1 Ай дэнзор андо курко жувля линэ гытосардэ мастина и жыле кав склэпо. 2 Онэ дикхле, со бар сас отшуто лэ склэпостар. 3 Кала зажыле, онэ на аракхле тило лэ Раеско Исусоско. 4 Онэ на полэнас, со тердяпэ, и акэ, сикадэпэ лэнди дуй мурша андэ йида, сави свэтосавэлас, сар молния. 5 Даратар жувля обмэкле пэстирэ муя тэлэ, нэ кола пхэндэ лэнди:

— Со тумэ родэн жундэс машкар мулэ? 6 Лэс катэ нинай, Вов жундиля! Тумэ сэрэн, со Вов пхэнэлас тумэнди, кала сас инке андэ Галилея: 7 «Шавэс Манушыканэс трэбуй сас тэ отдэн андэ васта бэзэхалэ манушэнди, тэ примарэн кав трушул. Нэ по трито дес Вов жундёла».

8 Тунчи онэ сэрдэ Лэстирэ лава. 9 Онэ рисайле лэ склэпостар и роспхэндэ пала вся када дэшуекхэ апостолонэнди и аврэнди, ко сас лэнца. 10 Када сас Мария Магдалина, Иоана, дэй Иаковостири, савя кадя ж акхарэнас Мария и авэр жувля, савэ сас лэнца. Онэ роспхэндэ вся када апостолонэнди, 11 нэ апостолоря на патяйле лэнди. Лэнди сикадяпэ, со када качи шушэ лава. 12 Ай Пэтро вщиля и прастая кав склэпо. Вов тэлиля и задикхля андрэ, нэ удикхля качи материя. Вов рисайля пэстэ, дивосайля всаворэсти, со тердяпэ.

13 Андэ кодва ж дес дуй андай сытярнэ жанас андо гав Эмаусо, саво сас варикай дэшудуй километроря лэ Иерусалимостар. 14 Онэ дэнас дума машкар пэстэ пала вся, со тердяпэ. 15 И кала онэ дэнас дума и роспушэнас екх екхэстар, Ежэно Исусо поджыля и жыля лэнца. 16 Нэ лэндирэ якха сас затердэ, и вонэ на ужангле Лэс.

17 Исусо пушля лэндар:

— Пала со када тумэ дэн дума машкар пэстэ, сар жан пав дром?

Онэ тэрдиле, и муя лэндэ сас грыжомэ. 18 Екх лэндар, савэс акхарэнас Клеопа, пхэндя:

— Ту, душол, авилян андо Иерусалимо и екх, саво на жанэл пала кода, со тердяпэ андэ кала деса?

19 — Пала со? — пушля Иисусо.

— Со тердяпэ Исусоса андав Назарето, — пхэндэ онэ. — Вов сас пророкоса, зорало англав Дэл и англай всаворэ мануша андэ лава и рындоря. 20 Амарэ барэ рашая и пхурэдэра сындосардэ Лэс по миримос и примардэ кав трушул. 21 Ай амэ ажутярасас, со Вов исин Кодва, Саво трэбуй сас тэ фэрисарэл лэ Израилёс. Нэ акэ, трито дес, сар вся када тердяпэ. 22 Нэ коисавэ андай амарэ жувля дивосардэ амэн: онэ жыле дэнзор кав склэпо 23 и на аракхле котэ Лэско тило, рисайле и роспхэндэ амэнди, со онэ дикхле ангелон, савэ пхэндэ, кай Вов жундо. 24 Тунчи коисавэ андар амарэ жыле кав склэпо и удикхле котэ вся, сар роспхэндэ жувля, но Лэс онэ на дикхле.

25 Вов пхэндя лэнди:

— Савэ тумэ бигодятирэ и сар тумэ найсыго патян всаворэсти, со пхэнэнас пророкоря! 26 Чи на трэбуй сас лэ Христости тэ грыжолпэ и тэ зажал андэ Пэстири слава?

