21
1 Sa bulona sa baṉara si pa limana e Zihova;
totoli nia pavei kote va ene la nia Sa, guana inene tanisa ovuku.
2 Doduru hahanana tanisa tie si toṉoto dia koasa,
ba e Zihova si pitua sa bulona.
3 Pude tavetia sapu toṉoto meke ṉoṉo
si leana koe Zihova hola nia sa vinukivukihi.
4 Na mata va titie meke sa bulo vahesi pule si na sinea,
na tinoa tadi na tie kaleadi.
5 Sari hiniva leadi pu ta tavete valeana si vurai na lineana,
ba asa pu bebeno pude va hokoti si kamo tugo pa minalaṉa.
6 Sa tinago sapu ta vagina pa mea kokohana,
si tuturei vuga palae meke na sipata variva mate si asa.
7 Sa tinavete variva mate tadi tie kaleadi kote turaṉa va seu ni,
ura korodia tavetia gua sapu toṉoto.
8 Sa siraṉa tadi pu ele sea si koqi,
ba sa hahanana tadi pu lopu tavete sea si toṉoto.
9 Leana hola si pude koa pa keke hukihukirina sa batu vetu,
hola nia pude koa turaṉia pa keke vetu sa barikaleqe nominomina.
10 Sa tie kaleana si ovia nia sa kinaleana;
lopu hite tataru nia sa sa turaṉana.
11 Totoso tava kilasa sa tie va gugue, si vagi ginilagilana sa tie pupuhu;
ba pana ta tarae sa tie gilae, si tumatumae si asa.
12 Sa Tamasa eke mo si toṉotona meke dogoro vagi sari na vetu tadi na tie kaleadi;
meke va kamo ni tinasuna Sa.
13 Pana tuku taliṉa sa tie koasa kinabo tana tie malaṉa,
si asa ba kote kabo vura meke loke tie kote avosia.
14 Na vinariponi tomena si va ibu binugoro,
na poata ta vala golomona si va bule tinaṉaziri.
15 Pana ta evaṉa sa tinoṉoto si qetu sari tie toṉoto,
ba sari tie kaleadi si matagutu.
16 Sa tie sapu rizu koasa siraṉa tanisa ginilagilana,
si kote kamo la koa sa vinarigara tadi tie matedi.
17 Asa pu okoro nia sa kinoa leleana si kote malaṉa;
asa pu okoro nia sa vaeni meke sa ginani arilaedi si lopu kaqu tagotago.
18 Sa kinaleana si ta kasie koasa tie leanana meke la koasa tie kaleana,
meke sapu koasa tie toṉotona si la koasa tie lopu ta raṉena.
19 Leana si be koa pa popoa qega,
hola nia si be koa turaṉa barikaleqe nominomi meke bubugorona.
20 Pa vetu tanisa tie gilae si kobi ginani na oela leanadi,
ba sa tie pekipeki si va betoi sa sari doduru pu tagoi sa.
21 Asa pu hata lulia sa tinoṉoto meke tataru,
kaqu dogoria sa tinoa, kinoa va leana, meke vina lavata.
22 Na tie gilagilana boka raza ia sa vasileana lavata tadi tie ṉiṉira,
meke huara gore nia sa goba sapu raṉeraṉea rini.
23 Asa pu lavelave nia sa ṉuzuna meke meana,
si kopu pule nia pa tinasuna.
24 “Tie va gugue” pozana sa tie vahesi pule nia meke va titie;
balabala va gore tie si asa koari nana tinavete.
25 Sa inoko'okoro tanisa tie hakohako si kote va matena sa,
sina lopu hiva tavetavete sari limana.
26 Doduruna sa rane si soku hola pule si koa okoro ni sa,
ba sa tie toṉoto si variponi meke lopu tuqe pule.
27 Sa vinukivukihi tanisa tie kaleana si variva maledere,
meke pana lulia pule kaiqa hiniva kaleadi si kote vea beka?
28 Sa tie va sosode kokoha si kaqu mate,
ba sa zinama tanisa pu ta ronu si kote ta avoso.
29 Sa tie kaleana si kote va matamataqarae kokoha,
ba sa tie toṉoto si kote balabala paki meke tiqe zama pa hinokara.
30 Loke ginilagilana lohina, loke tinumatumae, loke hiniva,
si kote bokaboka hola nia se Zihova.
31 Sa hose si tava namanama nia sa rane pude varipera,
ba sa minataqara si mae guana koe Zihova.