1 Pa mudina sa minate tadi karua tuna koreo e Eroni, sipu tata la ia rini se Zihova meke mate, si zama la koe Mosese se Zihova: 2 “Mu tozi nia sa tasimu se Eroni pude lopu kaqu nuquru hoboro mae pa kenuqu Rau koasa Lose Hopena pa Hopena pa mudina sa poko goba pa nana hiniva soti si asa pude lopu mate si asa. Ura vasina si vura pa korapa lei si Rau pa batuna sa tukutukuna, vasina pu koa ia tinaleosae na vinulasadi sari na sinea koasa Bokese Vinariva Egoi d.* Hib 6:19 3 Guahe si kaqu tavetia e Eroni pana nuquria sa sa lose hopena pa hopena: Kaqu va vukivukihi nia sa si keke bulumakao kokoreo vaqurana pude ta taleosae sari nana sinea, meke keke sipi kokoreo tana vina vukivukihi va uququ.* Hib 9:7

4 Kaqu huhuve va via si asa, beto meke va sagea sa nana poko hopedi sapu sa poko lineni doduruna meke sa poko lineni korapae, sa poko dokoho, meke sa toropae batu tanisa hiama.

5 Meke karua sari na qoti kokoreo si kaqu vagi Eroni koari na butubutu Izireli pude na vina vukivukihi tana sinea, meke keke sipi kokoreo pude na vina vukivukihi va uququ. 6 Meke kaqu va vukivukihi nia Eroni sa bulumakao kokoreo pude na tinaleosaena sa nana sinea soti telena meke sari na sinea tanisa nana tatamana soti. 7 Beto asa si kaqu vagi sa sari karua qoti kokoreo meke kaqu la turaṉi sa pa kenuna e Zihova pa sasadana sa Ipi Hope. 8 Meke kaqu mudumudukeda ni karua qoti kokoreo si pude te Zihova meke keke pule pude paleke taloa nia sa sinea. 9 Kaqu vagia sa qoti sapu la gua koe Zihova meke va vukivukihi nia sa si asa pude na vinulasana sa sinea. 10 Meke sa qoti sapu ele ta vizata koasa mudumudukeda pude paleke taloa nia sa sinea, si kaqu toana, meke ta turaṉa la pa kenuna e Zihova pude na vinulasana sa sinea, meke ta garunu taloa si asa pa korapa qega, pude paleke taloa nia sa sinea tadirini.

11 Pana va vukivukihi nia Eroni sa bulumakao pude na tinaleosaena sa nana sinea soti, meke tadi na tie pu koa pa nana tatamana soti, 12 si kaqu vagia sa si keke palepalekeana nika sapu siṉia motete toadi koasa hope vina vukivukihi meke padana karua siniovo lima sapu siṉia na vina uququ oto huda humaṉa lea, meke paleke nuquru lani pa korapa Lose sapu Hopena pa Hopena. 13 Meke pa kenuna e Zihova vasina, si kote ta veko sa vina uququ oto humaṉa lea pa nika, meke sa tuṉahana si kote va paeria sa sa tukutukuna sa Bokese Vinariva Egoi, ke lopu kaqu boka mate si asa. 14 Meke sari na kakarutuna si kote va boboso nia ehara bulumakao sa sapu va matea sa, meke siburu nia sa koasa tukutukuna sa bokese, meke kaiqa pule si kote siburu lani sa ka zuapa totoso, pa kenuna sa Bokese Vinariva Egoi.

15 Meke sipu beto saripu gua arini si kaqu tiqe va matea sa sa qoti tana tinaleosaedi ri na sinea tadi na tie, meke kaqu siburu la nia sa eharana koasa tukutukuna sa Bokese Vinariva Egoi, meke gua tugo pa kenuna bokese kekeṉoṉo gua tugo sapu evaṉia sa koasa eharana sa bulumakao.* Hib 9:12 16 Koasa ginugua asa si kaqu tava hope sa Lose Hopena pa Hopena, koa gua koari doduru binoni na sinea tadi na tinoni Izireli, kaqu tavetia sa sapu gua tugo asa koasa Ipi Hopena, sina koa pa vari korapana sa kinoa tie meke sa binoni tadirini. 17 Kaqu loke tie si koa pa korapa Ipi Hope, totoso nuquru la pa korapana sa Lose Hopena pa Hopena se Eroni, pude tavetia sa vina via osolae vura pule si asa, sipu beto tavetia sa sa vinulasana sa nana sinea soti, sa nana tatamana soti, meke sa butubutu Izireli. 18 Beto asa si kaqu vura la koasa hope vina vukivukihi se Eroni pa kenuna e Zihova meke tavetia sa vina via tanisa. Kaqu vagi sa si kaiqa ehara bulumakao, meke kaiqa ehara qoti, meke vekoi koari ka made kikiho koari ka made iiona sa hope. 19 Meke kaqu va boboso ni ehara Eroni sari na kakarutuna, meke siburu lani sa koasa hope ka zuapa totoso. Meke pa siraṉa gua asa si kaqu va via ia Eroni sa hope koari na sinea tadi na tie Izireli meke va madia sa koe Zihova.

