32
Kinera Taruqoqo pa Guguana Pero
1 Pa vina manege rua vuaheni, pa vina manege rua sidara koasa rane kekenu, si kamo mae koa rau sa zinama te Zihova: 2 “Tuna na tie, kera nia si keke kinera taruqoqo pa guguana e Pero, sa baṉara pa Izipi, mamu zama guahe koa sa:
‘Agoi si guana laione koari na butubutu;
agoi si guana malivi koari na kolo bogusu
tuara lamae koari na mua ovuku hitekedi,
va mulaki goi sari na tototolo.
3 Hiera gua si zama nia Arau Zihova sa Baṉara:
Sari na qeto minate si kote varigara,
kote tavetavete ni Rau pude ipa nigo vaqara si agoi,
meke arini kote kave sage nigo pa korapana sa Qua vaqara.
4 Kote gona la nigo Arau pa pepeso
meke buli la nigo pa pezarana.
Kote va malumi Arau sari na kurukuru tapuru pa galegalearane pude hake dia koa goi
meke doduru kurukuru pinomo pa popoa pepeso pude deṉa nigo rini.
5 Kote va hoqa lani Rau sari masa mia koari na toqere
meke va siṉi ni sari na lolomo na toqere koari na tomate mia.
6 Sa zolorona sa eharamu si kote va boboso nia Rau sa popoa pepeso
sage kamo la koari na toqere,
meke sari na tabahoara si kote siṉi na tomate mia.
7 Totoso va mate panigo Arau, si kote va paere ia Rau sa galegalearane,* Ais 13:10; Mt 24:29; Mk 13:24-25; Lk 21:25; Rev 6:12-13, 8:12
meke va hupori sari na pinopino;
kote va paeria Rau sa rimata koari na lei
meke sa sidara si lopu kote kalalasa.
8 Doduru kalalasa sapu va bakalia sa galegalearane
si kote va hupori Rau pa guguamu agoi;
meke kote va huporia Rau sa mua popoa,
zama vura gua si Arau Zihova sa Baṉara.
9 Soku butubutu si kote va tasuna i Rau bulodi
pana va gorevura ia Rau sa tina huaramu koari na butubutu,
meke koari na popoa pu lopu ele tumaeni goi.
10 Kote va magasa i Arau sari soku butubutu pa guguamu agoi,
meke sari baṉara si kote hodahodaka turaṉae matagutu pa laemu agoi
pana hiru nia Rau sa Qua vedara pa kenudia.
Koasa rane sapu hoqa agoi
si kote hopeke neneqara si arini,
doduru si kote hopeke koa matagutu pa dia tinoa.
11 Ura hiera gua si zama nia Arau Zihova sa Baṉara:
Sa vedara tanisa baṉara pa Babiloni
si kote mae raza koa goi.
12 Asa kote vata evaṉia sa minate tadi mua butubutu
koari na vedara tadi na tie ṉiṉiradi,
arini sapu kaleadi hola koari doduru butubutu.
Arini kote va betoa sa vinahesi pule te Pero,
meke doduru nana butubutu si kote tava kilasa.
13 Kote va mate i Rau sari doduru nana bulumakao
koari na taqele ovuku
sapu lopu kote tava ṉaṉaili pule pa nene tie
babe ta neti va mulaka koari na bulumakao.
14 Kote va malumi Rau sari nana kolo pude koa bule
sari nana tototolo pude totolo guana oela,
zama vura gua si Arau Zihova sa Baṉara.
15 Totoso huara pani ia Rau sa popoa Izipi
meke vagi pani sari doduru tiṉitoṉa pa korapana,
totoso seke goreni Rau sari doduru pu koa vasina,
si tiqe kote tumae nia rini sapu Arau tugo se Zihova.’
16 Asa sa kinera taruqoqo sapu kote kera ponia rini si asa. Ari tudia vineki rina butubutu kote kera nia; kote kera ponia sa popoa Izipi meke sari doduru nana butubutu, zama vura gua si Arau Zihova sa Baṉara.”
