1 Oso Anɨtu Aꞌamu Isɨlael somo Uyakoloꞌmentiso somneꞌne Syafɨsiyo sɨkuno engo * Mt. 26:2 enjwa soꞌmo fehonoloꞌmongkomaho. mmoꞌnyo aho fehohnjo hopiꞌnono nomꞌni mtaꞌni angaꞌno nowentanɨngki Jisas kako ango Mpetani sopo umentisofoho. Oso ango hopo sopo Lasalos kako poyo peꞌnɨngkahonɨngki Jisas kako ulɨkaꞌmentiso sopono umentisofoho. 2 Oso ango Mpetani hopo sopo iꞌmofɨwahonɨngki Jisasɨmneꞌno wosopayo engo iloho yontɨfi Mota kako wosopayo ikuꞌyopo polofosyalokumpento huꞌmmentisofoho. Jisasɨꞌnji aꞌamu nomꞌne soꞌnji Lasalos kako huhwoꞌnji hofɨko nohumantɨfi wopayo nɨmentohofofoho. 3 Oso hohosohonta Maliya kako hwone mijo hamniyoho engo mpe imentisoso nomanto Jisasɨye sɨfemo sisyonto kakoe mijiyo sawemo soꞌnji sɨfemo sosayo usɨpoꞌmentisofoho. Oso hwone mijo sohwoe akino wopɨngoso ango homo somo ehuhnnalohoꞌmentisofoho. 4 Jisasɨye inomokomoyo fihwo kakoe yofe Jutas Isɨkaliyout kako Jisasɨmo fonjasiyoꞌne tokoyoꞌofo iyoꞌne sohwo oso homo somo uhwononto ulɨmento, 5 Oso mijo wonyoangkafoso kako pehoꞌno sisyohoho. Olo mijo hiloso nomꞌne aꞌamuso mpe yontɨfijontentesi hamniyoho mɨkunɨmposo aꞌamu hamniyoho syohoꞌnjo sohwo soswo angaꞌnohino somjo hamniyoho hopiꞌnono nejapɨkuji nakwo aꞌamu umofonyo iwoꞌnɨngkohofo somo uyɨhwanesohilo. 6 Ose ulɨmentisoso kako aꞌamu umofonyo iwoꞌnɨngkohofo somneꞌno huno nehopi syafɨsyonto ulɨmentisoꞌmaho. Oꞌo, kako hamniyoho hufo imojo soꞌno ulɨmentisofoho. Jisasɨꞌnji kakoe inomokomoyo sohwonaꞌnnonji nakwo hano emoyontanɨngkukwone Jutas Isɨkaliyout sohwo kako nakwoe hamniyoho ipofo mokosyohumante somtaꞌni hufo imojo hweho.

7 Oseso Jisas ulɨmento, Olo aꞌmusi kako olo ntohofiso losoꞌno kakoe syohofoho. Sekwo tɨmoꞌnohino uhwontohumamno. Kako hwone mijo hiloso nomokosyohumentanɨngkuhwosi. Ngko poyo imoꞌnɨme sohonta nje pijafomo ntoꞌno enɨsyohumaniyoho. 8 I aꞌamu umofonyo iwoꞌnɨngkohofoso sekwoꞌnji engolopohamo neꞌno humawoꞌnɨngkohofofoho. I osoꞌno ngko sekwoꞌnji humaleso sɨkuno moiꞌwo weꞌenepi umoꞌnɨmontonoho. Osoꞌno aꞌamu ngkimo wopɨngo ntohofoꞌne sɨkuno piꞌnɨngo mauyoho.

9 Aꞌamu Juta hwe moyaꞌmi piꞌnɨngoso Jisas ango Mpetani sopo humaho upaꞌnontɨfi oso poneꞌno womentohofofoho. Hofɨko Jisasɨmnenohini uhwonantɨfi womentohofoꞌmaho. Oꞌo, Jisas kako Lasalos poyo peꞌnɨmentiso sohumo ulɨkaꞌmentiso sohwo huhwoꞌnjimo uhwonano lontɨfi womentohofofoho. 10 Oso aꞌamu tajo ango syohoꞌnjo sohwa hofɨko oso hiso uhwonontɨfi hofɨko Jisasɨmneꞌnohini mtitoꞌmentohofoꞌmaho. Oꞌo, Lasalos huhwoꞌnjimo fonjosiyoꞌne mtitoꞌmentohofofoho. 11 Hwapɨngoso aꞌamu Juta hwe moyaꞌmi piꞌnɨngoso hofɨko Lasalosɨmneꞌno huno piꞌnɨngo syafɨsyontɨfi aꞌamu tajo ango syohoꞌnjo sohwamo ulɨkoꞌmantɨfi Jisasɨmo sɨmeho hiꞌntnnono uyɨmentohofofoho.

