5
Vinaravara Tinepa Vina Sare
(Keke kinera te Devita pude kera nia pa ivivu)
1 Kei Zihova, mu avoso maei sari na qua zinama,
mamu balabala i sari na qua tinaduaṉa.
2 Mu avoso mae ia sa mamalaiṉina sa qua kinabo,
qua Baṉara, meke qua Tamasa.
Ura Zihova, koa Goi mo si varavara atu si rau.
3 Zihova, avosia Goi sa mamalaiṉiqu pana munumunu hokara.
Totoso gasa sa rimata si varavara atu si rau,
meke aqania rau sa Mua inolaṉa.
4 Agoi si na Tamasa sapu lopu qetu nia sa kinaleana,
meke lopu boka koa turaṉigo rina tie kaleadi.
5 Sarini pu vahesi puleni si lopu kaqu vata dogoro pa kenumu Agoi,
ura etuli Goi sari doduru pu tavetavete va kaleana.
6 Kaqu va puzulu ṉaepi Goi sari doduru pu zama kokoha,
meke kukiti ni Goi sari na tie sekesekei na variva mate.
7 Ba arau si kaqu mae pa Mua Zelepade,
koa gua koasa Mua tataru nabuna.
Kaqu vahesigo rau pa korapana sa Mua Zelepade,
kaqu todoṉo si rau pa korapa pinamaṉa Mu.
8 Kei Zihova, Mu turaṉau pa korapa Mua tinoṉoto,
sina sokudi saripu kukiti nau;
va bakalia koa rau sa Mua hiniva, pude maqu lulia.
9 Ura loke vasi hinokara si zama vura nia rini;* Rom 3:13
ta siṉie kinaleadi mo sari na bulodi.
Sari na leodi si ta siṉie sinekesekei pu variva mate.
Zamazama va mememehe kokoha pa meadi si arini.
10 Kei Tamasa, va kilasi gedi si arini,
va hoqai gedi si arini koari na dia zinama soti teledia.
Mu hitu pani gedi si arini pa kenumu Agoi,
ura soku hola sari na dia sinea meke kana Igo rini.
11 Ba madi qetuqetu sarini pu kalavarae koa Goi;
madi kera pa qinetuqetu,
sina lavelave hukatani Goi si arini.
Madi koa qetuqetu sarini pu tataru nigo.
12 Ura mana zoṉazoṉa ni Goi sarini pu koa va toṉoto.
Kei Zihova, bara vari likohae ni na Mua tataru Goi si arini, guana lave!