Ⅰ ಸಭಾಸದ್ಲೋಕಾನ್ ಪ್ರತಿ ಪೌಲೋಽನನ್ಯದೃಷ್ಟ್ಯಾ ಪಶ್ಯನ್ ಅಕಥಯತ್, ಹೇ ಭ್ರಾತೃಗಣಾ ಅದ್ಯ ಯಾವತ್ ಸರಲೇನ ಸರ್ವ್ವಾನ್ತಃಕರಣೇನೇಶ್ವರಸ್ಯ ಸಾಕ್ಷಾದ್ ಆಚರಾಮಿ|

Ⅱ ಅನೇನ ಹನಾನೀಯನಾಮಾ ಮಹಾಯಾಜಕಸ್ತಂ ಕಪೋಲೇ ಚಪೇಟೇನಾಹನ್ತುಂ ಸಮೀಪಸ್ಥಲೋಕಾನ್ ಆದಿಷ್ಟವಾನ್|

Ⅲ ತದಾ ಪೌಲಸ್ತಮವದತ್, ಹೇ ಬಹಿಷ್ಪರಿಷ್ಕೃತ, ಈಶ್ವರಸ್ತ್ವಾಂ ಪ್ರಹರ್ತ್ತುಮ್ ಉದ್ಯತೋಸ್ತಿ, ಯತೋ ವ್ಯವಸ್ಥಾನುಸಾರೇಣ ವಿಚಾರಯಿತುಮ್ ಉಪವಿಶ್ಯ ವ್ಯವಸ್ಥಾಂ ಲಙ್ಘಿತ್ವಾ ಮಾಂ ಪ್ರಹರ್ತ್ತುಮ್ ಆಜ್ಞಾಪಯಸಿ|

Ⅳ ತತೋ ನಿಕಟಸ್ಥಾ ಲೋಕಾ ಅಕಥಯನ್, ತ್ವಂ ಕಿಮ್ ಈಶ್ವರಸ್ಯ ಮಹಾಯಾಜಕಂ ನಿನ್ದಸಿ?

Ⅴ ತತಃ ಪೌಲಃ ಪ್ರತಿಭಾಷಿತವಾನ್ ಹೇ ಭ್ರಾತೃಗಣ ಮಹಾಯಾಜಕ ಏಷ ಇತಿ ನ ಬುದ್ಧಂ ಮಯಾ ತದನ್ಯಚ್ಚ ಸ್ವಲೋಕಾನಾಮ್ ಅಧಿಪತಿಂ ಪ್ರತಿ ದುರ್ವ್ವಾಕ್ಯಂ ಮಾ ಕಥಯ, ಏತಾದೃಶೀ ಲಿಪಿರಸ್ತಿ|

Ⅵ ಅನನ್ತರಂ ಪೌಲಸ್ತೇಷಾಮ್ ಅರ್ದ್ಧಂ ಸಿದೂಕಿಲೋಕಾ ಅರ್ದ್ಧಂ ಫಿರೂಶಿಲೋಕಾ ಇತಿ ದೃಷ್ಟ್ವಾ ಪ್ರೋಚ್ಚೈಃ ಸಭಾಸ್ಥಲೋಕಾನ್ ಅವದತ್ ಹೇ ಭ್ರಾತೃಗಣ ಅಹಂ ಫಿರೂಶಿಮತಾವಲಮ್ಬೀ ಫಿರೂಶಿನಃ ಸತ್ನಾನಶ್ಚ, ಮೃತಲೋಕಾನಾಮ್ ಉತ್ಥಾನೇ ಪ್ರತ್ಯಾಶಾಕರಣಾದ್ ಅಹಮಪವಾದಿತೋಸ್ಮಿ|

Ⅶ ಇತಿ ಕಥಾಯಾಂ ಕಥಿತಾಯಾಂ ಫಿರೂಶಿಸಿದೂಕಿನೋಃ ಪರಸ್ಪರಂ ಭಿನ್ನವಾಕ್ಯತ್ವಾತ್ ಸಭಾಯಾ ಮಧ್ಯೇ ದ್ವೌ ಸಂಘೌ ಜಾತೌ|

