1 Avoso nia Devita sapu rapata ia ri tinoni Pilisitia sa vasileana pa Keila, meke hikoi rini sari na kiko huiti tiqe ta paketedi. 2 Ke nanasia sa se Zihova, “Boka la razai rau sari na tinoni Pilisitia?”

“Uve,” gua se Zihova. “Rapati, mamu harupia sa vasileana pa Keila.”

3 Ba zama la ia ri nana tie se Devita, tani mo pa Ziuda ba korapa matagutu mo si gami, namu kote hola latu si pude la pa Keila vasina koa sari tinoni varipera tadi na tie Pilisitia. 4 Ke nanasa pulea Devita se Zihova meke zama ia Zihova, “La, mamu la rapatia sa vasileana pa Keila sina kote ponini gamu Rau sa minataqara pude va kilasi sari na tinoni Pilisitia.”

5 Ke topue la pa Keila se Devita meke sari nana tie, meke la rapati rini sari na tinoni varipera Pilisitia, sokudi si va matei rini meke vagi sari dia bulumakao, na kurukuru ṉame. Gua asa harupu gunia e Devita sa vasileana pa Keila.

6 Sipu govete se Abiata sa tuna e Ahimeleki meke la somanae koe Devita pa Keila, si palekia sa sa poko hopena tana ṉati hiama, sapu hoke varavara nia rini la koe Tamasa.

7 Tozi nia rini se Saula sapu ele la gua pa Keila se Devita, meke zama si asa, “Ele vekoa Tamasa pa qua ṉiniraṉira. Voi pule nia pa sipata se Devita sipu nuquru la ia sa sa vasileana koa ia na goba meke na sasada nomana sapu koai na rorotoana roza pude tuku betoi.” 8 Ke tiokia Saula sa nana qeto minate, pude ene gore la pa Keila pude la koa vari likohae nia sa vasileana meke tuqe vagia se Devita meke sari nana tinoni, gua.

9 Sipu avoso nia e Devita sapu korapa mizimizi hiva rapatia Saula si asa, si zama la ia sa se Abiata sa hiama, “Paleke mae nia tani sa poko tana hiama.” 10 Meke zama se Devita, “Zihova, Tamasa tadi na tie Izireli, ele avoso nia rau sapu korapa mizimizi hiva gore mae huaria e Saula sa vasileana Keila pa guguaqu rau, sa mua nabulu. 11 Vegua, kote vala au mo rina tie pa vasileana Keila koe Saula si rau? Kote mae hinokara se Saula, gua sapu ele avoso nia rau? Zihova Tamasa tadi na tie Izireli, tepa Igo rau, mu olaṉau.”

Meke olaṉa se Zihova, “Kote mae se Saula.”

12 Meke nanasa pule guahe se Devita, “Vegua, kote vala pani au mo rina tiena sa vasileana Keila si rau, meke sari na qua tie koe Saula?”

“Kote valani gamu rini,” gua se Zihova.

13 Ke taluarae se Devita meke sari nana tie pa Keila, meke ririzu tokele la. Tata ka onomo gogoto saripu luli koasa. Sipu avoso nia e Saula sapu ele govete se Devita meke sari nana tie si malohoro gore pule mo sa hiniva te Saula, meke lopu la pa Keila si asa.

14 Tome lamae se Devita koari na vasina toqetoqereana pa korapa qega tata pa popoa ivuluna sapu ta pozae Zipi. Podeke sisigitia tugo e Saula pude dogoria, ba lopu va malumia Tamasa pude dogoria Saula si asa. 15 Koa pa Horesi se Devita koasa qega tata pa Zipi. Gilania Devita sapu korapa hata ia Saula pude va matea si asa. 16 La va manotia Zonatani pa Horesi, se Devita, meke tozi nia sa koasa sa vina sare te Tamasa. 17 “Mu lopu matagutu,” gunia sa, “Lopu kaqu boka ṉovaligo e Saula sa tamaqu si goi. Gilana valeana nia nana sa sapu agoi si kote na baṉara pa popoa Izireli, meke arau si kote na vina ruamu agoi.” 18 Tavetia ri karua si keke vina tatara madina koasa dia kinoa binaere pa kenuna e Zihova, meke pule nana se Zonatani pa nana popoa, koa hola se Devita pa Horesi.* 1 Samuela 18:3

19 Kaiqa tie pa popoa qega Zipi si la totozi koe Saula pa Qibea, “Devita si korapa tome pa mami kali popoa pa Horesi pa toqere Hakila, pa kali latu pa popoa Zesimoni pa popoa ivuluna pa Ziuda.* Sam 54 20 Mami baṉara, gilana valeania gami sapu hiva sisigiti pude tuqe vagia goi si asa, ke mamu mae pa mami kali popoa, mami toka nigo pude mu tuqe vagia si asa.”

21 Olaṉa se Saula, “Mani manani gamu e Zihova koasa mia tinokae koa rau. 22 Keke totoso pule mu la, mamu gilana valeania, pavei zoṉazoṉa si koa sa meke esei dogorona. Ele avoso nia rau sapu tumatumaena hola si asa. 23 Hata vura ni, pavei zoṉazoṉa sari vasidi pu tome si asa, lopu muliṉi nia pude va kamo pule mae ia sa inavoso koa rau, meke kote tiqe luli gamu rau. Be korapa koa nana koasa vasina asa, si kaqu hata luli va hitehitekia rau pa korapana sa butubutu Ziuda.”

24 Ke taluarae va kenue koe Saula meke pule la pa Zipi si arini. Koanana pa qega pa Maoni se Devita meke sari nana tie, koa keke lolomo qega ivivuluna, pa kali latu pa popoa Zesimoni pa Ziuda. 25 Taluarae se Saula meke sari nana tie pude la hata ia se Devita, ba avoso nia Devita si asa ke la koa nana koasa toqere patupatu pa korapa qega pa Maoni. Sipu avoso nia e Saula sapu gua asa, si hadu lulia sa se Devita. 26 Koa pa keke kalina sa toqere se Saula meke sari nana tie, meke e Devita meke sari nana tie, si pa keke kalina. Tuturei sisigiti govete nia rini se Saula meke sari nana tie sapu korapa zuzuku nono la pude tuqe vagi si arini. 27 Ba kamo mae koe Saula si keke nabulu paleke inavoso meke zama koasa, “Tuturei pule mae! Korapa rapata nia rina tinoni varipera tadi na tie Pilisitia sa nada popoa.” 28 Ke noso mo hadua Saula se Devita, meke pule la rapati mo sa sari tinoni Pilisitia. Gua asa ke ta pozae na Toqere Vinari Paqahi sa vasina asa. 29 Taluarae se Devita meke la gua pa kali popoa pa Eqedi, vasina si koa tome sa.