88
Kinabo Hata Tinokae
(Keke kinera tanisa butubutu Kora. Hemani sa tie pa tutina e Ezara si kuberia.)
1 Kei Zihova qua Tamasa pu va sare au,
pana rane si tepa atu si arau,
meke pana boṉi si kabo atu si rau pa kenumu Goi.
2 Mu avosia sa qua vinaravara,
Mu va taliṉa mae au pa qua kinabo.
3 Ura soku hola sari na qua tinasuna,
meke ele tata pa minate si rau.
4 Gua ari doduru si rau sapu tata pa minate,
ele beto mo sa qua ṉiniraṉira.
5 Somanae tava muliuṉu si rau koari na tie matedi,
kekeṉoṉo gua ri pu ta seke va mate, sapu eko pa dia lovu.
Kekeṉoṉo gua arini pu ele muliṉi ni Goi,
ura ele taluarae pa Mua kinopu si arini.
6 Ele vala nau Goi pa minate si rau,
pa korapana sa lovu hupohuporona,
vasina sapu huporo dudukurumu.
7 Sa Mua binugoro si guana bogusu
sapu opo tamunau meke kuzu au rini.
8 Sari na qua baere si va taliri Goi pude hakohako nau si rau;
ele vata evaṉae nau Goi na keke tiṉitoṉa bonina si rau koarini;
guana ta tuku veko si rau, ke lopu boka govete.
9 Tava rida sari na mataqu koari na tinasigiti.
Kei Zihova, doduru rane si va sagei rau
sari na limaqu koa Goi pa vinaravara.
10 Lopu hoke tavete tinavete variva magasadi si Goi koari na tie matedi,
meke lopu hoke toa pule sarini pude vahesi Igo.
11 Lopu boka ta tarae pa lovu sa Mua tataru nabuna koari na tie matedi,
babe ta tozi koarini, sapu kopu ni Goi sari na Mua vina tatara.
12 Lopu ta dogoro tugo pa korapa hinuporo sari na Mua tinavete variva magasadi,
babe sari na Mua lineana pa vasina pu ele ta muliṉae palae.
13 Kei Zihova, arau si kabo atu koa Goi;
pana munumunu si varavara atu si rau.
14 Kei Zihova, na vegua ke veko pani au Goi?
Na vegua ke va paere pule Nigo koa rau si Goi?
15 Podalae sipu tie vaquraqu rau si koa ta sigiti ni rau sari na Mua vina kilasa koa rau.
Ele ṉazulau si rau meke loke tie toka nau.
16 Sa Mua tinaṉaziri si naqotau,
meke sa Mua ginegese si va mate hokarau Goi.
17 Sari na Mua vina kilasa si guana naqe pa vari likohaequ doduru rane,
mae vari kali nau rini.
18 Sari na qua baere sapu tata sisigiti koa rau, si va seui Goi koa rau,
sa hinuporo mo si luli koa rau.