1 Ego, kekenu hiera tugo sari na qua zinama koari doduru tie te Karisito. Mada varavara toka ni sari doduru tie pa tinepatepa, meke na zinama leana koe Tamasa. 2 Mada varavara ni sari na baṉara, meke sari doduru pu tago ṉiniraṉira, pude mada koa valeana pa binule si gita na tie te Karisito. Pude mada toa nia sa tinoa toṉotona gugua te Tamasa, pude mada koa madi koa Sa. 3 Leana si gua asa, meke qetu nia sa Tamasa sapu harupu gita. 4 Asa tugo hivani gita si gita doduru pude ta harupu, meke pude gilania sa hinokara. 5 Sina keke mo sa Tamasa, meke sa tie varikarovae koe Tamasa meke pa tie, sapu e Zisu Karisito sa tie hinokara. 6 Poni pule nia Sa sa Nana tinoa pude vata rupahi sari doduru tie pa sinea. Asa sa vina sosode pa totoso garona, sapu hiva nia Tamasa pude di ta harupu sari doduru tie. 7 Gua asa, ke ta vizata si arau pude na apositolo, meke ta garunu nia rau, pude tarae nia na variva tumatumae nia koari na tie Zenitailo d sa Inavoso Leana tanisa rinaṉeraṉe meke sa hinokara. Gua sapu zama nia rau si hinokara; lopu kokohaqu.* 2 Tim 1:11

8 Koari doduru vinahesi pa ekelesia, si hiva ni rau sari na tie pu via bulodi koe Tamasa, pude madi va sagei limadi pa vinaravara, meke loke dia vinaritokei na vinaribugori. 9 Meke sari na barikaleqe, si hiva ni rau pude pokopoko valeana pa pinamaṉa na vina pepekae, ba lopu va sarisari ni qolo na vovoto davi sari na kaludia, na va sage poko arilaedi hola.* 1 Pit 3:3 10 Ba sapu doṉo lea koe Tamasa, si na dia tinavete leadi tu; arini tu si garogaro koari na barikaleqe pu pamaṉa nia sa Tamasa. 11 Sari na barikaleqe si madi koa noso pa vina pepekae pude tava tumatumae. 12 Lopu va malumi rau sari na barikaleqe pude variva tumatumae, meke ululu hola ni sari na palabatu, ke madi koa noso si arini. 13 Ura e Adama tu si ta tavete kekenu koe Tamasa, meke mumudi se Ivi.* Zen 2:7,21-22 14 Meke lopu e Adama si ta sekesekei koe Setani, ba e Ivi tu; ke sa barikaleqe tu si ta sekesekei koe Setani, meke hoqa pa sinea.* Zen 3:1-6 15 Ba kaqu ta harupu sari na barikaleqe pa pinododi rina dia koburu, be lopu makudo koa va nabu pa rinaṉeraṉe na tataru, meke koa via, na leana pa dia hahanana.