65
Vinari Pitui meke na Tinaharupu
1 “Arau si va dogoro pule Nau koa rini pu lopu nanasa Nau;
meke ta dogoro si Rau koa rini pu lopu hata Au.
Koasa butubutu sapu lopu varavara tepa pa Pozaqu,
si zama si Rau, ‘Hiera si Arau! Hiera si Arau!’ gua.* Rom 10:21
2 Doduruna sa rane si repaha lani Rau sari Limaqu
pude tioko puleni sari tie va karikaridi,
pu ene koari na tinavete pu lopu leadi
pu hata luli sari dia binalabala teledia.* Rom 10:21
3 Doduruna sa rane si mae va ekeki pa Kenuqu si arini pude va bugoro Au.
Arini si la vahesi dia beku tu koari na inuma.
La sulu dia oto huda humaṉa lea tu koari na hope huporodi.
4 La habotu si arini koari na lovu
meke pana boṉi si nananasa la koari na tomate.
Hena masa boko si arini,
meke tavete supu koari na ginani ta hukatadi.
5 Meke zama, ‘Mu koa va seu koa rau, lopu tata mae,
na madi hola si rau, kote va boni au goi!’
Sari tie gugua arini si na tuṉaha pa Isuqu,
na nika sapu toa doduruna sa rane.
6 Doṉo la, sa dia sinea si koa ta kubere eko mo pa Kenuqu:
lopu kaqu koa kae kulu si Arau; ba doduruna sa dia sinea si kaqu tubehi Rau;
uve, kaqu tubehi Rau pa Kenudia,
7 sari dia sinea meke sari sinea tadi na tamadia,”
gua se Zihova.
“Sina va uququ oto huda humaṉa lea si arini koari na toqetoqere
meke va karikari mae Au rini koari na batu toqere.
Kaqu va garo pule lani Rau pa kenudia
sa doduruna sa vina kilasa koari na dia sinea.”
8 Hiera gua si zama nia e Zihova:
“Gua sapu sa kolona sa vua qurepi si korapa koa hola koari na kata qurepi
meke zama sari tie, ‘Lopu okipani,
korapa koa dia kaiqa lineana pa korapana,’
ke gua tugo asa si kote tavetia Rau koari na Qua nabulu;
lopu kaqu va mate beto pani Arau sari doduru arini.
9 Pa tutina e Zekopi si kote vagi vura tie si Arau,
meke vura pa Ziuda si arini pu kote tagoi sari Qua toqere;
sari Qua tinoni ta vizatadi kote tagoi si arini,
meke vasina kote koa sari Qua nabulu.
10 Sa pezara pa Saroni si kote siṉi pule ia na sipi,
meke sa Lolomo Tinasuna si kote na vasina tadi na bulumakao,
pude tadi na Qua tinoni pu hata Au.* Zos 7:24-26
11 Ba gamu pu kilu Au si Arau Zihova
meke muliṉi nia sa vasileana Zaione, sa Qua toqere hopena,
pu vahesia na tavete poni inevaṉa sari beku ta pozae Gadi meke Meni
pu balabala i gamu pu kote poni gamu sapu gua si leana na kaleana pa tinoa,
12 si kote va nama ni gamu vedara Rau pude va mate beto gamu,
meke doduru gamu si kote kokopo gore ni batu mia pude ta kupa;
ura titioko si Rau ba lopu olaṉa si gamu,
zama si Rau ba lopu va avoso si gamu.
Tavetia gamu sapu kaleana pa Kenuqu
meke vizatia gamu pude lopu va qetu Au.”
13 Ke hiera gua si zama nia e Zihova Baṉara:
“Sari Qua nabulu si kote henahena,
ba gamu si kote ovia;
sari Qua nabulu si kote napo,
ba gamu si kote memeha;
sari Qua nabulu si kote qetuqetu,
ba gamu si kote ta lotaṉa pa kinurekure.
14 Sari Qua nabulu si kote kera
koasa qinetuqetu pa bulodia;
ba gamu si kote kabo vura
koasa tinasigiti pa bulomia
meke kabo uui koasa maqomaqo sapu talotaṉa.
15 Kote veko la nia gamu sa pozamia
koari na Qua tinoni ta vizatadi pude na dia zinama pude leveleve nia;
Arau Zihova sa Baṉara kote va mate gamu,
ba sari Qua nabulu si kote poni Rau si keke pozapoza vaqurana.
16 Asa pu tepa ia sa minana
si kote tepa pa Pozana sa Tamasa pu tozia sa hinokara;
asa pu zama tokotokoro si kote tokotokoro pa Pozana sa Tamasa pu tozia sa hinokara.
Ura sari na tinasuna pu ele hola si kote ta muliṉae
meke ta tome pa mataqu Rau.”
Sa Vina Podaka Vaqura
17 “Doṉo mae, kaqu va podakia Rau
si keke maṉauru vaqurana meke keke popoa pepeso vaqura.
Sari tiṉitoṉa koadi si lopu kaqu ta balabala vagi pule.* Ais 66:22; 2 Pit 3:13; Rev 21:1
18 Ba mi koa qetuqetu lamo ninae rane
koasa Qua vina podaka,
ura kote kuri pulea Rau sa popoa Zerusalema pude na vasina qetuqetu,
meke sari na tiena si kote siṉi i na qinetuqetu.
19 Kote qetu nia Rau sa popoa Zerusalema
meke vagi qinetuqetu koari na Qua tinoni;
sa mamalaiṉi kabo na taruqoqo
si lopu kaqu ta avoso pule hokara.* Rev 21:4
20 Lopu kaqu ta evaṉa pule vasina
sapu keke haha si toa ka visavisa rane mo,
babe na barogoso pu lopu toa va gorevura i sari nana vuaheni;
asa pu mate pa keke gogoto vuaheni
si na tie vaqura meke mate, kote ta gue;
asa pu lopu kamo la pa keke gogoto vuaheni
si na ta leveina, kote guni nia rini.
21 Kote kuri vetu si arini meke koa i;
kote tavete inuma vaeni si arini meke hena i vuadi.
22 Lopu kaqu tavete vetu pule si arini meke votiki tie tu na koa i,
babe lelete meke votiki tie hena i.
Ura gua tugo sa tinoa tana keke huda
si kaqu gua tugo sari na rane tadi na Qua tinoni;
sari Qua tie ta vizatadi si kaqu qetuqetu va gelenae
koari na tinavete pu vura pa lima dia.
23 Lopu kaqu tavetavete hoboro mo si arini
babe podo koburu sapu kote tava mate dia mo;
ura kote na tinoni ta manaedi koe Zihova si arini,
meke gua tugo sari na tutidia.
24 Sipu lopu ele titioko arini si kote ele olaṉa tu si Arau;
totoso korapa zama arini si kote ele avosi tu Arau.
25 Sari siki pinomo variva mate meke na lami si kote henahena varigara,
meke na laione si kote hena duduli guana bulumakao,
ba sa kavuru si gana ginani sa noki.
Lopu kote variva sigiti babe va mate tie
koasa doduruna sa Qua toqere hopena,”
gua se Zihova.* Ais 11:6-9