13
1 Na koburu gilaena va avosia sa tinarae tanisa tamana,
ba sa tie va sisire lulia ṉoṉovala si lopu hiva avoso ginegese.
2 Koari vuadi ri nana zinama si qetuqetu sa tie leanana,
ba sari tie sekesekei si odi hiva huhuara.
3 Asa pu lavelave nia sa beruna si kopu nia sa nana tinoa,
ba asa pu memeakala si ṉovala pule nia.
4 Sa tie udapelu si ovia ba lopu ta poni,
ba sari hiniva tadi tie ṉaliṉali si gorevura beto.
5 Sa tie toṉoto kana hola ia sa kokoha;
ba sa tie kaleana si taveti sapu variva kurekure hola.
6 Na tinoṉoto lavelave nia sa tie sapu loke nana tinazutu,
ba na kinaleana si na hinoqa tadi na tie seadi.
7 Keke tie si va gulegulea sapu tagotagona gua, ba si loketoṉa tu tagoa;
keke pule si habahualana gua, ba si tagotagona tu.
8 Na tie tagotagona si boka tabaria sa kana pude harupu pule nia,
ba sa tie malaṉa si loke tie okoro hiva ṉovalia.
9 Sa zuke tanisa tie toṉoto si kalalasa va leana hola,
ba tanisa tie kaleana si lamo pa mate.
10 Na vinahesi pule si va gavogavoro vinari tokei,
ba sa ginilagilana lohina si ta dogoro koarini pu vagi vina balau.
11 Poata sapu tuturei ta vagi, si lopu sana murimuri palae tugo,
ba asa pu va naqiti tatasa poata si va toqoli sa.
12 Pude seunae aqa nia si keketoṉa leanana si hoke lehu sa tie,
ba pana gorevura gua sapu ta hivae si na qinetuqetu lavata.
13 Asa pu lopu va ari laena ia sa tinarae si vata tasuna pule nia,
ba asa pu pamaṉa nia sa ginarunu si kote ta pia.
14 Sa vina tumatumae tanisa tie gilagilana si na bukaha pa tinoa,
va kekeria sa sa tie koasa sipata tanisa minate.
15 Na ginilagilana sapu bakala si ta pamaṉae,
ba sa tie sekesekei si ene la pa tinasuna.
16 Sari tie gilaedi si balabala paki meke tiqe tavetavete,
ba sa tie duvili si va dogoro nia sa nana pinupuhu.
17 Pana paleke inavoso sa tie kaleana si na tinasuna si kote vura,
ba sa tie ta ronuna si kote turaṉa sinalaṉa.
18 Asa pu lopu luli tinarae si kote kamoa na minalaṉa meke kinurekure,
ba asa pu va taliṉa ia sa ginegese si kote ta pamaṉae.
19 Sa hiniva sapu gorevura si lomoso pa maqomaqo,
ba sa tie duvili si korona kekere koari na hahanana kaleadi.
20 Asa pu ene turaṉi saripu gilagilana si kote gilagilana tugo,
ba asa pu baeri sari na tie duvili si ṉovala pule nia.
21 Na tinasuna luli i sarini pu tavete va sea,
ba kinoa va leana si na pinia tadi pu toṉoto.
22 Na tie leana si veko hola tinago tadi nana koburu pu podoi na tuna,
ba sari tinagotago tadi na tie kaleadi si dia ri na tie toṉoto.
23 Na inuma tanisa tie habahuala si kote boka namu va leana,
ba sari hahanana kaleadi tadi na tie kaleadi si kote sara pani.
24 Asa pu lopu sekeseke nia sa kolu si lopu tataru nia sa tuna,
ba asa pu tataru nia sa tuna si kote gegesia sa si asa.
25 Sari tie toṉoto si henahena pude deṉa sari bulodia,
ba sa tiadi rina tie kaleadi si koba ovia mo.