63
Sa Rane Va Kilasia Zihova si pa Edomu
1 Esei si hie sapu mae guana pa popoa Edomu,
mae gua pa Bozira, meke tale eharana Nana poko?
Esei si hie, sapu va sage poko tadi na baṉara,
sapu ene va mataqara pa Nana ṉiniraṉira nomana?
“Arau mo, na zamazama pa tinoṉoto si Rau,
meke ṉiṉira pude harupu tie.”* Ais 34:5-17; Zer 49:7-22; Izk 25:12-14, 35:1-15; Em 1:11-12; Obd 1-14; Mal 1:2-5
2 Na vegua ke ziṉara sari Mua poko,
gua ari tie munala qurepi pude tavete vaeni?
3 “Telequ neti va munala vaeni si Arau;
loke tie koa turaṉa Au koari na butubutu.
Zopu i Rau pa Qua binugoro
meke neti i Rau pa Qua tinaṉaziri;
sari ehara dia si kasuru mae pa Qua poko,
gua meke ziṉara sari Qua poko.* Rev 14:20, 19:13,15
4 Ura sa rane pude tubehe si koa pa Buloqu,
meke sa vuaheni tana Qua tina rupaha si ele kamo
5 Doṉo la si Arau, ba loke tie si koa pude vari tokae,
magasa si Arau sapu loke tie si zuka Au;
ke sa Limaqu telequ si la variharupi,
meke sa Qua tinaṉaziri na toka Nau.* Ais 59:16
6 Neti Rau sari butubutu pa Qua binugoro;
pa Qua tinaṉaziri si va viviri Rau
meke zoropo pani Rau ehara dia pa pepeso.”
Zinama Leana La koe Zihova
7 Kote vivinei ni rau sari tataru nabuna te Zihova,
sari tinavete sapu kaqu tavahesi ni Sa,
luli gua koari doduru pu tavete poni gita e Zihova.
Uve, sari soku ginugua leadi pu tavete
ponia Sa koari na tie Izireli,
koa gua koari Nana tataru vari tokae meke sari soku Nana tataru variva tukana.
8 Zama si Asa, “Hinokara na Qua tinoni si arini,
na koburu koreo sapu lopu kote koha mae koa Rau”;
ke va evaṉae na dia Hinarupu si Asa.
9 Koari doduru dia tina sigiti si somana ta sigiti tugo si Asa,
meke sa mateana tana Nana sinomana asa si harupi.
Koasa Nana tataru variharupi si holu vagi puleni Sa;
ovulu vagi Sa meke paleki Sa
koari na totoso pukerane.
10 Gua ba va karikari la ia rini si Asa,
meke va talotaṉa ia rini sa Maqomaqo Hope Tanisa.
Ke taliri si Asa meke evaṉae na dia kana
meke Asa telena si varipera la koa rini.
11 Ba balabala pulei ri Nana tinoni sari totoso pukerane,
sari rane te Mosese meke sari nana tinoni.
Avei si Asa sapu koa turaṉia sa butubutu Izireli meke nuquru gua pa kolo lamana,
meke se Mosese sa dia sepati?
Avei si Asa pu va koa ia sa Nana Maqomaqo Hope pa korapa dia?
12 Avei si Asa pu garunu la nia sa Lima ṉiṉirana Tanisa
pude koa pa kali mataona e Mosese,
pu vari paqaha nia sa kolo pa kenu dia,
pude vata gilana pule nia si Asa ninae rane ka rane?* Ekd 14:21
13 Avei si Asa pu turaṉa va karovo ni pa kolo lamana si arini?
Guana hose pa popoa pezarana,
si lopu hite ta tubaraeni si arini;
14 gua ri na bulumakao pu ta turaṉa la pa lolomo masuruna,
si tava magogoso si arini koasa Maqomaqo te Zihova.
Gua asa turaṉa guni ni Agoi sari Mua tinoni
pude boka vahesi ia rini sa Pozamu.
Na Vinaravara Tepa Tinokae
15 Zihova, Mu doṉo gore mae pa Maṉauru,
koasa Mua habohabotuana baṉara ululuna, hopena, meke tolavaena.
Avei sa Mua ṉiniraṉira meke sa Mua hiniva pude tokani gami?
Lopu dogoria gami sa Mua tataru sapu tuqe pule nia Goi koa gami.
16 Lopu gilana gami Ebarahami
ba Agoi Zihova sa Tamamami;
e Izireli si lopu hivani gami,
ba Agoi, Zihova sa Tamamami,
na mami Hinarupu, sa Pozamu sapu podalae pa totoso pukerane latu.
17 Zihova, na vea, ke va taliri va seu gami Goi koasa Mua siraṉa
meke va ṉirai Goi sari bulo mami pude lopu pamaṉa Nigo?
Pule mae, pa laedi ri na Mua nabulu,
sari puku butubutu sapu tago soti Agoi.
18 Pa totoso hite mo, si tagoa ri Mua tinoni sa Mua popoa hopena,
ba kamahire si ari mami kana si mae meke puza gore nia sa Mua vasina hopena.
19 Na gami si Tamugoi podalae mae tu pukerane;
ba guana sapu lopu hite na Baṉara tamigami si Agoi,
guana lopu hite ta pozae na tie Tamugoi si gami.