1 Keke rane, sa puku vinarigara poropita sapu kopu nia Ilaisa si zama nominomi la koasa, “Sa vasina sapu koa ia gita he si hiteke hola! 2 Va malumu gami pude la mahoi gami sari na huda tata pa Ovuku Zodani pude mami kuria si keke vetu vasina pude mada koa vasina,” gua si arini.

Meke olaṉa se Ilaisa, “Leana,” gua si asa.

3 Ba keke arini si ria ososo nia se Ilaisa pude luli koa rini; ke va egoi sa, 4 meke topue varigara la si arini. Meke sipu kamo rini pa Zodani, si podalae tavetavete si arini. 5 Meke sipu korapa maho va hoqa ia keke koa rini si keke huda, si lobusu va hodaka meke hoqa lodu nana pa korapa kolo sa livona sa maho, meke velavela la gua koe Ilaisa si asa, “Kei, nasa si kote boka tavetia rau! Na vagi pakia mo rau pa keke tie sa maho hie!”

6 “Pavei hoqa si asa?” nanasa gua se Ilaisa, meke va dogoro nia sa tie sa vasina sapu hoqaia sa, meke seke vagia Ilaisa si keke huda hite, meke gona la nia sa pa kolo, meke va ale vura ia sa pa beru kolo sa livo maho. 7 “Taṉini vagia,” gua si asa; meke kokopo gore sa tie, meke vagi sage nia.

8 Meke varipera la koari na tinoni Izireli sa baṉara pa Siria. Meke zamai sa sari nana palabatu nomadi pa vinaripera pude vizatia si keke vasina pude la koa varigara si arini. 9 Ba garunu la zinama koasa baṉara pa Izireli se Ilaisa, meke va balau ia pude lopu tata la koasa vasina asa, sina korapa tome aqa vasina sari na tinoni Siria, gua. 10 Ke va balau i sa baṉara pa Izireli sari na tinoni pu koa koasa vasina asa, meke kopu totoko ni rini si arini. Kaiqa totoso si ta evaṉa sapu gua asa.

11 Meke ta ṉaziri sisigiti nia sa baṉara tadi na tinoni Siria sapu gua asa, meke tioki sa sari nana palabatu nomadi pa vinaripera meke nanasi sa si arini, “Ari sei gamu si koa pa kalina sa baṉara Izireli?” gua si asa.

12 Meke olaṉa si keke arini, “Namu loke tie qua baṉara. Be guana zama si agoi pa korapa mua lose putana, ba e Ilaisa sa poropita si kote tozi nia sa baṉara pa Izireli sapu gua zama nia goi.”

13 “La mamu hata ia vasina koa si asa, pude maqu tuqe vagia,” gua sa baṉara.

Ba sipu tozi nia rini sapu pa Dotani tu se Ilaisa, gua, 14 si garunu la nia sa si keke qeto minate varipera lavata vasina, sari na hose na totopili na gua. Meke la kamoa rini pana boṉi sa vasileana nomana meke vari likohae nia rini si asa. 15 Meke pana munumunu hokara koasa koivugona sipu vaṉunu sa nabulu te Ilaisa, meke vura koasa vetu si dogoria sa sa qeto minate lavata tadi pa Siria, meke sari na dia hose na totopili varipera sapu vari likohae nia sa vasileana lavata. Meke zama la koe Ilaisa si asa, “Kei baṉara, nasa si kaqu tavetia gita?”

16 Meke olaṉa se Ilaisa, “Mu lopu matagutu, soku hola si koa pa nada kalina, hola nia koasa dia kalina,” gua si asa. 17 Meke varavara si asa, “Kei Zihova, Mu va vaṉuni sari matana, mamu va dodogorae ia si asa!” Meke va tabea e Zihova sa nana vinaravara, meke doṉo sage la sa nabulu te Ilaisa meke dogoria sa sa toqere sapu siṉia na hose na totopili nika meke koa vari likohae nia rini se Ilaisa.

18 Meke sipu ene nono gore mae sari na kana si varavara se Ilaisa, “Kei Zihova va behui sari na tie hire!” Meke va tabea e Zihova sa nana vinaravara meke va behui Sa si arini. 19 Meke ene la koa rini se Ilaisa, meke zama, “Ene sea nia gamu sa siraṉa. Lopu hie sa vasileana nomana sapu hata ia gamu, mae luli au, maqu turaṉa lani gamu koasa tie sapu hata lulia gamu.” Meke turaṉa lani sa si arini pa Sameria.

