8
Yesu wu ɲɛ wèe wo saraya ɲaha shɔɔnrivɛɛ wo ɲuŋɔfɔgbɔ we
1 Ayiwa, jomɔ pemu bɛɛri wèe ya yu ge, pu ɲuŋɔ yɛ pyaa ɲɛ na saraya ɲaha shɔɔnrivɛɛ wo ɲuŋɔfɔgbɔ wemu wu ɲɛ wèe mu ge, wee nidɛɛngɛ ki ɲɛ Se Bɛɛri Fɔɔ To Kilɛ kanige cɛ fugba wu ni. 2 Kilɛ-pɛɛŋɛ pugbɔhɔ kemu ni wʼa wu wo labye wu pyi ge, kee ɲɛ fàya puga see wogo kemu Kafɔɔ Kilɛ yɛ pyaa ya yereŋɛ ge; sipyiyawyii wo niyereŋɛ bɛ wɛ.
3 Saraya ɲaha shɔɔnrivɛɛ wo ɲuŋɔfɔgbɔ bɛɛri, wu kateŋɛnɛ ɲuŋɔ ki ɲɛ na yakanya ni saraya yi kaan Kilɛ mu. Lee na, li waha lʼi waha, wèe bɛ wo saraya ɲaha shɔɔnrivɛɛ wo ɲuŋɔfɔgbɔ wu bɛ ya yaa na saraga ka wolo. 4 Wu da bi bye ɲiŋɛ ke na wu bi da bye saraya ɲaha shɔɔnrivɔɔ wɛ. Bani saraya ɲaha shɔɔnrivɛɛ pii wa na xɔ piimu pʼa yakanya ye, ni saraya yi keree ɲaha shɔɔnri, na bɛ ni Kilɛ tudunmɔɔ Musa wo saliya wu ni ge. 5 Pee wo saraya ɲaha shɔɔnrivɛɛrɛ tʼa byi Kilɛ-pɛɛŋɛ puga kemu ni ge, kee ɲɛ fugba wogo ki wo jaa. Lee na, tuun wemu ni Kilɛ tudunmɔɔ Musa bi da fàŋa puga ki yereŋɛ ge, a Kilɛ di wu pye: «Jaa wemu wʼa shɛ ma na na ma yaha faaboboŋɔ ki ɲuŋɔ ni ge, la le mʼa ki bɛɛri yàa mu.»* Ɛkizode 25:40 6 Ga nimɛ Yesu wo labye wʼa ye na kanha saraya ɲaha shɔɔnrivɛɛ pusamaa wo wu na. Bani wee wu ɲɛ susurodɛgɛmɛ Kilɛ ni sipyii pu tɛ ni. Kariɲɛɛgɛ ɲɔmɛɛ nivonɔ lʼa ye na kanha nilɛɛ li na, bani lee nɔhɔ ya teŋɛ ɲɔmɛhɛɛ kiimu na ge, kee ya ye nizhiigee ki na.
7 Can na, kariɲɛɛgɛ ɲɔmɛɛ nizhiinɛ li ɲɔ da bi fa, ɲuŋɔ bi da bye li na pu na shuun wuu nɔhɔ shan wɛ. 8 Ga Kilɛ ya wu sipyii pu jaagi, na pu pye:
«Li wii caya ya wa ma,
nɛ Kafɔɔ Kilɛ wʼa jo mu.
Nɛ na ba kariɲɛɛgɛ ɲɔmɛɛ nivonɔ lɔ
Izirayɛli puga ke ni Zhuda puga ki mu.
9 Nɛ pu sefɛlɛɛ pu keŋɛ co,
na pu yeege caŋa kemu Misira fiige ki ni ge,
kariɲɛɛgɛ ɲɔmɛɛ le nɛ lɔ pu mu wee tuun wu ni ge,
nivonɔ li da ba bye lee tuugo wɛ.
Bani pʼa nɛ kariɲɛɛgɛ ɲɔmɛɛ li kyɛɛgi.
Lee wuu na nɛ bɛ ya pu yaha.
10 Kariɲɛɛgɛ ɲɔmɛɛ le nɛ da ba lɔ Izirayɛli nagoo pu mu
yee caya yi dʼa toro xɔ ge, lee le:
Nɛ na ba na saliya wu le pu fungɔnyɔ ni,
di wu ka pu zɔlɔɔ na.
Nɛ na ba bye pu Kilɛ,
pʼi bye nɛ sipyii.
11 Wa shishiin da ga ba wu shi shɛn,
kelee wu ceboro kalaa nige wɛ na:
‹Yi Kafɔɔ cɛ wɛ.›
Bani pu bɛɛri na ba nɛ cɛ,
na lɔ sipyitiilee na fo na shɛ nɔ sipyigbɔɔ na.
12 Nɛ na ba pu kanahaya yi yafa pu mu.
Nɛ da ba na funŋɔ tirige
ni pu jurumu wu kaa ni nige wɛ.»* Zheremi 31:31-34
13 Tuun wemu ni Kilɛ ya kariɲɛɛgɛ ɲɔmɛɛ nivonɔ li kaa jo ge, a lee di nizhiinɛ li ɲɛri nilɛɛ. Ayiwa, kariɲɛɛgɛ ɲɔmɛɛ nizhiinɛ lemu lʼa lɛ, li caŋa ɲii bɛ dʼa toro ge, lee ya giin di biin.