13
Tava Via pa Sinea
1 “Koasa rane asa si keke bukaha si kote tukele la koasa tutina e Devita meke saripu koa pa Zerusalema, pude va via i koari dia sinea na boni.
2 Koasa rane asa, si kote va rizu pani Rau sari pozadi ri na beku koasa popoa, meke lopu kote ta balabala pule hokara si arini,” zama vura gua se Zihova Tadi na Qeto Minate. “Kote va rizu pani Rau sari na poropita meke sa hahanana bonina koasa popoa. 3 Meke be guana korokorotae si keke tie, si sari tiatamana, arini pu podona, si kote zama guahe koa sa, ‘Agoi si kaqu mate, sina ele tozi goi sari koha pa Pozana e Zihova.’ Ke pana korokorotae si asa si kote ari tiatamana soti mo kote hova va mate ia.
4 Koasa rane asa si kote kurekure sari doduru poropita koari dia dinogodogorae. Lopu kote va sage i rini sari poko tadi na poropita pude sekesekeini sari tie. 5 Kote zama si asa, ‘Lopu na poropita si arau. Na tie lelete mo si arau; sa qua tinoa si pa pepeso mo podalae tu koburuqu,’ kote gua. 6 Pana nanasa ia keke tie, ‘Nasa sari bakora pa tinimu hire?’ gua, si kote olaṉa guahe si asa, ‘Sari bakora si vagi ni rau pa vetu tanisa qua baere,’ kote gua.”
Sa Ginarunu pude Va Mate ia sa Sepati te Tamasa
7 “Kei vedara, mu vaṉunu, mu kana la ia sa Qua sepati,
kana la ia sa tie sapu koa tata koa Rau!”
zama vura gua se Zihova Tadi na Qeto Minate.
“Seke ia sa sepati,
pude hurakatae sari na sipi,
meke kote va taliri la nia Rau sa Limaqu koari na lami.* Mt 26:31; Mk 14:27
8 Koasa doduruna sa popoa,
si karua koari ka ṉeta si kote ta seke gore meke mate;
gua ba keke koari ka ṉeta si kote koa hola vasina.
9 Sapu keke hie si kote vagi la nia Rau koasa nika;
kote va via i Rau si arini guana va via siliva
meke podeke i guana qolo.
Kote tioko mae ia rini sa Pozaqu
meke kote olaṉa i Rau;
kote zama si Arau, ‘Arini si na Qua tinoni,’
meke kote zama si arini, ‘E Zihova sa mami Tamasa,’ kote gua.”