Pathien Lekhabu Inthieng Chongtung Thar 1 Thessalonika 5

Pumapa juong nôkna ranga insiemna

1 Lâibungngei le sarnungei, ha neinunngei juongtung rang zora le nikhuo chungroi chu nangni miziek pe rang nâng mak. 2 Pumapa Nikhuo chu jâna inru hong ngâi anghan juongtung atih, ti nangni rengin nin riet minthâr ani. 3 Mingeiin, “Ningbeiriem le jôkna,” zorân an bê lâitakin inningloiin an chunga sietminmangna juong dê ngei a ta! inningloia nupang chunga nâiha ahong tung anghan nîng atih, male mingei hah rotpai thei noni ngei. 4 Aniatachu, lâibungngei le sarnungei, nangni chu ijînga om mak choia, male ma Nikhuo han inru angin nangni dêrak no nih. 5 Nin rêngin avâra mi le sûna mi nin ni. Jâna mi le ijînga mi nimak me. 6 Masikin midangngei anghan in no u; meng ei ta, male hangvangin om ei ti u. 7 Jâna kêng mingei an in ngâi; jâna kêng ju khom an inrûi ngâi. 8 Hannirese eini chu sûna mi eini sika hin taksônna le lungkhamna rôppho hah hakin, male sanminringna sabeina hah lukhum anghan mangin hangvangin om ei ti u. 9 Pathien'n a taksina tuong rangin mi thang maka, ei Pumapa Jisua Khrista jâra sanminringna chang rangin mi thang ani, 10 a juong tika ei lei ring innom, ei lei thi innom ama leh munkhata ei om theina rangin ei ruthûlin ama a thi ani. 11 Masikin inkhat le inkhat inmohôk ngâi ungla, inkhat le inkhat insan inlôm ngâi roi, atûna nin tho ngâi anghan.

Azoina rilnangei le chibaimûknangei

12 Ka lâibungngei le sarnungei, nin lâia sin dûktonga khristien ringnuna nangni ruoi ngei le nangni minchu ngei hah asadima nin jâ ngei rangin nangni kin ngên ani. 13 An sintho sika han lungkham ngei ungla, jâna lientak pêk ngei ungla. Nin lâia inngêi-irrin om roi.

14 Kin lâibungngei le sarnungei, mithaboi ngei hah rokôk ungla, mulungchîn ngei hah mohôk ungla, mirâtloi ngei hah san ungla, mi murdi chunga nin phûk min-uoi roi, tiin nangni kin ngên ani. 15 En roi, tukhom asaloi chu asaloi nanâkin thuon no ungla, zoratin inkhat le inkhat chunga sin sa tho pe inlôm rang le mi murdi chunga khom tho rangin khîna sin roi.

16 Râiminsân tit ungla, 17 zoratin chubaitho ungla, 18 i-ih chunga khom râisânchong misîr ngen roi. Ma hih Khrista Jisua leh nin inzoma nin tho ngâi ranga Pathien'n nangni a nuom ani.

19 Ratha Inthieng khan no roi; 20 inmohôkna thurchingei mumâk no roi. 21 Neinunngei murdi en minsin ungla: asa kai chu pom tit ungla 22 male asaloi murdi renga chu inkêm roi.

23 Inngêina mi pêk ngâipu Pathien han lam tina nangni minthieng senla, ei Pumapa Jisua Khrista a juong tika nin ratha, nin mulungrîl, takpum le theiloina ngei murdi renga le nin pumin nangni mojôk rese. 24 Nangni koipu hah taksônom ani sikin, tho khom thông atih.

25 Lâibungngei le sarnungei, keini rang khom chubai mi tho pe roi.

26 Iempungei murdi hah intum inthiengin leh chibaimûk ngei roi.

27 Hi lekhamuthuon hih iempungei murdi kôm pore rangin Pumapa rachamneinân nangni ke ngên ani.

28 Ei Pumapa Jisua Khrista moroina hah nin kôm om rese.

5:2 5:2: Mat 24:43; Luk 12:39; 2 Pet 3:10

5:8 5:8: Isa 59:17; Eph 6:13-17