12 Oso ango Jelusalem hwe moyaꞌmi piꞌnɨngo engoso oso Anɨtu Aꞌamu Isɨlael somo Uyakoloꞌmentiso somneꞌne Syafɨsiyo Sɨkuno Engo † Mt. 26:2 enjwa soꞌmo fehonoloꞌmongkomaho. somo uhwonano lontɨfi sɨmentohofofoho. Oso hopo sopo nohumantɨfi upaꞌnɨmentohofoso Jisas kako moꞌnɨngkanta Jelusalemneꞌno wapmmontonoho upaꞌnɨmentohofofoho. 13 Oseso hofɨko yoꞌmayo wokoso wopɨngo wopɨngoso nomotawentɨfi Jisasɨmneꞌno honɨngkanopo hontohumamentohofofoho. Nohontohumantɨfi Jisasɨmneꞌno joho ole lɨmentohofi,

Ose lɨmentohofofoho.

14 Jisas kako yahu osyuyo toungki angaꞌno notɨpemanto yahu sohwoe hohujopo kehumanto sɨmentisofoho. Oso hisoꞌno ifalifaliyo ole woꞌnnyofoho.

Oso ifalifaliyo hohonta mtɨꞌmokumentohofofoho. 16 Oso hohosohonta Jisasɨye inomokomoyo sohwonaꞌni nakwo oso hungkuno ifalifaliyo mtɨꞌmokumentohofo soꞌno huno monayo hwonaꞌnyoho. I osoꞌno tɨfi noꞌmo Jisas kako ahwomomo sɨmentiso sohonta nakwo oso ifalifaliyo hisoꞌno huno syafɨhuꞌmentɨhwoni yoꞌmayo wopɨngoso Jisasɨmneꞌno oso sɨkuno homo somo aꞌamu ulohoꞌmentohofo soꞌno huno ikwesyafɨhuꞌmentɨhwonefoho.

17 Hohonta Lasalos poyo peꞌnonto kakoe pijafoso piꞌnɨmomo woꞌmentiso sohonta aꞌamu Juta piꞌnɨngo engoso Jisasɨꞌnji humamentohofofoho. Jisas kako Lasalosɨmo joho ulonto nulɨkofahonjoso hofɨko uhwonɨmentohofofoho. Oso aꞌamu huhwo sohwa hofɨko nomꞌne aꞌamu piꞌnɨngoꞌnjo sopo Jisas kako yoꞌmayo imentiso soꞌno lutɨhwamentohofofoho. 18 Oseso hwe moyaꞌmi piꞌnɨngo engoso yoꞌmayo wonyoangkafo Jisas imentiso soꞌno upaꞌnontɨfi oso aꞌamu hiso Jisasɨmo honɨngkanopo uswoꞌnɨmentohofofoho. 19 Uswoꞌnɨngkahonɨngkofi aꞌamu Falisi sohwa hofɨko nuhwonontɨfi sɨmeho tango uyahonɨngki ole hnnɨmentohofi, Ihwoni, aꞌamuso hofɨko nakumneꞌno huno mosyonefɨsyalokuyohofo. Oꞌo, aꞌamu angoꞌmeemjo hopiꞌnonohinoso hofɨko nakumo nosɨkwojonaofontɨfi Jisasɨmnohini inomokohoꞌnawotofo. Ose hnnɨmentohofofoho.