Ⅷ ಯತಃ ಸಿದೂಕಿಲೋಕಾ ಉತ್ಥಾನಂ ಸ್ವರ್ಗೀಯದೂತಾ ಆತ್ಮಾನಶ್ಚ ಸರ್ವ್ವೇಷಾಮ್ ಏತೇಷಾಂ ಕಮಪಿ ನ ಮನ್ಯನ್ತೇ, ಕಿನ್ತು ಫಿರೂಶಿನಃ ಸರ್ವ್ವಮ್ ಅಙ್ಗೀಕುರ್ವ್ವನ್ತಿ|

Ⅸ ತತಃ ಪರಸ್ಪರಮ್ ಅತಿಶಯಕೋಲಾಹಲೇ ಸಮುಪಸ್ಥಿತೇ ಫಿರೂಶಿನಾಂ ಪಕ್ಷೀಯಾಃ ಸಭಾಸ್ಥಾ ಅಧ್ಯಾಪಕಾಃ ಪ್ರತಿಪಕ್ಷಾ ಉತ್ತಿಷ್ಠನ್ತೋ ಽಕಥಯನ್, ಏತಸ್ಯ ಮಾನವಸ್ಯ ಕಮಪಿ ದೋಷಂ ನ ಪಶ್ಯಾಮಃ; ಯದಿ ಕಶ್ಚಿದ್ ಆತ್ಮಾ ವಾ ಕಶ್ಚಿದ್ ದೂತ ಏನಂ ಪ್ರತ್ಯಾದಿಶತ್ ತರ್ಹಿ ವಯಮ್ ಈಶ್ವರಸ್ಯ ಪ್ರಾತಿಕೂಲ್ಯೇನ ನ ಯೋತ್ಸ್ಯಾಮಃ|

Ⅹ ತಸ್ಮಾದ್ ಅತೀವ ಭಿನ್ನವಾಕ್ಯತ್ವೇ ಸತಿ ತೇ ಪೌಲಂ ಖಣ್ಡಂ ಖಣ್ಡಂ ಕರಿಷ್ಯನ್ತೀತ್ಯಾಶಙ್ಕಯಾ ಸಹಸ್ರಸೇನಾಪತಿಃ ಸೇನಾಗಣಂ ತತ್ಸ್ಥಾನಂ ಯಾತುಂ ಸಭಾತೋ ಬಲಾತ್ ಪೌಲಂ ಧೃತ್ವಾ ದುರ್ಗಂ ನೇತಞ್ಚಾಜ್ಞಾಪಯತ್|

Ⅺ ರಾತ್ರೋ ಪ್ರಭುಸ್ತಸ್ಯ ಸಮೀಪೇ ತಿಷ್ಠನ್ ಕಥಿತವಾನ್ ಹೇ ಪೌಲ ನಿರ್ಭಯೋ ಭವ ಯಥಾ ಯಿರೂಶಾಲಮ್ನಗರೇ ಮಯಿ ಸಾಕ್ಷ್ಯಂ ದತ್ತವಾನ್ ತಥಾ ರೋಮಾನಗರೇಪಿ ತ್ವಯಾ ದಾತವ್ಯಮ್|

Ⅻ ದಿನೇ ಸಮುಪಸ್ಥಿತೇ ಸತಿ ಕಿಯನ್ತೋ ಯಿಹೂದೀಯಲೋಕಾ ಏಕಮನ್ತ್ರಣಾಃ ಸನ್ತಃ ಪೌಲಂ ನ ಹತ್ವಾ ಭೋಜನಪಾನೇ ಕರಿಷ್ಯಾಮ ಇತಿ ಶಪಥೇನ ಸ್ವಾನ್ ಅಬಧ್ನನ್|

ⅩⅢ ಚತ್ವಾರಿಂಶಜ್ಜನೇಭ್ಯೋಽಧಿಕಾ ಲೋಕಾ ಇತಿ ಪಣಮ್ ಅಕುರ್ವ್ವನ್|

ⅩⅣ ತೇ ಮಹಾಯಾಜಕಾನಾಂ ಪ್ರಾಚೀನಲೋಕಾನಾಞ್ಚ ಸಮೀಪಂ ಗತ್ವಾ ಕಥಯನ್, ವಯಂ ಪೌಲಂ ನ ಹತ್ವಾ ಕಿಮಪಿ ನ ಭೋಕ್ಷ್ಯಾಮಹೇ ದೃಢೇನಾನೇನ ಶಪಥೇನ ಬದ್ಧ್ವಾ ಅಭವಾಮ|

