel o nalačho manuš,
hoj te na zachudel le manušen andre pasca.
31 No te tu phenďalas le Devleske:
‚Somas mardo vaš mire bini
a imar na kerava o nalačhipen.
32 Sikav mange, so na achaľuvav,
te kerďom vareso nalačho, imar oda na kerava!‘?
33 Kames, hoj tuke o Del te počinel pal tiro,
bo na priles oda, so ov kerel?
Tu tuke mušines te kidel avri, na me!
No phen, so gondoľines!
34 O manuša, save achaľon,
the o goďaver manuša, so man šunen, phenena,
35 hoj o Job vakerel nagoďaha
a leskre lavenge chibaľinel e goďi.
36 Oj, te uľahas o Job skušimen dži o koňec,
bo odphenel avke sar o binošno manuš!
37 Paš peskro binos mek pridel e vzbura,
angle amende asal le Devlestar
a vakerel furt buter lava pre leste.“