31
Na Vinaravara Kinalavarae koe Tamasa
(Keke kinera te Devita)
1 Kei Zihova, koa Goi mo si kalavarae si rau;
Mu lopu vala pani au koari na qua kana pude tava kilasa.
Ba Mu harupau, ura na Tamasa toṉoto si Goi.
2 Mu avoso mae au, Mamu tuturei va sare au!
Na qua patu aqoroana si Goi,
na qua bara heheda meke na qua hinarupu.
3 Uve, Agoi sina qua patu, na bara heheda.
Mu turaṉau gua sapu ele va tatara nau Goi.
4 Mu va sare au koasa sinekesekei tadi na qua kana pu hiva sipata vagi au.
Mu va leseve au pa tinasuna.
5 Pa limamu Goi si luara vatu nia rau sa qua tinoa.* Lk 23:46
Kei Zihova, Mu harupau Goi si rau, Tamasa ta ronuemu.
6 Kukiti ni Goi saripu vahesi tamasa beku,
ba arau si kalavarae koa Agoi.
7 Kaqu qetu zoṉazoṉa nia rau sa Mua tataru nabuna,
sina ele dogori Goi sari na qua tinasigiti,
meke ele gilani Goi sari na qua tinasuna.
8 Meke lopu luara pani au Goi pa limadia rina qua kana;
ba poni nau Goi sa tinarupaha pude la vasina pu hiva la rau.
9 Mu tataru nau, kei Zihova,
ura koa pa tinasuna si rau.
Sari na mataqu si ele mabo hola kabo,
meke gua tugo sa doduruna sa qua tinoa.
10 Sa qua tinoa si koa mo pa tinalotaṉa,
meke sari na vuaheniqu si korapa hola taloa pa kinuliusu.
Malohoro sa tiniqu pa qua tinasuna,
kamo koari na susuriqu.
11 Sari doduru qua kana meke saripu koa tata koa rau
si va loke laequ au si arau.
Sarini pu gilanau ba etulu pani au,
meke pana dogorau rini pa siraṉa si govete nau rini.
12 Ele ta muliṉae si rau guana tie ele matequ.
Ele ta kilu palae guana raro lopaqu si rau.
13 Avosia rau sa vevehedi rina qua kana;
na tinasuna variva matagutuna si koa pa vari likohaequ.
Mizi vekoa rini sa kinuhanaqu pude va mate au gua.
14 Ba kalavarae si rau koa Goi Zihova,
Agoi mo sa qua Tamasa.
15 Sari na qua totoso si koa pa Limamu Agoi.
Mu va sare au pa limadi rina qua kana,
meke koarini pu hadu luli au pude va mate au.
16 Mu kopu nia sa Mua nabulu pa Mua tataru variva tukana.
Mu harupau pa Mua tataru nabuna.
17 Kei Zihova, maqu lopu tava kurekure si rau,
ura koa Goi si kalavarae atu rau.
Madi tava kilasa sari na tie kaleadi,
madi lopu zama pule, ba mate palae gedi.
18 Madi tava mokomoko sari na tie kokoha,
ura vahesi puleni meke zutui rini sari na tie toṉotodi.
19 Kei, nake sokudi hola sari na Mua lineana,
saripu va nama veko ni Goi koarini pu pamaṉa Nigo!
Gilana betoa ri doduru tie sa Mua tataru,
meke gua sapu ele kopu guni ni Goi sarini pu kalavarae koa Goi.
20 Tomei Goi si arini pude tava sare pa kenumu Goi,
koari na ṉinovaṉovala tadi na tie.
Va aqori Goi si arini pa keke vasina tometomeana kapae koa Goi,
meke tava ilolo koari na zinama ṉoṉovala tadi na kana.
21 Mani tava lavata se Zihova, ura ele va sare au Sa
sipu mae rapata vari likohae nau rina qua kana.
22 Pa qua minatagutu si balabala si rau,
sapu ele tava seu si rau pa kenumu Goi, gua.
Ba ele avosi tu Goi sari na qua tinepatepa,
totoso tepa atu tinokae si rau koa Goi.
23 Mi tataru nia se Zihova, gamu doduru Nana tie raṉeraṉe!
Ura va sarei e Zihova sarini pu raṉe zoṉazoṉa ia,
ba va kilasi Sa saripu vahesi puleni.
24 Mi koa va ṉiṉira na varane,
gamu doduru pu raṉea se Zihova.