20 Meke koasa totoso sipu nuquru la ia tugo rini sa vasileana lavata, si varavara gua pule se Ilaisa, “Kei Zihova, Mu va vaṉuni matadi, pude madi dodogorae si arini,” gua. Meke va tabea Tamasa sa nana vinaravara, meke va vaṉuni Sa sari na matadi, meke gilania rini sapu ele pa korapa popoa Sameria si arini.

21 Meke sipu dogori sa baṉara pa Izireli sari na tinoni Siria, si nanasia sa se Ilaisa, “Tamaqu, kaqu va matei rau sari? Kaqu va matei rau sari?” gua si asa.

22 Meke olaṉa se Ilaisa, “Lokari, sarini mo pu pusi vagi goi pa vinaripera, ba lopu kaqu va matei goi. Meke lopu keke arini hire si kaqu tava mate. Poni ginani na napo mo goi si arini, beto mamu va pule lani koasa dia baṉara,” gua si asa. 23 Ke tavete poni inevaṉa lavata sa baṉara si arini, meke pa mudina sipu hena na napo si arini, si garunu pule lani sa koasa baṉara pa Siria si arini. Ke noso hite sa vinaripera la pa popoa Izireli tadirini.

24 Meke sipu hola kaiqa totoso si turaṉia sa baṉara Beni Hadadi sa doduruna sa nana qeto minate varipera lavata pude la raza ia sa popoa Izireli, meke la vari likohae nia rini sa vasileana lavata pa Sameria. 25 Ego koa gua sapu gua asa, si ta evaṉa sa inovia pa korapana sa vasileana lavata sapu namu kaleana hola, meke sa hinoluna keke batu doṉ'ki si ka vesu ṉavulu puta poata siliva* Sa padana si karua paoni., meke sa kukuru kilo mamatana sa aenani pinomona si ka lima siliva hinoluna.

26 Keke rane sipu ene hola gua koasa gobana sa vasileana lavata sa baṉara, si velavela la koasa si keke barikaleqe, “Kei toka nau qua baṉara,” gua si asa.

27 Meke olaṉa sa baṉara, “Be lopu toka nigo e Zihova si goi, si nasa si kote boka ponigo rau? Na ari gequ huiti na vaeni si rau? 28 Sa sa mua tinasuna?” Meke olaṉa sa barikaleqe, “Keke rane si zama koa rau sa barikaleqe hie sapu kote gania gami karua sa qua koburu, meke beto asa si kote gania gami sa nana koburu pa koivugona gua. 29 Ke kina ia gami sa tuqu koreo meke hena ia. Meke pa koivugona si zama ia rau si asa, pude kina ia sa tuna koreo meke hena ia gua, ba tomea sa si asa.”* Diut 28:57; KTZ 4:10

30 Sipu avosia sa baṉara sapu gua asa, si daku rikati sa sari nana poko, pude va dogoro nia sa nana tinalotaṉa, meke dogoria rina tie sapu koa tata koa sa gobana sa vasileana lavata, sapu poko korapae nia sa sa poko baika. 31 Meke zama si asa, “Kaqu ta kupa ruana se Ilaisa sa tuna e Sapati. Kaqu va kilasa zoṉazoṉau e Zihova si rau be lopu tavetia rau sapu gua asa, sipu lopu ele opokaputu, sa popoa!” gua si asa. 32 Meke garunia sa si keke tie pude turaṉa mae nia se Ilaisa. Koa sa totoso hie si koa turaṉi Ilaisa pa nana vetu sari kaiqa koimata pa vasileana saripu la vari hopikae koa sa. Sipu lopu ele la kamo sa tie paleke inavoso tanisa baṉara, si zama la koari na koimata se Ilaisa, “Sa tie variva mate si korapa garunu mae tie, pude va mate au si rau! gua. Ego, pana mae kamo sa tani, si mi tukua sa sasada pude lopu va nuquru mae ia si asa. Ura sa baṉara mo telena si korapa ene luli mae pa mudina.” 33 Meke sipu lopu ele va betoa sa sa nana zinama, si mae kamo mo sa baṉara meke zama, “E Zihova mo vata evaṉia sa tinasuna hie koa gita! Na vegua meke kaqu aqa seunae nia rau se Zihova?” gua si asa.