20 Aꞌamu piꞌnɨngo engoso sɨkuno iyoho humayo engoso uhwonano lontɨfi ango Jelusalemneꞌno Anɨtuye yofe hoꞌnomayoꞌne sɨmentohofofoho. Aꞌamu Jutaꞌnohiniꞌmaho. Oꞌo, aꞌamu Ngkɨlik fehohnjo hiꞌnji sɨmentohofofoho. 21 Oso aꞌamu Ngkɨlik huhwo sohwa hofɨko Filipɨmo uꞌmantɨfi ulɨmentohofi, Hwe engofo, nakwo Jisasɨmo uhwonano lontani sahopɨhwone hwonaꞌnyoho. Ose ulɨmentohofofoho. Filip huhwo sohwo kako hwaho Ngkalili ango Mpetɨsaita mtaꞌango hweho. 22 Filip kako hofɨkoe hungkuno hiso upaꞌnonto nowento Entɨlumo ulahonɨngki siko Jisasɨmo uꞌmanji oso hungkuno hiso ulɨmentisiyefoho. 23 Jisas kako sikimo ulɨmento, Ngko Aꞌamufe Hwomu sohwoꞌni poyo imoꞌnɨꞌmo apaꞌno songo lɨkahmꞌmo nje yofe engo mayoꞌne sɨkunoso mofonepo nto iꞌmofapohoho. 24 Ose ulɨkwato lohofonto kako poyo imoꞌnyoꞌne pahnnɨmo hungkuno ole ulɨmento, Hwe fihwo kako hamoyo mofososo hami hiso siki wehwosi piso nɨhuꞌnahone uyɨmontonoho. I osoꞌno hwe fihwo kako hami mofososo hami hiso piso ihwosoꞌno nomꞌne tɨmo sahopɨhwosi ne piꞌnɨngo umoꞌmontonoho. 25 Oso paꞌnyoso aꞌamu fihwo kako kakineꞌnohini huno syafɨhuꞌnonto kakoe yofeꞌnohini hoꞌnomaꞌnɨwoꞌnɨngkiso sohwo kakoe humayoso aho yokumpohnꞌnyo kemokosyohumanto poyo peꞌnɨngkuhwosi tohino engo nomane hweho. I osoꞌno hwe nomꞌnihwo kako kakineꞌno huno mosyafɨhuꞌnyoꞌnjo yonto nomꞌne aꞌamu somneꞌno ufoꞌmawoꞌnyoꞌneꞌnohini syafɨsyɨwoꞌnɨngkiso sohwo kako poyo peꞌnɨngkuhwosi songo neꞌno wonyoangkafo humayoꞌneso notɨpemane hweho. 26 Oso aꞌamu Ngkɨlik huhwo sohwa hofɨko nje inomokomoyo umoꞌnano lɨfijoꞌmanji siko nuhusɨsi hofɨkimo ole ulinyo. Hofɨko ngkimo wonnɨngkopantɨfiꞌmanji oyonɨmno lalofoho ulinyo. Aꞌamu nje syoho ntohofiyoso hofɨko ngkimo tɨfi nnɨngkapɨwoꞌnɨngkohofofoho. Oseso ngko nje syoho ntohofiyoso ngko humame sopo hofɨko wohumapɨfe. Nje syoho ntohofiyo ne somo Mpohwo Anɨtu sohwo kako hofɨkimo uhwonɨngkuhwosi kako hofɨkoe yofeso wohoꞌnomaꞌmontonoho. Ose ulɨmentisofoho.

27 Jisas kako nohumanto ulɨmento, Nje sɨmeho tango mɨkunɨmposo niyohoho. Ngko Mpohumo jomo pehofo ulɨmnehono. Nje Mpohwo sohwosi olo tango engo ngkimo wonɨꞌmaꞌmonto iso losomo kɨko wae yanɨmotnnehino. Ose ulɨmnehono. Oꞌo, olo tango hiloso ngko mayoꞌne pmmentohono. 28 Oso hisoꞌno ngko nje Mpohumo hungkuno ole ulɨmo, Mpohwo sohwosi olo aꞌamu hopiꞌnonohino loso hofɨko jɨje yofe engo wojo soꞌno huno uyoneꞌno yoꞌmayo wonyoso hofɨko ngkimo ntapɨfijoꞌmanji noho wontapɨfe.

Jisas ose ulahonɨngki mampaho ahwomo mtaꞌango ole hoꞌnɨmento, Ngko oso hwaho soponeꞌno kuhwotɨmentohe sohonta aꞌamuso nje yokumpohnꞌnyo engo somo uhwonontɨfi nje yofe hoꞌnonɨmaꞌmentohofofoho. I kɨko poyo imoꞌnɨngkohojoꞌno ngko apaꞌno songo kilɨkaꞌme sohonta hofɨko nje yokumpohnꞌnyomo apaꞌno uhwonɨngkuji nje yofe apaꞌno nohoꞌnonɨmapitnnefoho.

