O Žalmos 135
1 Haleluja!
Lašaren le RAJESKRO nav,
lašaren les, služobňikale le RAJESKRE,
2 save služinen andro kher le RAJESKRO,
pro dvori andro kher amare Devleskro.
3 Lašaren le RAJES, bo o RAJ hino lačho,
giľaven leskre naveske, bo hino šukar.
4 Se o RAJ peske kidňa avri le Jakob;
le Izrael, hoj leske te patrinel.
5 Me džanav, hoj o RAJ hino baro;
amaro RAJ hino bareder savore devlendar.
6 O RAJ kerel savoro, so kamel,
pro ňebos the pre phuv,
andro moros the andre savore leskre hlbini.
7 Prianel o chmari dži pal o agor la phuvatar;
bičhavel o bleski le brišindeha
a mukel avri e balvaj andral peskre skladi.
8 Ov murdarďa andro Egipt savoren, so uľile ešebna,
le manušendar dži o dobitkos.
9 Bičhaďa o znameňja the o zazraki
pre tute, Egiptona,
pro Faraonos the pre savore leskre služobňika.
10 Domarďa but naroden
a murdarďa le zorale kraľen:
11 le Sichon, le amorejike kraľis,
le Og, le bašaňike kraľis,
the savore kraľen andro Kanaan.
12 Lengri phuv diňa sar ďeďictvos,
sar ďeďictvos le Izraeloske, peskre manušenge.
13 RAJEJA, tiro nav hino večno,
pal tiri slava, RAJEJA, pes vakerela pal jekh pokoleňje pre aver.
14 Bo o RAJ zaačhela vaš peskre manuša pro sudos
a ela jileskro ke peskre služobňika.
15 O modli le narodengre hine rupune the somnakune,
kerde len o manuša peskre vastenca.
16 Hin len vušta, ale na vakeren,
hin len jakha, ale na dikhen.
17 Hin len kana, ale na šunen,
aňi našťi dichinen peskre mujenca.
18 Ola, ko len keren, ena ajse sar on,
ajse ena savore, ko pes pre lende muken.
19 Manušale, khereja le Izraeloskro, lašar le RAJES!
Rašajale, khereja le Aronoskro, lašar le RAJES!
20 Levitale, khereja le Leviskro, lašar le RAJES!
Tumen, so daran le RAJESTAR, lašaren le RAJES!
21 Mi džal e chvala le RAJESKE andral o Sion,
oleske, ko bešel andro Jeruzalem!
Haleluja!