135
Kinera Vinahesi
1 Mi vahesia se Zihova!
Gamu na Nana nabulu. Vahesia sa Pozana e Zihova.
2 Gamu pu turu vahesia se Zihova pa korapa Nana Zelepade,
koari na vasina hopedi pa korapa Nana vetu.
3 Vahesia se Zihova, ura na leana si Asa,
kera vahesia sa Pozana, ura na tataru na vatukana si Asa.
4 Ura ele vizatia e Zihova se Zekopi pude Nana telena,
meke sa butubutu Izireli si pude na Nana tinago.
5 Ura gilania rau sapu nomana lavata se Zihova,
meke ululu hola ni Sa sari kaiqa tamasa pule.
6 Gua sapu qetu nia e Zihova si tavetia Sa,
pa maṉauru meke pa pepeso;
pa lamana, meke pa hubina sa lamana.
7 Va vura mae i Sa sari na lei raneboṉi pa hukihukirina sa pepeso,
vata evaṉi Sa sari na kapi pa raneboṉi,
va vura mae ia Sa sa givusu pa keke lose vasina kopu nia Sa.
8 Asa tugo va matei sari na koburu kenudi
meke na tudia kenudi rina kurukuru ṉame pa Izipi.
9 Vasina si evaṉi Sa sari na tinavete variva magasadi,
na variva nunaladi koe Pero meke ri nana nabulu.
10 Asa tugo va matei sari soku butubutu huporodi,
meke sari na dia baṉara ṉiṉiradi,
11 sapu ari Sihoni, sa baṉara tanisa butubutu Amoraiti,
meke Oqo sa baṉara pa Basani,
meke sari doduru baṉara pa popoa Kenani.
12 Poni Sa koari na tie Izireli sa dia popoa
pude na dia tinago.
13 Kei Zihova, kaqu ta tozi vurae doduru totoso sapu Agoi mo sa Tamasa,
sari doduru sinage si kaqu balabala Igo si Goi.
14 Kaqu lavelave hukata ni e Zihova sari Nana tie;
kaqu tataru ni na toka ni Sa sari Nana nabulu.
15 Sari na beku tadi na butubutu huporodi si na siliva na qolo;* Sam 115:4-8; Rev 9:20
ta tavete mo pa limadi rina tie.
16 Koadia ṉuzudi, ba lopu boka zama,
koadia matadi, ba lopu boka dodogorae.
17 Koa dia taliṉadi ba lopu boka avavosae,
meke lopu boka siṉo si arini.
18 Madi koa gua tugo arini saripu tavetedi sarini,
meke sari doduru pu kalavarae koa rini.
19 Ke gamu na butubutu Izireli, mi vahesia se Zihova.
Ke gamu na butubutu te Eroni, mi vahesia se Zihova.
20 Ke gamu na butubutu te Livae, mi vahesia se Zihova.
Gamu pu pamaṉa nia se Zihova, mi vahesia si Asa.
21 Mi vahesia se Zihova pa Zaione,
Koanana si Asa pa Zerusalema, mi vahesia se Zihova!