Sa Popoa Tadi na Tie Matedi
17 Pa vina manege rua vuaheni, pa sidara kekenu koasa rane vina manege lima, si kamo mae koa rau sa zinama te Zihova: 18 “Tuna na tie, mu kaboi sari na butubutu pa Izipi, mamu garunu lani pa kauru pepeso si arini, pude koa turaṉi sari tudia vineki rina butubutu ṉiṉiradi, luli sari kasa pu gore la pa minate. 19 Mamu zama la guahe koa rini, ‘Vegua, gamu si ta tatarue mia hola ni sari kaiqa? Gore la, mamu eko turaṉi sari tie huporodi vasina.’ 20 Kote hoqa turaṉi arini sari kasa pu tava mate pa vedara. Sa vedara si ele ta lobusu vagi; mu ririhi taloa nia si asa meke sari nana butubutu tie. 21 Pa korapa lovu si kote zama sari koimata ṉiṉiradi pa guguana Izipi meke sari nana baere, ‘Gore mae hire sari kasa meke kote eko turaṉi rini sari tie huporodi, turaṉi sari tie ta seke va matedi pa vedara.’
22 Asiria meke sa nana qeto minate si koa dia vasina; koa vari likohae nia ri doduru nana baere pu ele hoqadi pa vedara. 23 Sari dia lovu si lohi latu pa korapana sa popoa tadi na tie matedi, meke sa nana qeto minate si eko vari likohae nia sa lovu tanisa. Ari doduru pu va mataguti sarini pa popoa tadi tie toadi si ta seke va mate, hoqa koasa vedara.
24 Sa butubutu Elami si koa nana vasina. Sari doduru nana qeto minate si koa vari likohae nia rini sa lovu tanisa. Doduru arini si ta seke, hoqa koasa vedara. Ari doduru pu va mataguti sarini pa popoa tadi tie toadi si na tie huporodi meke gore beto la pa popoa tadina tie matedi. Paleki rini sari dia kinurekure gua arini pu gore la pa minate. 25 Na teqe si ta tavete poni nia e Elami pude koa turaṉi sarini pu ta seke, meke sari doduru nana butubutu si koa vari likohae nia rini sa lovu tanisa. Doduru arini si na tie huporodi, ta seke va mate koasa vedara. Sina va mataguti rini sarini pa popoa tadi tie toadi, ke paleki rini sari dia kinurekure gua arini pu gore la pa minate; la eko turaṉi rini sari tie ta sekedi.
26 Ari butubutu Meseki meke Tubala si koa dia vasina, meke sari dia qeto minate si koa vari likohae pa dia lovu. Doduru arini si na tie huporodi, na ta seke va mate koasa vedara sina va mataguti rini sarini pa popoa tadi tie toadi. 27 Na vea ke lopu eko turaṉi rini sari na tie varane huporodi sapu ele matedi, sarini pu gore la pa lovu turaṉae dia tiṉitoṉa varipera, meke sapu tarabatuni sari dia vedara? Totoso ṉiṉiradi rini si va mataguti rini sarini pa popoa tadi tie toadi, ba sa vina kilasa koari na sinea tadi pa Meseki meke Tubala si pa susuri dia.
28 Kei Pero, agoi tugo si kote ta seke gore meke somana eko koari na tie huporodi, turaṉae koa rini pu tava mate koasa vedara.
29 Edomu si koa tugo vasina, sari nana baṉara meke doduru nana koburu tavia; vea noma gua sa dia ṉiniraṉira, ba eko turaṉi mo rini sari tie ta seke koasa vedara. Eko turaṉi rini sari tie huporodi, gua arini pu gore la pa popoa tadina tie matedi.
30 Doduru koburu tavia pa kali gede* Kali gede be tia la pa kali gasa rimata. meke doduru tie Saedoni si koa tugo vasina; vea va matamatagutu tie gua si arini koasa dia ṉiniraṉira pukerane, ba kamahire kote kurekure meke gore turaṉi rini sari tie ta sekedi. Na tie huporodi si arini meke la eko turaṉi rini sarini pu ta seke koasa vedara, meke paleki rini sari dia kinurekure meke gore turaṉi sari kasa pu la pa minate.
31 Pero meke doduruna sa nana qeto minate si kote tava manoto pana dogori rini sapu gua hire, sina lopu nana butubutu eke si ta seke koasa vedara, zama vura gua si Arau Zihova sa Baṉara. 32 Na Arau tugo garuni pude va mataguti sarini pu koa pa popoa tadi tie toadi, ba Pero meke sari nana qeto minate si kote eko turaṉi sari tie huporodi, turaṉi sarini pu ta seke koasa vedara, zama vura gua si Arau Zihova sa Baṉara.”
*32:7 Ais 13:10; Mt 24:29; Mk 13:24-25; Lk 21:25; Rev 6:12-13, 8:12
*32:30 Kali gede be tia la pa kali gasa rimata.