1 Hire sari doduru tinarae saripu garununi e Zihova sa mia Tamasa koa rau pude va tumatumaeni koa gamu. Ke mamu va tabei si arini koasa popoa sapu kaqu nuquria meke koa ia gamu. 2 Ke pa doduruna sa mia tinoa gamu, meke sari na tumia meke sari na tudia rina tumia si mamu va lavatia se Zihova sa mia Tamasa, mamu va tabei sari doduru tinarae sapu ponini gamu rau ṉinoroi, pude kaqu koa va gelenae sari na mia tinoa koasa popoa sapu kaqu koa ia gamu. 3 Gamu na tinoni Izireli, mamu avosi na va tabei si arini! Meke kaqu koa valeana si gamu, meke kaqu ta evaṉae na butubutu ṉiṉira mia meke koa koasa pepeso masuruna, gua puta tugo sapu va tatara nia e Zihova sa nada Tamasa koari na tiatamada.

4 Namu lopu kaqu muliṉi nia Izireli si hie sapu se Zihova mo telena sa nada Tamasa.* Mk 12:29 5 Kaqu tataru nia goi se Zihova sa mua Tamasa pa doduru bulomu, pa doduru maqomaqomu meke pa doduru mua ṉiniraṉira.* Mt 22:37; Mk 12:30; Lk 10:27 6 Mu lopu muliṉini sari doduru tinarae arini sapu ponini gamu rau pa rane hie.* Diut 11:18-20 7 Mamu va tumatumaeni koari na tumia, mamu vivinei pilipuleni koarini, totoso koa gamu pa mia vetu, totoso eko meke tekulu pa mia teqe, babe ene pa siraṉa. 8 Mamu kubere goreni, mamu pusi kapaeni pa limamia na raemia guana vina gilagila pude lopu ta muliṉae doduru totoso si arini. 9 Mamu kuberi pa sasadadi ri na mia vetu meke koari na mia bara si arini.

10 Gua puta tugo sapu ele va tatara nia e Zihova sa mia Tamasa koari na tiatamamia, sapu ari Ebarahami, Aisake, meke Zekopi, si kaqu poni gunini gamu Sa sa popoa sapu koa ia soku vasivasileana nomadi saripu lopu ta kuri koa gamu.* Zen 12:7, 26:3, 28:13 11 Sari na vetu si kote siṉi soku likakalae leadi saripu gamu lopu vekoi, gua ri na berukehe saripu lopu geli gamu, meke sari na inuma vaeni na olive saripu lopu letei gamu. Totoso turaṉa nuquru lani gamu e Zihova koasa popoa meke vagi gamu sari doduru gua pu hiva henai gamu, 12 si kaqu kopu valeana nia gamu pude lopu kaqu muliṉi nia gamu se Zihova, sapu harupu gamu pa popoa Izipi, vasina sapu koa pinausu si gamu. 13 Mi va lavatia se Zihova sa mia Tamasa, mi vahesia ekea mo, mi zama tokotokoro koasa pozana Sa.* Mt 4:10; Lk 4:8 14 Mi lopu vahesi gamu si kaiqa tamasa pule, saripu vahesi ri na tie pu koa vari likohae koa gamu. 15 Be vahesi gamu sari na votiki tamasa, si kote tava murimuri taloa beto si gamu pa minate koasa popoa pepeso, sina Tamasa kono si Asa.

16 Mi lopu podepodekia gamu se Zihova sa mia Tamasa, kekeṉoṉo gua sapu tavetia gamu pa keke vasina pozana Ma'asa.* Mt 4:7; Lk 4:12; Ekd 17:1-7 17 Mi kopu valeana pude va tabei gamu sari doduru tinarae saripu ponini gamu Sa. 18 Mi tavetia sapu gua toṉoto meke leana pa zinama te Tamasa meke kote koa valearane beto si gamu. 19 Meke kote boka nuquru la meke va kilasi gamu sari na mia kana, gua sapu ele va tatarani Sa koa gamu.

20 Meke koari na rane mae hiroi si kote nanasa gamu ri na tumia, ‘Na vegua ke garunu gita e Zihova sa nada Tamasa pude va tabei sari doduru tinarae hire?’ gua. 21 Meke kote tozi ni gamu si arini, ‘Gita si tava pinausu koasa baṉara pa popoa Izipi, meke pa ṉiniraṉira lavata te Zihova si ta harupu si gita. 22 Dogoria gita pa matada soti si Asa koari na tinavete variva magasadi na tinavete variva matagutudi saripu tavete lani Sa koari na tinoni Izipi meke koasa dia baṉara meke sari doduru nana koimata nomadi koasa nana binaṉara.* Nab 11:3; Ekd 17:7; Nab 11:34 23 Meke vata rupaha gita Sa pa popoa Izipi meke turaṉa maeni gita Sa tani meke ponini gita Sa sa popoa hie. Sapu ele va tatara nia Sa koari na tiatamada sapu kote vala nia, gua.* Nab 13:17; Diut 1:21; Nab 13:31; Diut 1:26; Hib 3:16 24 Beto asa si tozini gita e Zihova sa nada Tamasa pude va tabei sari doduru tinarae hire, meke va lavatia si Asa. Be tavetia gita sapu gua asa, si kaqu kopu nia Sa sa nada butubutu meke kaqu koa valeana tugo si gita pa rane ṉinoroi. 25 Be ta ronue si gita koari doduru nada vinatabe koari doduru tinarae saripu tozini gita e Tamasa, si kote qetuni gita Sa si gita meke koa gua na tie toṉoto si gita.’