O Žalmos 34
1 Le Davidoskro žalmos. Sar pestar kerelas dilino anglo Abimelech, savo les tradňa het, a ov geľa het.
2 Bararava le RAJES andre dojekh časos,
lašarava les furt mire vuštenca.
3 Lašarava man le RAJEHA,
ola, ko hine trapimen, oda šunena a radisaľona.
4 Bararen manca le RAJES,
aven bararas jekhetane leskro nav!
5 Rodavas le RAJES a odphenďa mange,
iľa man avri andral dojekh dar.
6 Ola, ko pre leste dikhena, švicinena,
lengre muja pes šoha na ladžana.
7 Somas andro pharipen bi e zor,
ale vičinavas pro RAJ a šunďa man avri,
iľa man avri andral savoro pharipen.
8 Le RAJESKRO aňjelos stražinel olen, ko pes lestar daran,
a cirdela len avri.
9 Koštoľinen a dikhen, savo lačho hin o RAJ!
Bachtalo hin o manuš, savo pes denašel andre leste te garuvel.
10 Tumen, leskre manušale, daran le RAJESTAR,
bo olen, ko pes lestar daran, hin savoro, so lenge kampel.
11 O terne ľevi šaj bokhaľon, bo nane len so te chal,
ale olenge, ko roden le RAJES,
na chibaľinela ňisavo lačhipen.
12 Aven, čhavale, šunen man,
sikavava tumen, sar kampel te del pačiv le RAJES!
13 Oda, ko kamel o dživipen
a kamel te dživel baro the bachtalo dživipen,
14 mi zľikerel e čhib le nalačhe lavendar
a o vušta le klamišagostar.
15 Visar tut het le nalačhipnastar,
ker o lačho
a rode o smirom andral calo jilo.
16 Le RAJESKRE jakha dikhen pro spravodľiva manuša,
leskre kana šunen lengro roviben.
17 Ale le RAJESKRO muj džal pre ola, ko keren o nalačhipen,
hoj te khosel tele lengro nav pal e phuv.
18 O spravodľiva peske mangen e pomoca a o RAJ len šunel;
cirdel len avri andral dojekh pharipen.
19 O RAJ hino pašes olenge, kas hin dukh pro jilo,
zachraňinel olen, ko imar na birinen pro duchos.
20 O spravodľivo šaj precerpinel but nalačhipena,
ale o RAJ les lela avri andral savoreste.
21 Chraňinel savore leskre kokala,
aňi jekh leske na phadžola.
22 O nalačhipen murdarela le nalačhes;
oda, ko našťi avri ačhel le spravodľivones, ela odsudzimen.
23 Ale o RAJ cinela avri e duša peskre služobňikengri.
Ňiko, ko pes denašel andre leste te garuvel, na ela odsudzimen.