27 И ля лэ Моисеёстар и всаворэ пророконэндар тэ роспхэнэл лэнди, со пхэнэласпэ пала Лэстэ андэ всаворо Пистросаримос. 28 Кала онэ поджыле гавэстэ, каринг онэ жанас, Исусо сикадя, кай камэл тэ жал майдур, 29 нэ онэ фартэ мангэнас Лэс:

— Ашпэ амэнца. Поджал рят, дес прожыля.

И Вов зажыля андо чер и ашыляпэ лэнца. 30 Кала Исусо бэшэлас лэнца палай мэсали, Вов ля марно, наисардя Дэвлэс, пэрэпхагля и дя лэнди. 31 Тунчи лэндирэ якха отпхэрнадэпэ, и онэ гатярдэ Лэс. Нэ Вов ашыля важ лэнди надикхло. 32 Онэ линэ тэ пхэнэн екх екхэсти:

— Чи на пхабонас андэ амэндэ водя, кала Вов дэлас дума амэнца пав дром и отпхэрнавэлас амэнди Пистросаримос?

33 Андэ кодья ж вряма онэ вщиле и жыле палпалэ андо Иерусалимо. Котэ онэ аракхле дэшуекх апостолон и колэн, ко сас лэнца. 34 Кола пхэндэ лэнди, со о Рай чячес жундиля и сикадиля лэ Симоности. 35 Тунчи кала дуй роспхэндэ вся, со сас лэнца пав дром, сар онэ ужангле Исусос, кала Вов пхагэлас о марно.

36 Онэ инке дэнас дума, сар Ежэно Исусо ашыля машкар лэндэ и пхэндя:

— Миро тумэнди!

37 Онэ замуле даратар, гындонас, со дикхэн духос. 38 Вов пхэндя лэнди:

— Состар тумэ даран? Состар тумэ на састэс патян? 39 Подикхэн пэ Мэрнэ васта и пэрнэ. Када ж Мэ! Лэнпэ Мандэ и роздикхэн. Кав духо нинай тило и кокаля, ай Мандэ, сар дикхэн, исин.

40 Вов пхэндя када и сикадя лэнди Пэстирэ васта и пэрнэ. 41 Нэ онэ лошатар инке на патянас и дивосавэнас. Тунчи Исусо пушля лэндар:

— Тумэндэ катэ исин варисо тэ хан?

42 Онэ подинэ Лэсти котор пэко мащё. 43 Вов ля и халас англай лэндэ.

44 — Пала када Мэ пхэнавас тумэнди, кала сымас инке тумэнца, — пхэндя Вов. — Вся, со запистросардо пала Мандэ андо Законо Моисеёско, кай пророкоря и андэ псалморя трэбуй тэ терэлпэ.

45 Тунчи Вов лэнди отпхэрнадя годи, кай онэ тэ полэн Пистросаримос.

46 — Пистросардо, со сас лэ Христости тэ грыжолпэ и по трито дес тэ жундёл андай мулэ, — пхэндя Вов. 47 — Важ Алав Лэско всаворэнди манушэнди, майанглал Иерусалимостар, тунчи пай всаворэ пхувья, авэла роспхэндо, кай онэ тэ каисавэн и тунчи простисарэнапэ лэндирэ бэзэха. 48 Тумэ авэна пала вся када тэ роспхэнэн. 49 Акэ, Мэ бишалава тумэнди кода, пала со дя лав Мэрно Дад, нэ тумэ ашэнпэ андо форо Иерусалимо, жы кала прилэна зор упралимастар.

50 Тунчи Вов выандярдя лэн андав форо кай Вифания, вазгля васта и бахталисардя лэн. 51 Андэ кодья вряма, кала Вов бахталисарэлас лэн, Вов ля тэ отжал лэндар и тэ ваздёл по болыбэн. 52 Сытярнэ тэлинэ Лэсти и баря лошаса рисайле андо Иерусалимо. 53 Онэ сас всавори вряма андо храмо и лашарэнас лэ Дэвлэс.