29 Ose hoꞌnɨngkahonɨngki hwe moyaꞌmi kakoꞌnjo mofonepo humohumantohofoso oso mampaho hiso upaꞌnontɨfi aꞌamu fehohnjoso ole hnnɨmentohofi, Ahwomo yoka hoꞌnɨngkohoho. Aꞌamu fehohnjoso ole hnnɨmentohofi, Aꞌamu ahwomomjo sohwo kakimo hungkuno ulohoho.

30 Ose hnnɨngkahonɨngkofi Jisas hofɨkimo ulɨmento, Olo mampaho hoꞌnɨngkiso loso ngko upaꞌnyoꞌne hoꞌnɨngkisoꞌmaho. Oꞌo, sekwo upaꞌnyoꞌne hoꞌnɨngkisofoho. 31 Osoꞌno olohonta Anɨtu kako yoꞌmayo yahino wonyo aꞌamu hwahoponjo yɨwoꞌnɨngkohofo soꞌno yano ulofihwosoꞌno hofɨko hofɨkoe wonyo somjo tohino mayoꞌnefoho. Olohonta Anɨtu kako hwe wonyo Seten olo hwaho mokosyohumaso sohwoe yokumpohnꞌnyoso wae weeoꞌmontonoho. 32 Ngko olo hwaho lopo nohumentanɨꞌmo aꞌamu hofɨko ngkimo iyo hwojiyahofɨkuꞌnnyo yokintaho sopo monɨhumatɨpijo sohonta ngko aꞌamumo wohuꞌmemaꞌmonnoho. 33 Oso hungkuno ulɨmentisoso aꞌamu somo ngko poyo imoꞌnɨmneꞌno honɨngkano umofɨtɨhwamo lonto kako oso hungkunoso ulɨmentisofoho.

34 Aꞌamu huhwo sohwa upaꞌnontɨfi Jisasɨmo ulɨmentohofi, Kɨko poyo umoꞌnɨmonnoho lalohino. Nakumo Anɨtuye hungkuno ole nalɨmento, Oso hwe Anɨtu aꞌamu ufoꞌmayoꞌne uhwosopoꞌmentiso sohwo kako songo neꞌno nohumantɨhwone hweho. I osoꞌno kɨko Aꞌamufe Hwomu sohwosɨꞌmanji iyo hwojiyahofɨkuꞌnnyo sopo womonɨhumojantɨfeho eso pehoꞌno lohino. Oso Aꞌamufe Hwomuso tɨhwolo. 35 Ose ulahonɨngkofi Jisas kako pomponaho paꞌnyohwo kakineꞌno pahnnɨmo hungkuno ole ulɨmento, Sekwo olopo nohumentanɨngkuji pomponaho weꞌenehwo sekwoꞌnjo lopo wolasehumontonoho. Nolasesyɨhwosoꞌno sɨkuno wammontonoho. Oseso pomponaho lasesyohwosoꞌno pomponahopo fosyohumamno. Sɨkuno semenoho. Aꞌamu sɨkwoꞌmjohoꞌmjo hano wentoso sohwo kakoe humayoso ntontelo. Awonoho. Huno muyo hweho. 36 I ngko pomponaho sohwoꞌni sekwoꞌnjopo nohumentanɨꞌmo sekwo sɨmeho hiꞌntnnono ntapmno. Sekwo nje hungkunomo tɨfi nnɨngkapɨfijoꞌmanji ngko sekwoe pomponaho sohwoꞌniye mehomi umoꞌnantɨfeho. Ose ulɨkwato lohofonto Jisas kako hofɨkimo ulɨkoꞌmanto hiyaso humamentisofoho.

37 Jisas kako yoꞌmayo wonyoangkafo aꞌamu miyɨwoꞌnɨngkiyohofoso ko yahonɨngki aꞌamu Juta piꞌnɨngoso sɨmeho hiꞌntnnono muyɨmmentohofofoho. 38 Oseso oso hungkuno hohonta Aisaiya sohumo Anɨtu uyahonɨngki lɨmojo sohwo mtɨꞌmokumentisoso ne imoꞌnɨmentisofoho. Hungkuno hiso olenoho.

Aisaiya hohonta ose mtɨꞌmokumentisofoho.