ⅩⅤ ಅತಏವ ಸಾಮ್ಪ್ರತಂ ಸಭಾಸದ್ಲೋಕೈಃ ಸಹ ವಯಂ ತಸ್ಮಿನ್ ಕಞ್ಚಿದ್ ವಿಶೇಷವಿಚಾರಂ ಕರಿಷ್ಯಾಮಸ್ತದರ್ಥಂ ಭವಾನ್ ಶ್ವೋ ಽಸ್ಮಾಕಂ ಸಮೀಪಂ ತಮ್ ಆನಯತ್ವಿತಿ ಸಹಸ್ರಸೇನಾಪತಯೇ ನಿವೇದನಂ ಕುರುತ ತೇನ ಯುಷ್ಮಾಕಂ ಸಮೀಪಂ ಉಪಸ್ಥಿತೇಃ ಪೂರ್ವ್ವಂ ವಯಂ ತಂ ಹನ್ತು ಸಜ್ಜಿಷ್ಯಾಮ|

ⅩⅥ ತದಾ ಪೌಲಸ್ಯ ಭಾಗಿನೇಯಸ್ತೇಷಾಮಿತಿ ಮನ್ತ್ರಣಾಂ ವಿಜ್ಞಾಯ ದುರ್ಗಂ ಗತ್ವಾ ತಾಂ ವಾರ್ತ್ತಾಂ ಪೌಲಮ್ ಉಕ್ತವಾನ್|

ⅩⅦ ತಸ್ಮಾತ್ ಪೌಲ ಏಕಂ ಶತಸೇನಾಪತಿಮ್ ಆಹೂಯ ವಾಕ್ಯಮಿದಮ್ ಭಾಷಿತವಾನ್ ಸಹಸ್ರಸೇನಾಪತೇಃ ಸಮೀಪೇಽಸ್ಯ ಯುವಮನುಷ್ಯಸ್ಯ ಕಿಞ್ಚಿನ್ನಿವೇದನಮ್ ಆಸ್ತೇ, ತಸ್ಮಾತ್ ತತ್ಸವಿಧಮ್ ಏನಂ ನಯ|

ⅩⅧ ತತಃ ಸ ತಮಾದಾಯ ಸಹಸ್ರಸೇನಾಪತೇಃ ಸಮೀಪಮ್ ಉಪಸ್ಥಾಯ ಕಥಿತವಾನ್, ಭವತಃ ಸಮೀಪೇಽಸ್ಯ ಕಿಮಪಿ ನಿವೇದನಮಾಸ್ತೇ ತಸ್ಮಾತ್ ಬನ್ದಿಃ ಪೌಲೋ ಮಾಮಾಹೂಯ ಭವತಃ ಸಮೀಪಮ್ ಏನಮ್ ಆನೇತುಂ ಪ್ರಾರ್ಥಿತವಾನ್|

ⅩⅨ ತದಾ ಸಹಸ್ರಸೇನಾಪತಿಸ್ತಸ್ಯ ಹಸ್ತಂ ಧೃತ್ವಾ ನಿರ್ಜನಸ್ಥಾನಂ ನೀತ್ವಾ ಪೃಷ್ಠವಾನ್ ತವ ಕಿಂ ನಿವೇದನಂ? ತತ್ ಕಥಯ|

ⅩⅩ ತತಃ ಸೋಕಥಯತ್, ಯಿಹೂದೀಯಲಾಕಾಃ ಪೌಲೇ ಕಮಪಿ ವಿಶೇಷವಿಚಾರಂ ಛಲಂ ಕೃತ್ವಾ ತಂ ಸಭಾಂ ನೇತುಂ ಭವತಃ ಸಮೀಪೇ ನಿವೇದಯಿತುಂ ಅಮನ್ತ್ರಯನ್|

