13
Bugoro ni e Zihova sari pa Izireli
1 Pana zama se Iparemi, si neneqara sari tie;
pa Izireli si ta pamaṉae si asa.
Ba ta zutu nia sa sa vinahesina e Beolo meke mate.
2 Kamahire si kaleana nono la tu si arini;
koari dia siliva si taveti rini sari na beku meke vahesi i,
sari kineha si tavete va leleana i rini,
doduru arini si na tinavete tadi na matazoṉa.
Zama ni arini sari na tie hire, sapu,
“Vukivukihi ni rini sari na tie
meke uma i rini sari na beku bulumakao,” gua.
3 Gua ke kote guana rovu pana munumunu si arini,
guana puni sapu murimuri kekenu taloa,
guana duduli popadi sapu ta givusu taloa koasa vasina ta paqaha sari na kiko huiti koari na qaqalotodi,
guana tuṉaha sapu govete vura gua pa vuida.
4 Zama se Zihova, “Ba Arau se Zihova sa mia Tamasa,
pu turaṉa vurani gamu pa Izipi.
Loke Tamasa si kote tumae nia gamu ba Arau mo,
loke Hinarupu ba Arau mo.
5 Kopuni gamu Arau pa korapa qega,
pa korapa popoa sapu vasina ṉada sa maṉini.* Diut 8:11-17
6 Totoso poni Rau, si deṉa si arini;
totoso deṉa rini, si podalae va titie dia mo;
beto si muliṉi Nau mo arini si Arau.
7 Ke kote kamo la i Arau guana laione,
guana leopadi si kote eko aqa Qua pa kali siraṉa.
8 Guana bea d sapu ta hiko sari tuna bea,
si kote la rapati Rau meke teuru pani.
Guana laione oviana si kote hena beto pani i Arau;
guana kurukuru pinomo si kote garata umumi Arau.
9 Kei Izireli, ta huara si agoi,
sina kana mae Au agoi si Arau, Arau sapu toka nigo.
10 Avei sa mua baṉara, pude mani harupu igo?
Avei sari mua koimata koari doduru mua vasileana, pu zama ni goi,
‘Poni au keke baṉara meke na koburu tavia,’ gua?* 1 Samuela 8:5-6
11 Ke pa Qua binugoro si poni igo Arau si keke baṉara,
meke pa Qua tinaṉaziri si vagi pania Arau si asa.* 1 Samuela 10:17-24, 15:26
12 Sa tinazutu te Iparemi si tava naqiti eko mo,
sari nana sinea si ta kubere veko.
13 Sari tinasigiti tana barikaleqe nama podopodo si kamo la koa sa,
ba na koburu si asa meke loke nana ginilagilana;
ke pana kamo sa totoso,
ba koa eko mo si asa pa tiana sa barikaleqe, lopu vura.
14 Kote holu vagi puleni Arau koasa ṉiniraṉira tanisa lovu;
uve, kote vagi puleni Arau koasa minate.
Agoi na minate, avei sari mua minoho variva mate?
Agoi na lovu, avei sa mua tinahuara?* 1 Kor 15:55
Kote loke Qua tataru si Arau koa goi,
15 be vea gugua bokaboka gua si asa koari na tasina.
Na givusu pa gasa rimata sapu mae guana koe Zihova si kote mae,
givusu nuquru mae gua pa qega;
sa nana tototolo si kote noso
meke sa nana berukehe si kote popa.
Nana lose vekovekoana ginani si kote ta hiko,
sari doduru nana tinagotago si kote ta vagi palae.
16 Sari tie pa Sameria si kaqu tava lipulipu koari ginugua sapu ta zutu ni arini,
sina va karikari la ia rini sa dia Tamasa.
Kote hoqa si arini koasa vedara;
sari dia koburu hite si kote ta hiru la pa pepeso,
sari dia barikaleqe molumoludi si kote hova tukeli rini tiadi.”