39 Oseso aꞌamuso hofɨko Jisasɨmo sɨmeho hiꞌntnnono uyoso hopoꞌmaho. Olo hiloso hwapɨngo soꞌno Aisaiya kako hungkuno nomꞌne mtɨꞌmokumentisoso olenoho.

41 Aisaiya hohonta kako wojo hopa uhwonɨmentisoso Kɨlaisiye yokumpohnꞌnyo soꞌnji kakoe yofe engo soꞌnji uhwononto kako oso hungkunoso Kɨlaisɨmneꞌno lɨmentono.

42 Aꞌamu Jutafe hwe engo piꞌnɨngo sohwa hofɨko Jisasɨmneꞌno sɨmeho hiꞌntnnono ko uyahonɨngkofi hofɨko aꞌamu Falisi sohwamneꞌno iyoho unɨngkahonɨngki hofɨko Jisasɨmneꞌno hungkuno yolohoso molɨjwaofeꞌnjo imentohofofoho. Hwapɨngoso ole syafɨhuꞌmentohofi, Aꞌamu Falisi sohwa hofɨko nakumo Anɨtuye tajo ango somtaꞌni wae enamopitnnoho lontɨfi molɨjwaofeꞌnjo imentohofofoho. 43 Anɨtu hofɨkineꞌno yoꞌmayo soꞌno huno syafɨsyonte soꞌno hofɨko huno mosyafɨhuꞌmmentohofofoho. Oꞌo, aꞌamu hwahoponjoso hofɨkineꞌno yoꞌmayo soꞌno huno syafɨsyontɨfe so osomnohini syafɨsyontɨfi inɨngkamentohofofoho.

44 Jisas kako hungkuno yokumpohnꞌnyo ole ulɨmento, Aꞌamu fihwo sɨmeho hiꞌntnnono ntopantokunjo sohwo kako ngkineꞌnohino montopantofiyoho. Oꞌo, kako nje Mpohwo olo hwaho loponeꞌno lonɨhwatɨmentiso osohwo huhwoꞌntnneꞌno ntopantofoho. 45 Aꞌamu ngkimo tɨmo nohonantokunjo sohwo kako ngkimnohino monehonantofiyoho. Oꞌo, kako nje Mpohwo ngkimo nɨhwatɨmentiso oso hwo huhwoꞌnjimo ehonalofoho. 46 Ngko olo hwaho loponjo pomponaho sohwoꞌni aꞌamu ngkimo sɨmeho hiꞌntnnono ntapɨfijoꞌmanji hofɨko sɨkwoꞌmjohoꞌmo mohumafitnne soꞌno pmmentohe hwoꞌnyoho. 47 Aꞌamu fihwo kako nje hungkunomo haloho ko upaꞌnɨngkuhwosi hungkuno homo somo tɨfi minɨngkayoꞌnjo sohumo ngko kakoe yahino somneꞌno tohino muyɨmnehono. Oꞌo, ngko aꞌamufe yahino somneꞌno tohino yano uyoꞌne pmmentohe hwonɨꞌmaho. Ngko aꞌamufe wonyomjo tohino mtaꞌni isɨhutofomayoꞌno pmmentohe hwoꞌnyoho. 48 I aꞌamu ngkimo hwotoho nifekuji nje hungkunomo tɨfi minɨngkayoꞌnjoso hofɨko hofɨkimo hofɨkoe yahino wonyo somneꞌno tohino yano ulofiyo sohwo hiꞌnjofoho. Oso sɨkuno aeꞌuyo somo yoꞌmayo hungkuno nto lɨjwasemoꞌmentohe hiso hofɨkoe yahino wonyo somneꞌno tohino yano ulofiyonefoho. 49 Hwapɨngoso yoꞌmayo hungkuno selɨwoꞌnɨngkoheso nje huno mtaꞌangoꞌmaho. Oꞌo, nje Mpohwo kako nɨhwatɨmentiso sohwo kako yoꞌmayo hungkuno hopiꞌnonohinoso lɨjwasemofoꞌne ntahonɨngki selalokweno. 50 Ngko huno ole niyohi, Aꞌamu nje Mpohwoe hungkunomo tɨfi inɨngkaweso sohwo kako songo neꞌno humantɨhwone hweho. Oseso yoꞌmayo hungkuno hopiꞌnonohinoso Mpohwo ntɨwoꞌnɨngkisoso ngko sekumo ntoꞌnohini selalokweno.