ⅩⅪ ಕಿನ್ತು ಮವತಾ ತನ್ನ ಸ್ವೀಕರ್ತ್ತವ್ಯಂ ಯತಸ್ತೇಷಾಂ ಮಧ್ಯೇವರ್ತ್ತಿನಶ್ಚತ್ವಾರಿಂಶಜ್ಜನೇಭ್ಯೋ ಽಧಿಕಲೋಕಾ ಏಕಮನ್ತ್ರಣಾ ಭೂತ್ವಾ ಪೌಲಂ ನ ಹತ್ವಾ ಭೋಜನಂ ಪಾನಞ್ಚ ನ ಕರಿಷ್ಯಾಮ ಇತಿ ಶಪಥೇನ ಬದ್ಧಾಃ ಸನ್ತೋ ಘಾತಕಾ ಇವ ಸಜ್ಜಿತಾ ಇದಾನೀಂ ಕೇವಲಂ ಭವತೋ ಽನುಮತಿಮ್ ಅಪೇಕ್ಷನ್ತೇ|

ⅩⅫ ಯಾಮಿಮಾಂ ಕಥಾಂ ತ್ವಂ ನಿವೇದಿತವಾನ್ ತಾಂ ಕಸ್ಮೈಚಿದಪಿ ಮಾ ಕಥಯೇತ್ಯುಕ್ತ್ವಾ ಸಹಸ್ರಸೇನಾಪತಿಸ್ತಂ ಯುವಾನಂ ವಿಸೃಷ್ಟವಾನ್|

ⅩⅩⅢ ಅನನ್ತರಂ ಸಹಸ್ರಸೇನಾಪತಿ ರ್ದ್ವೌ ಶತಸೇನಾಪತೀ ಆಹೂಯೇದಮ್ ಆದಿಶತ್, ಯುವಾಂ ರಾತ್ರೌ ಪ್ರಹರೈಕಾವಶಿಷ್ಟಾಯಾಂ ಸತ್ಯಾಂ ಕೈಸರಿಯಾನಗರಂ ಯಾತುಂ ಪದಾತಿಸೈನ್ಯಾನಾಂ ದ್ವೇ ಶತೇ ಘೋಟಕಾರೋಹಿಸೈನ್ಯಾನಾಂ ಸಪ್ತತಿಂ ಶಕ್ತಿಧಾರಿಸೈನ್ಯಾನಾಂ ದ್ವೇ ಶತೇ ಚ ಜನಾನ್ ಸಜ್ಜಿತಾನ್ ಕುರುತಂ|

ⅩⅩⅣ ಪೌಲಮ್ ಆರೋಹಯಿತುಂ ಫೀಲಿಕ್ಷಾಧಿಪತೇಃ ಸಮೀಪಂ ನಿರ್ವ್ವಿಘ್ನಂ ನೇತುಞ್ಚ ವಾಹನಾನಿ ಸಮುಪಸ್ಥಾಪಯತಂ|

ⅩⅩⅤ ಅಪರಂ ಸ ಪತ್ರಂ ಲಿಖಿತ್ವಾ ದತ್ತವಾನ್ ತಲ್ಲಿಖಿತಮೇತತ್,

ⅩⅩⅥ ಮಹಾಮಹಿಮಶ್ರೀಯುಕ್ತಫೀಲಿಕ್ಷಾಧಿಪತಯೇ ಕ್ಲೌದಿಯಲುಷಿಯಸ್ಯ ನಮಸ್ಕಾರಃ|

ⅩⅩⅦ ಯಿಹೂದೀಯಲೋಕಾಃ ಪೂರ್ವ್ವಮ್ ಏನಂ ಮಾನವಂ ಧೃತ್ವಾ ಸ್ವಹಸ್ತೈ ರ್ಹನ್ತುಮ್ ಉದ್ಯತಾ ಏತಸ್ಮಿನ್ನನ್ತರೇ ಸಸೈನ್ಯೋಹಂ ತತ್ರೋಪಸ್ಥಾಯ ಏಷ ಜನೋ ರೋಮೀಯ ಇತಿ ವಿಜ್ಞಾಯ ತಂ ರಕ್ಷಿತವಾನ್|