20 Pana beto tavetia Eroni sa tinavete vina via tanisa Lose Hopena pa Hopena, sa Ipi Hopena, meke sa hope vina vukivukihi, si kaqu turaṉa mae nia sa sa qoti toana. 21 Meke kaqu va oponi limana sa sa qoti toana, meke kaqu helahelae beto ni sa sari doduru tinavete kaleadi na sinea tadi na tinoni Izireli, totoso kilua rini se Zihova, meke veko lani pa batuna sa qoti. Meke kaqu ta garunu taloa sa qoti pa korapa qega, koasa tie ta vizatana pude tavetia sapu gua asa. 22 Meke kaqu paleke la nia sa qoti koari na vasidi ivuluna sari doduru dia sinea.

23 Beto asa si kaqu nuquru la pa korapa Ipi Hopena se Eroni meke va gorei sa sari na poko hiama saripu va sagei sa tatasana sipu lopu ele nuquru la koa sa Lose Hopena pa Hopena si asa, meke vekoi sa vasina.* Izk 44:19 24 Meke kaqu huve va via si asa pa vasina madina meke tiqe va sagei sari votiki poko hiama, beto asa si kaqu vura la si asa meke tavetia sa vina vukivukihi va uququ pude tanisa meke keke vina vukivukihi va uququ tadi na tinoni Izireli pude taleosae sari nana sinea soti, meke tadi na tinoni Izireli. 25 Kaqu va uqua Eroni pa hope sa deanana sa vina vukivukihi tana sinea.

26 Sa tie sapu garunu taloa nia sa qoti pa korapa qega koasa toqere Azazela* Sa zinama “Azazela” sa ginuana si na toqere tana tinahuara babe na toqere tana minate. si kaqu popaha va via valeani sari nana poko, meke huve va via, meke tiqe pule la vasina koa sa butubutu tie. 27 Sa ehara koa holadi tanisa bulumakao meke sa qoti pude na vina vukivukihi tana sinea, saripu ta paleke nuquru eharadi pude na vina viana sa Lose Hopena pa Hopena, si kaqu ta paleke vura turaṉae koari na kapudi, na masadi meke sari na lagudi pa valena sa popoa pu koa rina tie meke kaqu ta sulu palae vasina.* Hib 13:11 28 Sa tie sapu evaṉia sa vina uququ si kaqu popaha va via i sari nana poko meke huve va via tugo meke tiqe pule la koari na tie.

29 Sa tinarae hie si kaqu tamugamu na tinoni Izireli doduru totoso meke sari na votiki tie pu karovodi mae pu koa koa gamu. Doduru vuaheni koasa rane vina manege puta koasa sidara vina zuapa si kaqu koa madi pa ginani si gamu meke lopu tavetavete.* Liv 23:26-32; Nab 29:7-11 30 Koasa rane sana si kaqu taleosae sari na mia sinea koasa tinavete hiama pa vina vukivukihi meke tinavete vina via, meke kaqu taleosae meke via si gamu pa kenuna Zihova. 31 Meke pa doduru vuaheni sa rane asa si kaqu na rane hopena hola, meke asa sa rane sapu kaqu va madia gamu pude lopu henahena meke lopu kaqu hite tavetia gamu si keke tinavete hokara. 32 Sa ṉati hiama kenukenue sapu ta zoropo oela hopena pa batuna, meke tava madi si asa, sapu kaqu sogo hobea sa tamana si kaqu tavetia sa vina vukivukihi tana sinea. Asa tugo si kaqu va sagei sari na poko lineni meke sari na poko hopedi, 33 meke kaqu tavetia sa sa tinavete tana tinaleosaena sa sinea koa sa Lose Hopena pa Hopena, koa sa Ipi Hopena, koasa hope vina vukivukihi, koari na butubutu hiama, meke tadi doduru tinoni koasa butubutu Izireli. 34 Sari na tinarae hire si kaqu ta kopue koari doduru vuaheni mae hiroi. Keke totoso pa vuaheni si kaqu ta tavete sa tinaleosaedi ri na tinoni Izireli koa ri na dia sinea.”

Ke kekeṉoṉo gua arini si taveti e Mosese koasa ginarunu te Zihova.