SA BUKA TE
MAIKA
Sa Vinabakala
Se poropita Maika si tavetavete keke gua pa totoso tadi Aisea pa Ziuda meke Hozea pa Izireli. Sa totoso si pa varikorapadi ri na vuaheni zuapa gogoto lima ṉavulu puta meke onomo gogoto vesu ṉavulu onomo vuaheni sipu lopu ele podo se Zisu Karisito, koari na totoso sapu koa baṉara sari Zotamu, Ehazi, meke Hezikaea pa popoa Ziuda. Mae guana si asa pa Moreseti, keke vasileana hite pa Ziuda.
Sa kinorokorotae te Maika si la koari pa Ziuda meke Izireli, sapu sa tinahuara tadi pa Zerusalema meke Sameria si kote ta evaṉa. Sa inavoso tanisa si kekeṉoṉo gua te Emosi pa Izireli sapu la gua koari tie tagotago. Sari tie tagotago si ṉoṉovali sari tie malaṉa; hiko i rini sari tie malaṉa pa sikele kokohadi. Sari tie sapu kopu nia sa vinahesina sa Tamasa meke ari palabatu pa kali vinaripitui si kaleadi beto. Meke sari poropita hinokaradi si ta tozi pude mokomoko.
E poropita Maika tozi va kenu ia sa pinodo tanisa Karisito pa Betilihema sapu gorevura pa pinodo te Zisu. Pa varikorapadi ri nana inavoso tinahuara si tozi ia sa sa tinolava nomana hola te Zaione sapu korapa mae.
Sari Ṉati Pinaqapaqahana sa Buka
Kote va kilasi e Zihova sari Nana tinoni. Hinia 1:1 kamo hinia 3:12
Zaione meke sa minae te Karisito. Hinia 4:1 kamo hinia 5:15
Ta zutu meke tava manoto sari tie te Zihova. Hinia 6:1 kamo hinia 7:20
1
Sa Ginarunu te Maika
1 Hiera sa zinama te Zihova sapu kamo la koe Maika, sa tie pa Moreseti, koari na totoso sapu koa baṉara pa Ziuda sari Zotamu, Ehazi, meke Hezikaea. Sa dinogodogorae sapu dogoria sa si pa guguadi ri na popoa Sameria meke Zerusalema.* 2 Baṉ 15:32 kamo hinia 16:20, 18:1 kamo hinia 20:21; 2 Koron 27:1-7, 28:1 kamo hinia 32:33
Na Tinaruqoqo te Maika la koari pa Sameria meke Zerusalema
2 Mi va avoso, gamu na tinoni, doduru gamu kasa,
va taliṉa mae, agoi na popoa pepeso meke doduru pu koa pa korapana,
pude mani tava sosode koa gamu se Zihova sa Baṉara,
sa Baṉara pu koa koasa Nana Zelepade hopena.
3 Dotu! Se Zihova si korapa mae, mae gua koasa Nana vasina;
gore mae si Asa meke kote ene koari na vasidi ululudi pa popoa pepeso.
4 Sari toqere si kolo dia mo pa kauruna Sa
meke sari lolomo si viqala rua tu,
guana tinina sa kadolo sapu kolo pa nika;
guana kolo sapu titisi gore pa taba.
5 Doduru hire si koa gua koari na kinaleana te Zekopi,
koa gua koari sinea tanisa butubutu Izireli.
Nasa sa kinaleana te Zekopi?
Lopu sari tinavete tadi pa Sameria tu?
Nasa sa vasina ululuna te Ziuda?
Lopu sa popoa Zerusalema tu sia?
6 Ke zama se Zihova, “Gua ke sa popoa Sameria si kote iliri la nia Rau pa kobi remoremo,
na vasina pude lete inuma vaeni.
Sari patu si kote gona lani Rau pa lolomo
kote huara va inete ia Rau sa vasina sapu sokirae sa.
7 Doduru nana beku si kote tava umumu beto;
doduru nana vinariponi pa Zelepade si kote ta sulu pa nika;
kote huara i Rau sari doduru nana beku.
Sina vagi vinariponi si asa koari na tinabara tadi na maqota pa vinahesi beku* Vagi tinabara si arini pa vinahesina sa beku maqota Asera d.,
ke kote tavetavete ni tugo ri nana kana gua na tinabara tadi na maqota.”
8 Gua ke kote kabo meke lukalukana si arau;
kote lopu sage sadolo si arau meke ene dododohoqu mo.
Kote kabo guana siki pinomo si arau
meke kunikunisi guana duduru.
9 Ura sa bakora koa sa si kote tasuna pude ibu;
meke kote kamo la koe Ziuda sia.
Kote kamo hokara la pa sasada tadi qua tinoni,
sapu pa Zerusalema mo.
Sari Kana si Tata Kamo La pa Zerusalema
10 Lopu tozini sari mami kana pa Qati sapu ta huara sa popoa Sameria,
lopu kabo hokara tu.
Pa Beti Opira* Beti Opira sa ginuana sa vetu tana kavuru.
si mu topili pa kavuru pude vata dogoro nia sa mua tinalotaṉa.
11 Ene hola, dododoho meke kurekure,
gamu pu koa pa Sapira* Sa ginuana Sapira si na popoa leleana..
Arini pu koa pa Zanani* Sa zinama Zanani pa Hiburu si mamalaiṉina sari zinama “Vura mae” pa Hiburu.
si matagutu pude vura mae.
Beti Ezeli si korapa koa talotaṉa;
sina sa dia zuka si ta vagi palae pa dia vetu.
12 Sarini pu koa pa Maroti si soliṉi pa tinasigiti,
aqa ta salaṉa,
sina tinahuara si ele mae gua koe Zihova,
sa sasada pa Zerusalema ba ele kamoa sa.
13 Gamu pu koa pa Lakisi,
pusi lani koari na hose sari totopili varipera.
Gamu podalae ni sari sinea
sapu keha luli ari pa Zerusalema pa Zaione,
ura sa sineke tinarae te Izireli,
si ta dogoro vagi koa gamu.
14 Gua ke kote vala vinariponi luluara si gamu
koari pa Moreseti Qati.
Sa vasileana pa Akizibi* Sa ginuana sa pozana Akizibi si sinekesekei. si kote sekesekei ni
sari na baṉara pa Izireli.
15 Keke kana mataqarana si kote va raza ni Rau
koa gamu pu koa pa Maresa.
Asa pu na tie tuturaṉa pa Izireli
si kote la tome pa Adulamu.* 1 Samuela 22:1
16 Neri i sari batumia pa tinalotaṉa;
kaboi sari koburu sapu tataru ni gamu.
Neri va golu beo gamu gua ri na kurukuru tapuru pu gani tomate,
ura na kote ta vagi taloa sari mia koburu pa tinaraovo.
*1:1 2 Baṉ 15:32 kamo hinia 16:20, 18:1 kamo hinia 20:21; 2 Koron 27:1-7, 28:1 kamo hinia 32:33
*1:7 Vagi tinabara si arini pa vinahesina sa beku maqota Asera d.
*1:10 Beti Opira sa ginuana sa vetu tana kavuru.
*1:11 Sa ginuana Sapira si na popoa leleana.
*1:11 Sa zinama Zanani pa Hiburu si mamalaiṉina sari zinama “Vura mae” pa Hiburu.
*1:14 Sa ginuana sa pozana Akizibi si sinekesekei.