ⅩⅩⅧ ಕಿನ್ನಿಮಿತ್ತಂ ತೇ ತಮಪವದನ್ತೇ ತಜ್ಜ್ಞಾತುಂ ತೇಷಾ ಸಭಾಂ ತಮಾನಾಯಿತವಾನ್|

ⅩⅩⅨ ತತಸ್ತೇಷಾಂ ವ್ಯವಸ್ಥಾಯಾ ವಿರುದ್ಧಯಾ ಕಯಾಚನ ಕಥಯಾ ಸೋಽಪವಾದಿತೋಽಭವತ್, ಕಿನ್ತು ಸ ಶೃಙ್ಖಲಬನ್ಧನಾರ್ಹೋ ವಾ ಪ್ರಾಣನಾಶಾರ್ಹೋ ಭವತೀದೃಶಃ ಕೋಪ್ಯಪರಾಧೋ ಮಯಾಸ್ಯ ನ ದೃಷ್ಟಃ|

ⅩⅩⅩ ತಥಾಪಿ ಮನುಷ್ಯಸ್ಯಾಸ್ಯ ವಧಾರ್ಥಂ ಯಿಹೂದೀಯಾ ಘಾತಕಾಇವ ಸಜ್ಜಿತಾ ಏತಾಂ ವಾರ್ತ್ತಾಂ ಶ್ರುತ್ವಾ ತತ್ಕ್ಷಣಾತ್ ತವ ಸಮೀಪಮೇನಂ ಪ್ರೇಷಿತವಾನ್ ಅಸ್ಯಾಪವಾದಕಾಂಶ್ಚ ತವ ಸಮೀಪಂ ಗತ್ವಾಪವದಿತುಮ್ ಆಜ್ಞಾಪಯಮ್| ಭವತಃ ಕುಶಲಂ ಭೂಯಾತ್|

ⅩⅩⅪ ಸೈನ್ಯಗಣ ಆಜ್ಞಾನುಸಾರೇಣ ಪೌಲಂ ಗೃಹೀತ್ವಾ ತಸ್ಯಾಂ ರಜನ್ಯಾಮ್ ಆನ್ತಿಪಾತ್ರಿನಗರಮ್ ಆನಯತ್|

ⅩⅩⅫ ಪರೇಽಹನಿ ತೇನ ಸಹ ಯಾತುಂ ಘೋಟಕಾರೂಢಸೈನ್ಯಗಣಂ ಸ್ಥಾಪಯಿತ್ವಾ ಪರಾವೃತ್ಯ ದುರ್ಗಂ ಗತವಾನ್|

ⅩⅩⅩⅢ ತತಃ ಪರೇ ಘೋಟಕಾರೋಹಿಸೈನ್ಯಗಣಃ ಕೈಸರಿಯಾನಗರಮ್ ಉಪಸ್ಥಾಯ ತತ್ಪತ್ರಮ್ ಅಧಿಪತೇಃ ಕರೇ ಸಮರ್ಪ್ಯ ತಸ್ಯ ಸಮೀಪೇ ಪೌಲಮ್ ಉಪಸ್ಥಾಪಿತವಾನ್|

ⅩⅩⅩⅣ ತದಾಧಿಪತಿಸ್ತತ್ಪತ್ರಂ ಪಠಿತ್ವಾ ಪೃಷ್ಠವಾನ್ ಏಷ ಕಿಮ್ಪ್ರದೇಶೀಯೋ ಜನಃ? ಸ ಕಿಲಿಕಿಯಾಪ್ರದೇಶೀಯ ಏಕೋ ಜನ ಇತಿ ಜ್ಞಾತ್ವಾ ಕಥಿತವಾನ್,

ⅩⅩⅩⅤ ತವಾಪವಾದಕಗಣ ಆಗತೇ ತವ ಕಥಾಂ ಶ್ರೋಷ್ಯಾಮಿ| ಹೇರೋದ್ರಾಜಗೃಹೇ ತಂ ಸ್ಥಾಪಯಿತುಮ್ ಆದಿಷ್ಟವಾನ್|